منتدي المركز الدولى




۩۞۩ منتدي المركز الدولى۩۞۩
ترحب بكم

عزيزي الزائر / عزيزتي الزائرة يرجي التكرم بتسجبل الدخول
ونحيطكم علما ان هذا المنتدى مجانى من أجلك أنت
فلا تتردد وسارع بالتسجيل و الهدف من إنشاء هذا المنتدى هو تبادل الخبرات والمعرفة المختلفة فى مناحى الحياة
أعوذ بالله من علم لاينفع شارك برد
أو أبتسانه ولاتأخذ ولا تعطى
اللهم أجعل هذا العمل فى ميزان حسناتنا
يوم العرض عليك ، لا إله إلا الله محمد رسول الله.
شكرا لكم جميعا
۩۞۩ ::ادارة
منتدي المركز الدولى ::۩۞۩


منتدي المركز الدولى،منتدي مختص بتقديم ونشر كل ما هو جديد وهادف لجميع مستخدمي الإنترنت فى كل مكان
 
الرئيسيةبحـثالتسجيلدخول
Awesome Orange 
Sharp Pointer

منتدى المركز الدولى يرحب بكم أجمل الترحيب و تتمنى لك وقتا سعيدا مليئا بالحب

اللهم يا الله إجعلنا لك كما تريد وكن لنا يا الله فوق ما نريد واعنا يارب العالمين ان نفهم مرادك من كل لحظة مرت علينا أو ستمر علينا يا الله

شاطر | 
 

 قصيدة انا مصرى كريم العنصرين

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
حسن الشيخ1
عضو ذهبى
عضو ذهبى


عدد المساهمات : 365
تاريخ التسجيل : 18/12/2010

مُساهمةموضوع: قصيدة انا مصرى كريم العنصرين   الجمعة 4 مايو - 5:12

قصيدة انا مصرى كريم العنصرين
للشاعر الكبير عبد الرحمن الأبنودى

أنا المصري... كريم العنصرين



سليل المخلصين... المؤمنين
وحامي الأمّة في وقت الشدايد
وشقَّاق السِّكك للواردين
ودمّي ملك ليكم... أجمعين
أنا المصري
كريم العنصرين

***


أنا المصري كريم العنصرين
فقدت العقل والصوت والإيدين
وبعد ما كنت نجدة وروح ووقفة
مانيش عارف نسيت ده كله فين
ومين اللي سلبني اسمي مين؟!
أنا المصري
كريم العنصرين

***


وكنت أصرخ أطفِّي النار بصوتي
ويحيي أمّتي في الشدّة موتي
فمين اللي كتب عاري ف جبيني
ومين اللي سرق شعلة سكوتي
وأنا اللي غنايا صحّى العالمين
أنا المصري
كريم العنصرين

***


أنا مِتْباع... ماهيش عادْتَك يا وطني
عدوّ... لِعدو... ومين ما قبضْش تَمَني
صبي البقال يتاجر في الضماير
وأحلى عمري ضاع مستنِّي زمني
بقينا بصمتنا الموت... مُكتفين
أنا المصري
كريم العنصرين

***


كأن الوحل... شدّ الرِّجل منِّي
أنوح وأبكِي وأنا قاصد أغنّي
وواقفين على الشطوط بأيادي سودا
محال.. حيغرّقوني غصْب عني
لو نصبوا في قلبي ميت كمين
أنا المصري
كريم العنصرين

***


بنتها من الهرم للسدِّ... يَدِّي
بنتْها كلها ف لحظة تحدي
وكنت زعيم نبيل ما بين جيفارا
وتيتو وكاسترو ونهرو وغاندي
ومش محتاج أقول أنا كنت مين؟
أنا المصري
كريم العنصرين

***


وكان يخطب تصيب الدنيا ربكة
ومن لبنان يعود أسطول أميركا
ولينا في الوجود كلمة ومكانة
وإخوة في الأمل... دمعة وضحكة
ورقابينا الأبية... مرفوعين
أنا المصري
كريم العنصرين

***


وجُونا اللي رمونا... للمهالك
تقول: "لأّه" يقولولها: "وانتي مالِك"؟
تقول: "لبنان.. أحبابنا الأعزّة.."
يقولوا: "يغوروا.. وتغوروا كذلك"
نسيت من همي أبقي إزاي حزين!!
أنا المصري
كريم العنصرين

***


وبعنا كل شئ ينباع... بِدِقَّة
بشفافيّة ومن غير أي سِرقة
ونظَّرْنا لِعِلْم النهب... صرنا
بننهب كل شيء... لكن برقّة
بقينا دكاترة وسط النشالين!
أنا المصري
كريم العنصرين.

***


زمان كان فيه مَلِك فاحت روايحُه
وثوار جيش بروحهم يومها ضحّوا
وكان لنا شأن حتى في الهزيمة
وطن كان يعجبك جمعُه وطرحُه
علينا عين وباقي الأمّة عين
أنا المصري
كريم العنصرين

***


وعاد تاني الملك يحكم بلادُه
ومن بعد السنين دي زاد فسادُه
وكنّا سادة فوق أرض الكنانة
وأصبحنا عبيدُه أو عِبَادُه
وضاع في الزحمة مشوار السنين
أنا المصري
كريم العنصرين

***


وتاني يا الفقير عاد من يخونك
وتتهان في بلادك عيني عينك
ولا الدِّين مكتفي من مصّ دمَّك
ولا عارف ديونهم من ديونك
وجيت للحق؟ كله سلَف ودين
أنا المصري
كريم العنصرين

***


وده يسلِّم لده والعصر فاجر
وتاجر حِنِت سلّمنا لتاجر
وأُم الأمّة مصر الإنسانية
بتتآمر وبتداري الخناجر
وكنت النجدة... واستنجد بمين
أنا المصري
كريم العنصرين

***


وكنت أصرخ... وكان الكلّ يسمع
وامِدِّ الإيد... عدوّ الأمة يرجع
وجاني النطع يأمرني ويشخُط
وخلاني بقيت في الحق أنطع
أنا اللي كنت أصحِّي الغفلانين
أنا المصري
كريم العنصرين

***


وكانوا يقولوا: "مصر"... الشمس تطلع
وتعلا رقابنا فوق وعيوننا تلمع
وكنا نشيل قلوبنا فوق كفوفنا
وبصدورنا نواجه أي مدفع
فمين ساعدنا ع الوضع المهين؟
أنا المصري
كريم العنصرين


***



وإزاي النهارده الدم عُومي
مقلقِل صحوتي وساكن في نومي
دِمانا بتشتعل في أرض غزة
ولبنان... نارها ماسكة في هدومي
وأنا اللي في الأسى واقف ما بين!!
أنا المصري
كريم العنصرين

***


ولولا الأنظمة العربية لامت
وفي صفوف العدو حتكون وكانت
ما كان الموت عرف "صيدا" و" بَعَبْدا"
ولا كانت قيامة الغدر قامت
ولا قلب العرب بيِّت حزين!
أنا المصري
كريم العنصرين

***


وشوف لبنان بترحل من جنوبها
ونوم الليل... ما بْيعرف جُنوبها
سطور النمل زاحفة للملاجئ
وريح الخونة ما هدِّت هبوبها
ألوف راحلين في قلبي مذعورين!!
أنا المصري
كريم العنصرين

***


فيا لبنان أنا مِ اللِّي خانوك
يا حزب الله حكامنا باعوك
ياصاحبي... ما عُدنا نملك غير هتافنا
هتافنا مُرّ... مالي رقابنا شوك
وعَلَنِي... بنفعل الفعل المشين!!
أنا المصري
كريم العنصرين

***


يا (نصر الله) ده زمن البياعين
وإنت طلعْت للأمة... منين؟
تفكّرنا بكل اللي نسيناه
أظنه صعب يصحوا الميتين
وخليتنا ـ الجميع ـ متفرجين
أنا المصري
كريم العنصرين

***


مازال نفس العدو... ومازال خبيث
أبونا مات وسابْهُولنا... وَريث
ومهما يلف ويدور.. راح يغور
وإسأل عِندنا بيوت السويس
حلاوة روح... وحياة الحسين!!
أنا المصري
كريم العنصرين

***


بقت رايتك خلاص رمز لجهادك
بقت رمز المقاومة في بلادك
ولبنان كلها بايتة في ضميرك
خلاص صَبَح الجهاد ماءك وزادك
لغير المسلمين والمسلمين!!
أنا المصري
كريم العنصرين

***


بلاد الأمريكان إحنا وصهاينه
وصمتي ع اللي حاصل... كلُّه معنى
مازال الحلم لم فارق دمايا
علي رغم اللي عاشُه طعنة طعنه
يالبنان الكرامة... لا تلين
أنا المصري
كريم العنصرين

***


ويالبنان ما تِطْفيش نار نضالِك
رجالك... حتى لو ماحناش رجالك
بحور الدم ما تغرّق حقوقك
ولا تكسر مجاديف احتمالِك
حبيبك... بس مش قادر أَعِين
أنا المصري
كريم العنصرين!!


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قصيدة انا مصرى كريم العنصرين
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدي المركز الدولى :: الادب والشعر والنثر[ Section literary ] :: الادب والشعر - القصائد( Poems)-
انتقل الى: