مصر بلدي
***
مصر بلدي.. مصر بلدي *** وطني في قُربي وبُعدي
مصر بيت أختي وأخويا *** بيت أبويا وأرض جِدّي
يللي تنكر حَقي فيها
مالكش فيها حَق قَدّي
***
شوف عَرَقْنا في أرضها *** شوف دمانا ع الحدود
شوف شطوط النيل تقولَّك *** من دراعنا فُرُوع وعُود
شوف مباني قُمنا بيها *** الأهرامات أعظم شهود
***
ولسَّه فيها احنا بنبني *** وللأبد نحمي ونِفدي
روح وذاكر، حتلاقينا *** إحنا منها مَلِك وجُنْدي
مصر بلدي غَصْب عَنَّك *** وعَقْد مِلكِيِّتها عندي
***
مصر بلدي وحَقي فيها
لو تناقش، أو تحاور *** يعني لو تاخد وتِدّي
لو تسيب البندقيَّة *** وتحُط مُخَّك في القضية
التاريخ قُدَّام عينك *** والمراجع بين أيديك
ولو تحَكِّم عَدل دينك *** وترمي كل شِيء يشينك
راح تلاقي إن حَقي
أمْر مش عايز تَحَدّي
***
كان جدودي ان كنت فاكر *** لو انت ناسي روح وذاكر
كانوا أعظم مَن حَكَمْها
وكانوا أخلَص مَن خَدمْها
مصر كانت في حِماهم *** زهرة العالم بحالُه
والشهود في الدنيا ياما *** ياما كتبُوا وياما قالُوا
***
في شبابها وفي بَهَاها *** زانت الدنيا وَجَاهَه
دولة كاملة، ورمز كامل للجمال
علوم وطب وهندسة فوق الخيال
كانت حضارة
أول حضارة
وأعظم حضارة
كانت لكل الكون منارة
كسَحِت عن العقل الجهالة *** وفاض علي الدنيا ضِياها
لِحَد ما الصحراوي جَاها *** جَاها.. وبجهله طفَاها
اقرا في التاريخ وقولّي *** مين طفا نورها وهَدَمْها
قول لي مين ساقها لوَرا *** وداس على خيرها ورَدَمْها
***
مصر بلدي
من قبل ما الصحراوي خَطَّي برجله فيها خطوة واحدة
وداس على ورودها وجمالها، ما خلا فيها حتى وردة
وكما اتعود.. ( وَأدْها ) *** وهِيَّ حَيَّة، شَرّ وَأدَة
نَفَض غُبار الصحرا من دَقنه وعمامته
على أرضها الطاهره وفرش خيمته وغَيامته
***
مصر بلدي
وانا ابن أصحاب الديوان
اللي خلّولها في العالم مكان
من عدالة أو سيادة أو طمأنينة وأمان
مصر بلدي
من زمان
من قبل ما يكون فيها.. آذان
دي القضية اللي مُش محتاجة قاضي
والحقيقة اللي مُش عايزة ترجمان
بقلم المهندس عزمى ابراهيم
‗۩‗°¨_‗ـ المصدر:منتدي المركز الدولى ـ‗_¨°‗۩‗
الخميس 23 أغسطس - 10:08
