قصيدة أم الجمال بقلم الشاعرة رضا عبد الوهاب

يا أم الجمال الزين وكعابك الحِنة
شايلة الهموم اتنين ومزوقة الجنة
ضى العيون قناديل بتنوري الدنيا
قاسمة الرغيف اتنين لرفاعي ولحَنا
يا أرض براح ووش سماح وجذع نخيل
يا رمل فروز,,,وحضن كنوز ومجرى النيل
يا كل خط فى ملامحى وتنهيدة
تقول الآه بحنية
ياجنية وأنا المجنون بحبك موت
يا غنوة كلها مواويل يا ضى العين
ياأم الجمال ألوان ومن البحوراتنين
بتقربي الخلان وتنادي ع الغايبين
نسمة وهواها عليل ومطببة الكفة
يامحلا أولادك فى رباط ليوم الدين
ياصابرة ع الأوجاع يا أمينة ومآمنة
ولاهمِّك اللى باع ماهوأصله مش منَّا
يامفرقة الأيام ليه ظلمتِ فى القسمة
لينا دموع وجراح ليهم سنين فرحة
والحمل زاد فوقك ولينا فين متوى
شايف براح فدادين وماليش أنا مأوى
طارحة الغيطان للغير وبدرت أنا التقوة
ماحصدت غيرالآه وعايشنها بالعافية
طب فين أروح منك ماليش أنا غيرك
لو يوم أغيب عنك روحى تناديلك
بس ايدينا اتمدت حرمونى من خيرك
أنا حقي فيك ضاع مضروبة على عينى
ولاكنت يوم بيَّاع وعلىَّ ماتهوني
بس الوجع لو زاد خايفة تبيعونى
الظلم طال الكل والكل ظالمينك
كله واقف فى الطَّل شمالنا فى يمينك
الطيبة ليه بتطُّل على كل محاسيبك
وأنا مهما أدوق الذل عمري ماهسيبك
عشناكِ بالرغبة وبحبنا ليكِ
هو إنتِ إيه مش حاسة الشعرشاب فيكِ
قطعتينا نثايروعمري وأنا ثايرع الظلم لجل يزول
ودمنا فاير ديسانا أحجارك على جسمنا
دايرة وتوهنا فى الدايرة موتنا فى حواريكِ
وكان مابنَّا وعد طولتِ ليه فى البعد
وقفلتِ شبابيكِ
يا أم العجايزفيكِ عقول تتوزن بالماس
تنحت تشق الصخريطلع دهب وألماس
تزرع تغزل وترسم فى الطب هما أساس
فيكِ البطون ولَّاَّدة طيبة ف قلوب الناس
هو إنتِ نسيانا ولا انتِ بيعانا
ولاَّ شيطان وسواس وقَّع مابنَّا خلاص
فوتينا ف الضلمة خنقانا بالضمة
وحلفتِ بالعَشرة ع الملح والعِشرة
وبخلتِ بالكلمة والضحكة والبسمة
ولا عدش أى براح
يا أم القلوب الطاهرة يا ام الحسين والعذرا
لو حتى بالنظرة هتداوي ياما جراح
نقرالك الفاتحة ونفتح الصفحة وتسمي وتصلي
على راسنا بالرقوة وتعزي ابليسك شمتان بتلبيسك
توب السواد والتُل ,,ومزوقه بأوجاع واللقمة
متغمسة بالذُل والظلم طال الكُل وعمرنا بيقل من
كُترحراميكِ زرع ونبت فيكِ خراب علينا وحل والكُل منه كَلَّ
يا أم الحنان والطيبة يامحرمانا العيبة والكلمة فين تتفال
قريبة ليه وبعيدة ضُمينا جوَّا الشال ورني بالخُلخال
وعودي شابة ياما ع الباب واقف خيَّال
يا أم الجمال زايد كل اللي راح عايد والشمس
لو غابت راجعة بطول أميال وقلبي أنا ميَّال
شايل حمل جبال ع الوزن أنا كيَّال لكن أقولك ايه
الصبرفاض يا امة وبعد بعيد عنَّا وحالنا غيرالحال
يا أم الرجال الزين شالوكِ ياما شيل خبوكي فى عنيهم
عدوبك الأهوال لقيوكى بيعاهم فرمتهم الدنيا كسرتهم الأحمال
واللي يموِّت يوجع قُصرالايدين يا أمة تكسرعين الرجال
قصيدة (ياأم الجمال)
الشاعرة_رضاعبدالوهاب