بنت مين فى مصر

بنت مِـين فِى مَـصر ؟!

سـألنى:
- انتِ منين ؟
قلت له - مـن مَصر
سأل - يَعْـنى مِنـْين فِ مصر؟!
قلت- مِن كل حِـتة فِ مَصر
سأل- طـَبْ بنت مِين فِ مصر ؟
- قـُلت لـه:
- بنت مَصر كلها....
بنت كل أهلها....
بنت كـل شِبر ف أرضها
من طـُولها لو ضربُته
ف عَرضها
وبعدين قـْـسمته عـلى شعْـبَها
بنت الشوارع والحارات
و الـقصور والكـفـور
والنـجوع والربـوع
و العِشـش والعـوامات
بنت الكنايس والجوامع
و النواصي والكباري
والموالد والساحات
بنت الأُصول والأكابروالذوات
بنت ناسنا الطـَيـْبـيـن
المخلِصين المظــلـومـين
الصابرين رغـم الآهَـات
بنت بَحَري والصعيِد
و القـنال وبورسعيد
بنت القَديم والجديد
و الشَـقـا المَصْـلوب والعـزم الحـديد
بنت النـوبه والفـلاحين
و السواحليه الفراوده الصيادين
والبَدو الطيابه الرحَّّـالين
بنت الصحرَا وبنت الطين
بنت الفـواعْـليه الغلابه الشـيَّالين
النجّارين والحدَّادين والبنـَايِيـن
طالعْين يحَاربوا فى الخـراب
ويَّا قـصْعـَه ومـَسْطـَرين
بنت الفـَاتـْحه للأولـياء
والسـيده وسـيـدنا الحـُسـين
بنـت الشكـوى لـو تِنـْـكـتم
ويَّا رفـْـعِة الجبْيـن
ومُكافـْحة الظـُـلـم اللعِـين
والاسْـتِـسْلام .. غِـير المُهـين
اسْـتِسْـلام ابن اليَـقـيـن
بإن الدُنـيا مهْـزلـه
مـقَـَضِّيِينـها حـتى حِيـن
دنـيا زي مَـضْـيَـفـه
وإحـْنـا مِنـها مرَوّحيـن
.......................
بنـت الحُـدود المقـفــولـين
عـلى مُربَع مُنـْحرِف
عـلى أرض سـينا
اللي نايِمـه
جُـوا حُضن بحور حـنين
بنـت الجبال والبَرَارى
والآبـاروالنخـلتيـن......
شَامْْخِـين يِغـَـنـُـوا لحن الحَصَاد
جُوز وتيْـن
بنت مزارع الزتـُون والعنب
في جبال كاترين
بنت حلايب في الجنوب
والواحات المنسيين
بنت المراسي والسُفن والمَلاحِـين
بنت المراكِب أم الشرَاع
والفــلـُوكه بمجْدَافـين
بنت البَراح على الشُطوط
بعد العصارى والشماسي مروحين
بنت النيل جَاي يجري
من المنابع للمَصَب على فرعـين
بنت السواقي والقَناوي
والقـلـوب العَرْقَانين
بنت مَنـْف وبنـْت طيِبَه
بنت حُب دَوِّب بَهيه
فِ عيون يَاسين
بنت الشعبَطه فوق التوته
نعود لدورنا مْبَهْدِلين
بنت الغِيطَان الشَرَاقِي
والحِيضَان المَرْوِيِين
بنت المَصَاطِب والمَنَادِر
والمَناقِد تِسَّوي شَاي
و مَـرة تِشـْوِي كِيزَان هَجْين
بنت الرَحَايا والطِحِين
بنت الحَطـَب والمَطَارِح والعَجْيِن
بنت شـَمْس سَمَارْها بَايِن
عَ الوُشْوُش متحَنـْيِين
بنت السَفَر قَبْل الضَبَاب
والليَالِي مْبَدََّرِين
و السَهَر فُوق السُطُوح
تحْت النُجُوم المَرْعُوشِين
بنت الفَرَح وِسْط الشَوَادِر
فِيه غَوَازِي ومُنْشِدين
بنت العَزَا ف قَلب الصِوَان
والمُجَامْلَه..
صَوَانِي طـَالعَه للضُيُوف والمُقـْرِئيـن
بنت اللِعْب عَلى السَلالِم
والبْيِبَان مِتـْفـَتَحِيـن
بِنت الكَلام مَع الجِيران م البَلكـُونَات
والستَايِر مسدولين
بِنت المَحَبْه اللى عايشه
بين نصَارى ومُسلمين
القَلب وَاحد والرَب وَاحد
ولكل وَاحد مِنـّْا دِيـن
بنت الشَفـْايِف خَـايفه تِضْحك
كـُتـْـر اللى فات ما فات حَزيـن
والعيون اللى تدَمَّع لمَّا تفـْرَح
تخْـزِي عيون الحَاسِدين.
...........................
بِنت الفـرَاعْـنه الجبَارِيـن....
عَلـِّمُوا الدنيا
و النفـُوس المَكـْسورِين
قـُصاد رِياح عاتيه
بنت العُـزَاز المنـْصورِين
رجَّعُـوا الفرْحه
بنت الجُدود الشَّـقـيـانين
والولاد المهْـزُومين...
تايهـين ما بين السِّـكتين
الرَايحه و الجايَّه
.................
أنا بنت مِيْن ؟!
بِنت التـُراب اللـِّي إتـْعَجَـن
جُوَّا عَرَق العَافـْيه
و الأيدين اللـِّي شقِت بحرها
بِالسُخـْـره والعَافـْـيه
بِنت الصُدُور المَشْـقـُوقيـن
حِنـَـيِّنه ودافـْيه
بنت شـَوقي ونِجم وجاهين وحافِظ القَافـْيه
بنت النغـَم عالي البحور
الهادْره والصافـيه
بنت صُوت عبد الحليم
والآهات خافـْيه
بنت ضحـكة السنـدريللا
الملكَه لو حَافـْيه
بنت النـُكَـَت والمَواوِيل
والمعانِى الشافـْيه
بنت الأمـثَال والتَـآوِيل
والحكـمه... لو وافـْـيَـه.

#جيهان_الشعراوي
#بنت_مين_في_مصر
من ديوان بنت مين في مصر؟
الهيئة العامة للكتاب- ٢٠٠٨
ملحوظة: الصورة من ٢٠٠٨

‗۩‗°¨_‗ـ المصدر:#منتدي_المركز_الدولى ـ‗_¨°‗۩‗