قصص مؤلمة من مستشفى الاطفال للسرطان

سلامو عليكم 
نويت أروح اطلع زكاة لمستشفى أبو الريش للأطفال ، وأول ما وصلت شفت طفل ميت ومتكفن ، يجى أربع أو خمس سنين من طوله على إيد أبوه ، وواحد واقف مستنيه بموتوسيكل ، وأمه بتجرى وراه ومعاها واحدة ، بيقولوا لو ملقناش ميكروباص هنتصرف ونيجى ، وفضلوا يجروا في الشارع ورا الموتوسيكل ، اللى هو مفيش تاكسى ياخدوا ابنهم فيه ، مش معاهم فلوس ..
وأنا اتسمرت مش فاهمه حاجة ، وفهمت بعدها من صبية صغيرة يجى ١٢ سنة ..
قالتلى: ده كان داخل على رجله ، واتوفى ، أمه كانت بتقول كدة وهى بتصرخ ..
الصبيه لهجتها صعيدية ، قالتلى أنا من أسوان ، بس لينا قرايبنا قاعدين عندهم ، وشوفت أخو الصبية يجى تلات سنين ، لقيت فى إيده كانيولا يا حبيبى ، وواقف جنبها الولد حافى ..
أى وقت تعدى جنب سور المستشفى ، هتلاقوا ناس نايمة في الشارع ؛ دول أهل الأطفال اللى جوه مش معاهم إمكانيات يأجروا مكان يباتوا فيه ؛ فبيناموا في الشارع 
وكمان ساعات يندهوا على أهل الطفل ، محتاجين لبن .. محتاجين دواء .. يعنى منتهى الذل ..
دخلت للمدير الإدارى ، الراجل رحب بيا ، وجاب لنا مدير الخدمة الاجتماعية ، طلعت مكتبه وجاب ملف فيه حالات محتاجة ..
أطفال محتاجة علب لبن ، ومفيش إمكانية ، يعنى ممكن يموتوا عشان مفيش لبن ..
طفله عندها ٨٠ يوم ، عاوزة أنبوبة أكسجين ،، ومفيش إمكانية ، وأهلها بيلفوا يدورا على حد يسلفهم ..
طفل محتاج دوا بألف جنيه ، وحالته خطيرة ، مش مع المستشفى غير ٢٠٠ جنيه ، وكمان تبرعات ..
وحالات كتيييييير مش قادره أوصفها ، بس دول اللى فاكراهم ..ر
المستشفى فيها أورام وقلب مفتوح وفشل كلوى ، 
فبقوله: يا فندم ليه مش عامليين دعايا ؟! 
قال لي: احنا مش معانا نصرف على الدعايا ..
التبرع إنك تساهم فى علاج حالة ، أو تتكلف بروشتة ، وهما يبلغوك محتاجين كام ؟؟
أو تعين أسر فقيرة مش لاقية تاكل ، وليها حالات عندهم ..
فيه أسر جاية من أدغال مصر ، وفى أسرة مش معاها موبايل ، متخيليين إنهم قاعدين في الشارع ، عشان لو حصل حاجه محدش هيعرف يوصلهم ..
الراجل قال: إحنا هنا بفضل ربنا ، وتبرعاتكم هى اللى ساندانا ..
انا مكنتش ناويه خااااالص أقول لحد ، بس بعد اللى شفته بعينى ، وأد ايه الناس دى محتاجة ومحدش يعرف عنهم حاجة ..
دول أطفال بتموت ، وأطفال فى حضانات ، وأطفال عندها أورام ، واللى عندها أيام وتموت ، وأطفال صمامتها مسدودة ، وعندها أكتر من ثقب ، وأمهات شفتها شايلة عيالها صغيرييييين ، وفى إيديهم الكانيولا ، كنت عاوزه أبكي جنبهم .. 
حمدت ربنا على كل نعمة مش حاسين بيها .
ربنا يجيرهم فى مصائبهم ..
لو كل واحد فينا أقل الايمان ، خد خمسين جنيه وراح هناك ، أقسم بالله ممكن تنقذ طفل ،  
احنا بنشترى تفاهات كل يوم ، وكولا وشيبسي وشوكولاته وبناكل بأكتر من كده ، أكننا مش هناكل من بره يوم ..
ممكن كل كام واحد أو واحدة وصحابهم ، يلموا من بعض ويتصدقوا كل شهر هناك ، وخلوا كل مرة نية حلوة للصدقة الجميلة دى ..
مرة تنجح ، مرة تتجوز ، مرة يطول فى عمر أهلك ، مرة لمتوفى، والله والله ربنا اكرم مننا ؟ احنا اللى محتاجين ده مش هما 
مستشفى أبو الريش للأطفال ، فيها اطفال بتموت عشان أهلهم مش معاهم ٥٠ جنيه يجيبوا علاج .. 
اللي عاوز يتبرع يروح بنفسه، ويجيبلهم علاج أو دم أو يتبرع للأهالي العيال نفسهم
المستشفى معندهاش فلوس ؛ علشان تعمل دعاية زى مستشفى 57 أو مجدي يعقوب ، فخلينا احنا نبقى الدعاية بتاعتها ...... 
 دعوة للتبرع لمستشفى أبو الريش للأطفال ..
طلعوا زكاة أموالكم للأطفال اللي بتموت عشان نقص العلاج او علبه لبن 
وربنا يتقبل ..
لا تستصغروا فعل الخير .. فربما كانت هي المنجية 
#عايدة