أيوه تعبني هواك - فايزة أحمد

أيوه تعبني هواك وياك ، يللي ظلمت الحب معاك
أيوه تعبت تعبت تعبت ، زي ما بتقول تغيرت
تغيرت من الحرمان ، مش بتحمل زي زمان
وأنا حتغير ، أنا حتغير
إلا في حبك
طمن قلبك ، لسه بحبك
زي زمان ، واكتر بزمان

يللي بتسأل عن أحوالي ، وبتستغرب علّي جرالي
تمنيتك تسأل عني ، قبل بعادك ما يغيرني
سبت الدنيا تلعب بيا ، تطفي بريق الشوق في عينيا
حتى البسمة ساعات بناديها ، تهرب مني و تعصى عليا

مين كان يتصور مين ، يبقى اللي ما بينا سنين
واحنا مكناش نتحمل ، بعدنا لو طال ساعتين
وحجيب الضحكة منين ، وإن جت ، حضحكها لمين ؟
مع غيرك طعم الفرحة ، بيكون يا حبيبي حزين
توحشني ، أناديلك
لا تجيني ، ولا أجيلك
وألاقيني على حالي
بتمنى تناديني ، واستنى
اتاريني بناديلك في خيالي
والاسم بحب ، وليا حبيب
أما ده حب عجيب وغريب
أيوه تعبني هواك وياك ، يللي ظلمت الحب معاك
أيوه تعبت تعبت تعبت ، زي ما بتقول تغيرت
تغيرت من الحرمان ، مش بتحمل زي زمان
وأنا حتغير ، أنا حتغير
إلا في حبك
طمن قلبك ، لسه بحبك
زي زمان ، واكتر بزمان

يا حبيب أيامي ، يا منى أحلامي
يا أجمل اسم على لساني
لو كنت مكاني ، أكيد تنساني
ويمكن تعشق من تاني
لكن مع إن هواك ، حيرني ليالي معاك
راجعين للحب أنا وإنت نقول له الناس ظلماك
الحب حلو ، الحب جميل
ملوش في كل الدنيا مثيل
لولا حلاوته ما كان في هواه
في كل ليلة قلوب بتميل
ليه الحبايب ، يختاروا ليه
من الهوا سهره وناره
ويعيشوا ليه ، الحب عذاب
وما يعيشوش فرح نهاره
وأنا وإنت في الحب نسينا ، نعيش حلاوة ليالينا
وآهي رجعت الأيام وياك ، بالفرحة بتنادي علينا
ده أنا من شوقي ، بشوف الدنيا بعينيك إنت مش بعنيا
حتى الضحكة ، و حتى الدمعة ، أمرها بإيديك مش بإيديا
في ايدينا نبقى فرحتين ، عايشين في دنيا العاشقين
يا منور أيامي .. يا مصور أحلامي
يا واخدني فوق في العالي
يا عاجبني ، وتاعبني
يا شاغلني ، وسايبني
قول مين غيرك على بالي
عمر الزمان ما يغيرني طول ما إنت جنبي
طول ما إنت جنبي مطمني ، طول ما إنت جنبي
يللي إنت أقرب لي مني ، طول ما إنت جنبي
أيوه تعبني هواك وياك ، يللي ظلمت الحب معاك
أيوه تعبت تعبت تعبت ، زي ما بتقول تغيرت
تغيرت من الحرمان ، مش بتحمل زي زمان
وأنا حتغير ، أنا حتغير
إلا في حبك
طمن قلبك ، لسه بحبك
زي زمان ، واكتر بزمان

كلمات : عمر بطيشة
ألحان : محمد سلطان