فـ الميكروباص

فـ الميكروباص

بتحس إنك جُوّه دُنيّا مُصغّرة
سوّاق و دايس في الكلام رغّاي
و لّع سيجاره و يّا شفطة شاي
شغل شريط هابط
يسمع زباينُه إزاي !
لو حد فيهم قاله هات رُبعين ورا ؟
جنبه تلاقي حاجة م الاتنين
حته طريّة حاجزلها الكرسي
أو شاب دافع حق كُرسيين
خمسين مرايّه محطوطين للمسخرَه ..
واحدة قُصاد السِت و بناتها
رايحين فرح بتاع إبن عمتها
إللي زمان كان هُوَ دُنيتها
بس الفُرص كانت معاه متأخرَه ..
قاعد عجوز راكِن على الشِبّاك
باصِصّ على السكَّه
لامح نهايتُه هناك
لو تعرّف إللي باليه
هتهون عليك بلواك

دا عيالُه قاسيَة عليه عشان المَنّظرة ..
واحد مريض قاعد فـ آخر صف
عيّان بقالُه شهور
ع الحُكما كان بيلّف
و فـ إيدُه كيس الدوا
عشمان بإنه يّخِف
لكن دواه هيفيد بإيه فـ إللى جَرى ..
بنتين بيحكوا لبعض قصة حُب فات
كان جنبهُم واحد بيسمع من سُكات
مين إللى غلطان و السبب
مين إللى خلّا القلب مات
كُل الحكاوى فـ النهايّة مُكررة
و وَصل خلاص الميكروباص
و الكُل موصلشى
الأُجرة يا حضرات
مين إللى محاسبشى
الكُل مَدّ إيديه
يدّفَع عشان يمشى
سابوا همومهم ع الكراسى مبعترة
نبيل عبد الحميد