تأثير سد النهضة على كل من مصر والسودان

تأثير سد النهضة على كل من مصر والسودان
- عشان نفهم تأثير سد النهضة علينا محتاجين نعرف كمية الماية اللي بتجيلنا وازاي بنستفيد منها.
- كمية الماية اللي بتدخل مجرى النيل حوالي ٩٤ مليار متر مكعب بيتبخر منها في السودان ومصر حوالي ٢٠ مليار متر، فحصة مصر والسودان بتكون ٧٤ مليار متر مكعب، بتتقسم بمقدار ٥٥.٥ مليار متر لمصر و ١٨.٥ للسودان بالإضافة إلى إن السودان بيتسرب من حصته حوالي ٦ مليار واحنا اللي بنستفيد منها.

- في الحقيقة حصة مصر من نهر النيل مش هي المصدر المائي الوحيد لينا، هي بتمثل ٩٣٪ أما الـ ٧٪ الباقيين بييجوا من المياه الجوفية، محطات تحلية المياه، الأمطار القليلة اللي بتغرقنا كل شتا والترسيب. بالإضافة لحصص إضافية من إعادة تدوير مياه الصرف الصحي وإعادة استخدام مياه الصرف الصناعي والزراعي، وبكدا بيوصل إجمالى المصادر المائية في مصر حوالي ٨٠ مليار يعني اكتر من الكمية اللي بتيجي لدولتي المصب واكتر من الكمية اللي إثيوبيا عايزة تخزنها قدام السد.

- استهلاكنا من الكمية دي للشرب بسيط حوالي ٦ مليار متر مكعب، لكن النسبة الأكبر بتروح في الزراعة، وهنا مربط الفرس.

- بالرغم من إننا مش هنموت من العطش ولا حاجة لكن احنا بقالنا فترة بنعاني من الشح المائي لأن استهلاك الفرد الواحد عندنا في السنة أقل من ١٠٠٠ متر من الماية واللي يعتبر الحد الأدنى لاستهلاك مياه الشرب عالميا، بالإضافة إلى إننا بنعاني من عجز اكتر من ٥٠ مليار متر مكعب وبيتم تعويض جزء منهم بإعادة التدوير زي ما كتبت فوق.

- النيل له فرعين، نهر النيل الأبيض ودا بينبع من بحيرة فيكتوريا اللي بتنبع من نهر كاجيرا في بوروندي ودا بيساهم بحوالي ١٥٪ من حصة مصر والسودان، ونهر النيل الأزرق ودا بينبع من بحيرة تانا في اثيوبيا ودا بيمثل حوالي ٨٥٪ والاتنين بيتقابلوا في الخرطوم، وسد النهضة مبني على النيل الأزرق على بعد حوالي ٢٠ كيلو من الحدود الإثيوبية - السودانية.

- النيل الأزرق بيصب فيه فرعين تانيين كبار زي فرعي رشيد ودمياط عندنا هم فرع عطبرة وفرع السوباط، وبالتالي إثيوبيا فعلا تقدر تتحكم في ٨٥٪ من حصتنا في الماية، لكن سد النهضة نفسه مبني على فرع النيل الأزرق عندهم بس، وهو بيساهم في ٥٤٪ فقط من حصتنا المائية.

- يعني باختصار الـ ٧٤ مليار متر مكعب ماية فيه منهم ٤٦٪ في أمان لحد دلوقتي، وحط عشروميت خط تحت لحد دلوقتي دي، يعني المشكلة كلها في حوالي ٤٠ مليار متر مكعب واللي بتساوي نص مصادرنا المائية.

- إثيوبيا قررت تملا الخزان خلال مدة ٣ سنين هتبدأ بعد فترة بسيطة من دلوقتي مع بداية فترة هطول الأمطار هناك. خلال الفترة دي واللي محتمل يحصل فيها جفاف، احنا هنسحب من مخزون بحيرة ناصر اللي هو مرتين وربع قد خزان سد النهضة (١٦٤ مليار متر مكعب)، ودي مش أول مرة تحصل، حصلت قبل كدا خلال فترة الجفاف اللي كانت من سنة ٧٩ لسنة ٨٧.

- فترة ال ٣ سنين هتسبب مشكلة، إنها هتخلي إثيوبيا تمدنا ب٣٥ مليار متر مكعب في حين احنا طالبين ٤٠ مليار عشان مايحصلش ضرر عندنا للأراضي الزراعية، ومع سد العجز من بحيرة ناصر ممكن يقل منسوب المياه فيها عن الحد الأدنى اللي هو ١٦٥ متر ودا بيمثل خطر علينا خصوصا لو حصل جفاف لا قدر الله، ولكن دا مش أمر حتمي، وكمان مش بيمثل خطر على توليد الكهربا لأن السد العالي شبه خرج من الخدمة حسب زلة لسان وزير الكهربا المصري واحنا معظم اعتمادنا دلوقتي بقى على محطات توليد الكهربا اللي بناها السيسي خلال فترة حكمه.

- السد معمول بهدف معلن وهو التنمية، وحقيقي فعلا اثيوبيا محتاجة للتنمية بشدة، وهم بيقولوا إنه هيولد ٦ جيجا وات من الكهربا لكن حسب خبراء فهو هيولد ٢ جيجا وكسور فقط، لكن اللي يهمنا إن سدود توليد الكهربا زي السد العالي مابتشتغلش إلا بمرور الماية من خلالها، يعني مسألة حجز الماية أو منعها دي هبدة بيروجها ويصدقها جهلاء! وبالتالي الطرف الإثيوبي مطالب كل سنة إنه يفرغ الخزان عشان لو منسوب الماية زاد هيسببله كارثة قبل ما يسببها لينا احنا.

- سد النهضة سد عملاق ومتين جدا وتم توسيعه اكتر من مرة خلال الانشاء، ارتفاعه ١٧٥ متر، وطوله ١٨٠٠ متر، وهو واحد من أكبر ٣ سدود كهرومائية في القارة كلها، وهو بيمثل للإثيوييين ما كان يمثله السد العالي للمصريين في الستينيات بالظبط.

- بالرغم من بعض المشاكل اللي هيسببها السد لإثيوبيا إلا إنه حلم قومي قديم عندهم بدأ التخطيط له من سنة ١٩٥٦، ولكن الظروف دايما كانت بتمنعهم من تنفيذه لكنها بدأت في خطوات تحقيقه فعلا في نهاية حكم حسني مبارك بعد العزلة التامة اللي اتسبب فيها لمصر عن محيطها الإفريقي، وفي ٢٠٠٧ كانت كل دراسات السد منتهية وكان فاضل اختيار وقت التنفيذ. كان إسمه في الوقت دا سد الألفية الكبير وبعد اتفاقية عنتيبي ٢٠١٠ واللي بتهدد حصة مصر والسودان من النيل فاق مبارك من غيبوبته أخيرا وبدأ يتحرك لكن ثورة يناير اسقطته.

- السد تحول من قضية تنموية لقضية سياسية، وأصبح بيتم استخدامه لتجييش الشعب ورا آبي أحمد والنظام الإثيوبي الحاكم، والقضية زادت أهميتها دلوقتي خصوصا مع اقتراب موعد الانتخابات هناك وترشح جوهر محمد المنتمي لإثنية الأورومو واللي بتمثل الأغلبية في إثيوبيا.

- مصر في الذهن الشعبي والإعلامي في اثيوبيا زي إسرائيل بالنسبة للمصريين، يعني هي بالنسبالهم دولة مكروهة مش عايزة الخير ليهم، دولة متآمرة عليهم كانت سبب في جعلهم دولة حبيسة ماعندهاش موارد بعد دعمها للحركات الانفصالية في اريتريا، وكانت داعم مهم للصومال وقت السادات ومبارك في حربها ضدهم، وكانت السبب في تعطيل عجلة التنمية والتسبب في مجاعات كتير هناك، ناهيك عن كونها دولة عنصرية بتستفيد من مياه النيل من غير ما ترد الجميل! وكمان هي عدو تاريخي قديم دخل قدامهم في معركتين في عهد الخديو اسماعيل وقدروا يتغلبوا عليه.

- مسألة إنك تضرب السد بخلاف عدم جدواها السياسية لأنها هتسببلك عزلة وهتجييش دول حوض النيل ضدك واللي بالمناسبة عندها خطط تنموية زي إثيوبيا برضو، فمجلس الأمن هيعتبرك دولة معتدية وهيطبق عليك عقوبات وأنت أصلا لا وضعك السياسي ولا الإقليمي ولا الاقتصادي يسمحلك بمغامرة خسرانة زي دي، وبخلاف استحالتها سياسيا فهي شبه مستحيلة عسكريا، لأن سد بالضخامة دي محمي ببطاريات صواريخ إسرائيلية Spyder SR رهيبة قادرة على توجيه ضربات على بعد ٤٠ كيلو متر، احنا مانملكش زيها أصلا! بالإضافة لسلاح الجو الإثيوبي اللي على استعداد للاشتباك في أي لحظة، مع عدم وجود قاعدة عسكرية قريبة تساعدك في المناورة والتشتيت بيجعل حلم ضرب السد أوهام في أوهام.

- اخيرا، الحل من وجهة نظري هو الاعتراف بفشل ادارتنا للملف، وغلطة السيسي تحديدا بتوقيعه على اتفاقية المبادئ بدون وجود خبراء فنيين أو بنود واضحة وصريحة تضمن حقوق مصر واللي أعطى إثيوبيا اعتراف ضمني بأحقيتها في التعدي على حقوق مصر، واستئناف تمويل السد بعد ما مصر قدرت توقفه في ٢٠١٤، وعدم وجود بند في الاتفاقية ينص صراحة بالحفاظ على حصة مصر التاريخية، واللي هي غلطة مش راضي يعترف بيها ولبسها بالكذب لثورة يناير. ياريت نتعلم من اخطائنا ولو لمرة واحدة ونحاول نتقرب اكتر من إثيوبيا والسودان وباقي دول حوض النيل. لأن مشكلة سد النهضة حسب معرفتي مش فيه هو شخصيا ولا حتى في الكمية البسيطة اللي هتقل من حصتنا بسبب البخر والتسريب واللي نقدر نعوضها، لكن في حالة انهيار السد لأي سبب بعد تخزين الماية واللي هيلزمه توسيع بحيرات توشكى عندنا عشان تقدر تستوعب كمية الماية اللي هتوصلها ومصر ماتتأثرش. وعلى جانب آخر، المشكلة مستقبلية وهتكون في السدود اللي هتتبني بعده واللي متوقع إنها تكون اكتر من ٣٠ سد موزعة على فروع نهر النيل، وحصتك اللي اتفقوا إنها تقل حسب اتفاقية عنتيبي ٢٠١٠ واللي مصر والسودان بالإضافة للكونغو رفضوا التوقيع عليها، واللي ممكن يتم التحكم فيها بعد كدا واللي هيتلوي دراعك بسببها، والتكاثر السكاني الحشري اللي عندك واللي مسببلك مشاكل دلوقتي فما بالك بعد ٣٠ ~ ٤٠ سنة! والزيادة السكانية اللي عند السودان اللي هتجبره يستهلك كل حصته وزيادة لحاجته للتنمية برضو. بالإضافة طبعا لمشكلة فترات الجفاف اللي بقت مرهونة دلوقتي بجيراننا يعني أصبحت الزراعة عندنا مهددة في وقت احنا محتاجين نطور أساليب الزراعة ونزود الأراضي والمحاصيل ونحقق اكتفاء ذاتي عشان نبقى قد الدنيا فعلا!

‗۩‗°¨_‗ـ المصدر:#منتدي_المركز_الدولى ـ‗_¨°‗۩‗

تأثير سد النهضة على كل من مصر والسودان 18839210

» سد النهضة الاثيوبى
» سد النهضة والعنت الاثيوبى
» الاسرة العلوية فى مصر والسودان
» تاريخ الخلاف الحدوديبين مصر والسودان منطقة حلايب وشلاتين
» النهضة يا بت. النهضة يا واد!!!