عندما يبكى الفقير فرحا

بقالى ساعه بلف بالعربيه عشان الاقي ماكينه ATM فاضيه عشان اعرف اسحب فلوس ومش لاقي يا عطلانه يازحمه جداااا..مشيت كتييير عشان الاقي وآخر مازهقت لقيت واحده خفيفه شويه
نزلت متأفف جدا انى هقف ف الطابور ..المهم وقفت ...
لاحظت الراجل اللى قدامى حد ف أوائل الخمسينات من عمره ومن الطبقه المطحونة...الراجل كان عرقان جدا وجسمه بيتنفض مع ان الجو مش حر ولا حاجه بس ماركزتش اوى معاه ....
بعد شويه لقيته بيقولى " هستاذنك بس تحجزلى المكان عشان مش قادر أقف وخايف اقعد يروح عليا دورى"
فقلت له اتفضل ودورك محجوز....
الراجل قعد ع الرصيف اللى جنبي وبدأ ينشف العرق اللى مغرقه ورافع ايديه للسما وبيقول "يارب وحياة حبيبك النبي انا مينفعش خالص اعيا انهارده بالذات خد بإيدى بس لحد بكره يارب والنبي"
الراجل كان بيتوسل لربنا انه ميتعبش بطريقه لفتت انتباهى ...قربت منه وسالته "انت كويس؟"
قالى كلمه هزتنى بجد "الحمد لله فى زحام من النعم "
بقوله واضح انك تعبان طيب ماتروح لاقرب دكتور ...
لقيت الراجل عينيه دمعت وهو بيقولى ماينفعش اتعب يا استاذ دى رفاهيه انا مش ادها ...
انا زوجتى متوفيه من 8 سنين وعندى 4 ولاد كبيرهم فى الكليه ومحتاج مصاريف كليته انهارده ووعدته انى هقبض واروحله الجامعه اديهومله ...التلاته التانيين ف ثانوى واعدادى وكتر خير والدتى كانت بتراعى ولادى بعد موت مراتى ...
لكن دلوقت أمى كمان مريضه مرض موت وبراعيها هى وعيالى. ..
انا موظف حكومة مرتبى 2700 جنيه وبشتغل بعد الضهر عامل توصيل مطعم بالفين جنيه وكل ده مش ملاحق ع البيت والولاد والدروس ومصاريف علاج والدتى ....
صاحب البيت كاسر عليا ايجار متأخر وآخر معاد انهارده عشان ياخد نص فلوسه بعد محايلات منى وم الجيران عشان ميرميش عفشي وامى المريضة وعيالى ف الشارع
انا وقفت قدام كلام الراجل مش عارف اقول ايه ....
الراجل عنده كل ده وبيقولى"الحمد لله فى زحام من النعم "
وأنا اللى ظروفي احسن منه مليون مرة متضايق ومخنوق ...كأنه ادانى قلم على وشي وقالى انت جاحد بنعم ربنا ...
المهم بعد ما صرف الفلوس اخدته المستشفي بعد محايلات منى واصريت استناه واوصله بيته بالعربيه ...عشان اتفاجئ بمفاجأة اكبر ...
والدته ف التمانيين من عمرها وكفيفه وراقده على فراش الموت وكل كلامها حمد لله على نعمه وشكر لله على واسع فضله ...
بصيت حواليا اشوف واسع فضل الله اللى بتشكره عليه لقيت بيت عباره عن دور ارضي حيطانه اكل عليها الزمان وشرب وكله رطوبة
الفرش سريرين ودولاب وكنبتين بلدى وحصيره.......
لسه ببص حواليا لقيت الباب بيخبط وطلع كلامه حقيقي كان صاحب البيت عاوز فلوسه وداخل يزعق ويتوعد ويهدد بطرده.....
المهم بعد تدخل منى ورفض شديد من الراجل المحترم ده اللى علمنى درس عمرى
كان رافض تماما انى ادفع الفلوس بتاعة الايجار
دفعت الفلوس لصاحب البيت ومعاهم ايجار سنه مقدم واخدت منه إيصالات الايجار واديتهاله ....
الراجل فضل يعيط زى الأطفال ويقولى " انت طلعتلى منين ؟...انا طول الليل منمتش وعمال اصلى وادعى ربنا يسترنى وماتفضحش قدام الجيران ف الشارع"
قلتله ربنا عطل لك 4 ماكينات صرافه وزحم 6 ماكينات تانيين عشان يبعتنى ليك
وبعتك انت كمان ليا عشان تعلمنى اتأدب مع ربنا ف ابتلائي. ....
#اللهم_حمدا_كثيرا_كما_ينبغي_لجلال_وجهك_وعظيم_سلطانك
_ اذا أتممت القراءة علق بذكر الله وقل الحمد لله على كل حال " #منقووووووووووووول