هجرة النبى من مكه إلى المدينة ملف متعدد

هجره نبينا ﷺ من مكه للمدينه(ج1)

و يستمر النبي عليه الصلاه و السلام يحاول يدور على بلد توافق ان تئويه هو و الصحابه حتى يقدر يبلغ الإسلام للدنيا كلها.. فيذهب لسوق عكاظ و يدخل السوق و يفضل ينادي "من يؤويني لابلغ رسالة ربى " و ده كان وقت الحج و السوق مليان ناس ..وﻻ أحد يرد عليه صلى الله عليه و سلم :') و يذهب لسوق تاني أسمه سوق مجاز (ده كان سوق سنوى) فيفضل يطوف و يقول "من يؤويني لابلغ رسالة ربى " و بﻻ فائدة و يحاول تانى و يذهب النبي لقبيله أسمها "بني عامر" و يقول ﷺ : يا بني عامر أفلا تجلسون أكلمكم فى ما أرسلني به ربي..فيقولوله : تكلم..

فقرأ النبى عليهم القرآن فقالوله: يا محمد هذا كلام حسن..فقال : أتشهدون أنه لا إله إلا الله ..قالوا نعم و لكن بشرط إذا أنت مت ..تجعل لنا الأمر من بعدك ( يعني لما تموت يا محمد يبقى النبي اللي بعدك من عندنا) ف النبى قال لهم "إن الفضل بيد الله يؤتيه من يشاء"..

فقالوا : "ماذا !! أنهدف نحورنا دونك ثم يكون الأمر من بعدك لغيرنا" ( يعنى نبقى تبعك ونحميك ونعرض نفسنا للخطر لأن العرب كلهم هيحاربونا وفى الاخر يكون الأمر من بعدك لغيرنا) وقالوله: قم عنا يا محمد و ألحق بقومك فلا حاجة لنا في دينك ..فيقوم النبى و يمشى وهو حزين صل الله عليه و سلم ومهموم و بجانبه أبو بكر رضى الله عنه ﻻ يتركه ابدا فقاله يارسول الله فى هناك قبيله اسمها بني شيبه و القبيلة دي عريقة فيها راجل أسمه المثنى بن حارثة( كان وقتها لسه كافر) و المثنى ده راجل عظيم فتعال يا رسول الله نذهب لهم و إن شاء الله ينشرح قلبهم للإسلام ..

فيذهبوا سوا لبني شيبه..فعرض النبى عليهم الإسلام فقالوا: ما أحسن هذا الكلام..ففرح النبي ...لكن قالوا و لكننا لا نقطع أمرا حتى نعود إلى سيد القبيلة المثنى بن حارثه ..فقالو للمثنى فقال: يا محمد هذا كلام طيب" فقال النبى ﷺ : يا مثنى أتشهدون أن لا إله إلا الله و تبايعوني على النصرة و الحماية في البأساء و الضراء فقالوا: نعم و لكن بشرط حنحميك و ندافع عنك و حنحارب معاك اللى حيحاربوك إلا الفرس و الروم .. احنا ﻻ نقدر ان نحارب مملكه الفرس أبدا .. فقال النبيﷺ: إن هذا الدين لا ينصره إلا من حاطه بجميع جوانبه.. فقالوا : لأ نحن ﻻ نقدر على الفرس.. قم عنا يا محمد.. فقام النبي و هو زعلان جدا..

و تلف الأيام وحنشوف بعد كده ان المثنى بن حارثة حيسلم و حيبقى أحد أمراء جيش عمر بن الخطاب ويقدر ربنا أن مملكة الفرس مش حتنتهى إلا على أيده و كسرى ملك الفرس مش حيقتل إلا على أيد المثنى و هو اللي حيفتح حصون مملكة الفرس.. و يبكي و يتلوا القرآن ويقول الآيات دى: "كَمْ تَرَكُوا مِن جَنَّاتٍ وَعُيُون*وَزُرُوعٍ وَمَقَامٍ كَرِيم*وَنَعْمَةٍ كَانُوا فِيهَا فَاكِهِينَ*كَذَٰلِكَ وَأَوْرَثْنَاهَا قَوْمًا آخَرِين"..و يبكى و يقول صدق رسول الله..
طيب حاليا المثنى رفض انه يحمى النبى واصحابه.. فيمشى النبىﷺ ف يرى شاب صغير إسمه "سويد بن الصامت" و قبيلته واقفه على جنب مش مركزين معاه ..

فقام النبي راح له فقال النبي "ما أسمك يا فتى؟" ققال "سويد بن الصامت" قال "يا سويد أتجلس أكلمك؟" قال "أجل" قال "يا سويد إني نبي من الله و معى كتاب من الله تبارك و تعالى" فقال سويد "حقا! .. لعل الذي معك كالذي معي" قال النبى "ما الذي معك ؟" قال "معي ورق لقمان (الحكيم لقمان)" كتاب صغير فيه حكم لقمان .. فالنبي مسكها يقراها قال "أجل هي ورق لقمان ولكن الذي معى أفضل منها" فقال سويد: إقرأ علي.. فقرأ النبي القرآن فعيون سويد دمعت و قال "والله هذا قول حق .. أنا معك يا محمد" ويبتدى يأسلم ..قالقبيله أخدت بالها وحضرت بسرعة و جزبوه من مﻻبسه و قالوله "أسلمت ياسويد؟..انت اتجننت! فقال سويد : والله إن هذا لا يقول إلا كلام من عند الله تبارك و تعالى.. فأخدوا سويد و جروا بيه و أتقتل سويد :') ♡.. و علماء الدين قالوا "ان سويد اسلم و مات على الإسلام ..

و يمر النبي بعد كده على شاب تانى إسمه "إياس بن معاذ" و كان واقف جنبه أبوه و عمه فيقوله "ما أسمك ياغلام" فيقول "إياس بن معاذ" فيقوله "أفلا جلست أكلمك" قال "بلى" و عرض عليه الإسلام .. فعجب إياس الإسلام .. فقال هذا كلام طيب يا رسول الله فهل أتبعك؟.. فيبتدى النبي يعلمه و النبي فرحان جدا...فأبو إياس أخذ باله .. فقال : ما تفعل يا أياس.. أتبعت محمداً ؟ فنحنى و واخذ حفنة تراب و رماها في وجه إبنه .. و على صوت أبو إياس و عمه على النبى و قالوا: أذهب عنا يا محمد .. ورجعوا بلدهم و يشاء ربنا ان تقوم حرب فى قبيلتهم و يموت إياس بن معاذ .. فالصحابه قالوا: "و الله سمعنا إياس يصرخ قبل ان يموت و يقول سبحان الله .. الحمدلله .. لا إله إلا الله و جعل يقولها حتى قُتل فوجدناه مات مسلمآ ..

فالنبي صلى الله عليه وسلم خلاص تعب جدا .. حاليا نحن فى سنة 11 من البعثة بمعنى النبى نزل جبريل عليه من 11 سنه و نحن في آخر يوم في منى في آخر مناسك الحج و القبائل هترجع لبلادها .. فالنبي كان أول واحد يذهب "منى" و آخر واحد يمشي منها.. كان بيسعى لعله يقدر يهدى أى حد.. النبي خلاص غير قادر ..بيجمع حاجته وماشى..فينظر على خيمه جنبها 6 شباب جالسين يضحكوا .. أكبر واحد فيهم عنده 23 سنه إسمه "أسعدَ بن زُرَارَةَ" فيذهب لهم النبي عليه الصلاه و السلام فيقول "السلام عليكم يا معشر الشباب .. هل أجلس أكلمكم؟" هما كانوا بيقصوا شعرهم فقالوا: طيب أجلس..

فجلس النبي ففضل يكلمهم عن الإسلام .. فتركوا اللي في إيدهم و بدأوا يركزوا مع النبي ..فالنبي شاف في عنيهم خير فقرأ عليهم القرآن فدمعت عينيهم و بدأوا يتأثروا بكلام النبي و فضل النبي يقرا و يقرا و كل ما يقرا بتأثروا أكتر فقالوا :"إنا نتبعك يارسول الله .. نشهد أن لا إله إلا الله و أنك رسول الله " فقال النبي :"من أين أنتم يا معشر الشباب؟" قالوا "نحن من أهل "يثرب"(يثرب اللى حتتسمى فيما بعد المدينه).. و قالوا للنبي: تعالي هاجر عندنا والله لا نتركك أبدا فقالوا نحن معك و نحميك يا رسول الله .. لكن النبي رفض وده لأن النبي خايف ان ده يكون حماسة شباب فالنبى ميقدرش يجازف و يؤذي الصحابه اللي بيتعذبوا في مكه فيذهبوا ويتعذبوا هناك في يثرب فكان لازم يتأكد ..

فقال للشباب: لن أذهب معكم أنا و أصحابى و لكن عودوا إلى يثرب و تعالوا مكه العام القادم .. النبي كمان بيختبرهم .. ولو ثبتوا ..ساعتها حيفكر يهاجر ليثرب .. فقالوله:حاضر يا رسول الله.وتعدى السنه و تيجي سنة 12 من البعثة و يرجعوا الشباب للنبي بعد ما اصبحوا 12 شاب(شايفين كانوا 6 اصبحوا 12) اللي نصر الإسلام شباب .. اللي وقف الاسلام على رجليه شباب.. اللى سهل ان النبى والصحابه و الإسلام يبقى فى المدينه(يثرب) هم الشباب.. المهم حضروا للنبي و قالوا: أسلمنا يا رسول الله ..و دول حيتسموا هم و أهلهم بالأنصار و حيحبهم النبى جدا و كان الرسول بيقول لولا الهجرة (من مكه ) لكنت امرءآ من الأنصار و يقول: اللهم ارحم الانصار و أبناء الأنصار و أبناء أبناء الانصار ..و يقول "من أحبني أحب الانصار و من أبغضني أبغض الأنصار ..و يقول لهم "المحيا محياكم و الممات مماتكم" المهم حضروا الشباب وقالوله بقينا 12 يارسول الله تعالى معنا إلى يثرب
فالنبى رفض تانى .. طب ياترى ناوى على ايه ؟

هنعرف سوا بكره إن شاء الله

هجره نبينا ﷺ من مكه للمدينه(ج2)

شفنا المره السابقة عرض النبى صلى الله عليه و سلم الإسلام علي 26 قبيله من قبائل المدينه فرفضوا لكن اسلم 6 شباب من اهل يثرب و معاهم 6 كمان فاصبحوا 12 و طلبوا من النبى انه يحضر معاهم ليثرب فالنبى رفض و قالهم: ﻻ ينفع اهاجر انا و أصحابى معاكم حاليا لكن انا هرسل معاكم واحد من الصحابه وظيفته إنه يعلمكم الإسلام و الصلاه والقرآن و يدعوا كل أهل يثرب للإسلام ((فلو أسلمت يثرب يبقى الصحابى ده انقذ كل الصحابه في مكه و لو منجحش هتبقى يثرب دي صفحه و اتقفلت زي ما شفنا فى " الطائف"كده)) طيب مين الصحابي اللى حيسافر ؟

اسمه سيدنا مُصْعَبُ بنُ عُمَيْرٍ كان عنده 25 سنه..

سيدنا مُصْعَبُ كان بيقول "لأن أزيل جبلا كان اهون" اصل مُصْعَبُ بنُ عُمَيْرٍ كان حاسس انه شايل مسؤلية الإسلام...هيطلع من مكه مصعب و معاه 12 شاب و يلقب بأول سفراء الإسلام.. و حيدخل مُصْعَبُ بنُ عُمَيْرٍ المدينه وكانت اسمها "يثرب" يعنى من التثريب يعنى نفور الناس منها بسبب الأمراض اللى كانت منتشره فيها.. لكن لما دخلها النبي صلى الله عليه وسلم سماها "طيبة" فكانت طيبه مباركة ببركة النبي .. طيب حاليا مُصْعَبُ دخل المدينه مع ال 12 شاب و قعدوا فى مكان آمن ليتجمعوا فيه زى دار الارقم كده..

فنزلوا عند واحد من الشباب السته الاولانيين اللى اسلمو اسمه أسعدَ بن زُرَارَةَ و ده اسلم وعمره 23 سنه ومات وهو عمره 25 سنه ..المهم استمر "مصعب بن عمير" يعلم الشباب القرآن و كان "سعد بن معاذ"سيد يثرب ونائبه كان اسمه " أُسَيْد بن الحُضَير" ( قبل إسلامهم) ، سعد بن معاذ استغرب و لام علي أُسَيْد بن الحُضَير أن إزاى يدخل مُصْعَبُ ليثرب و أتفق مع أُسَيْد بن الحُضَير علي قتل مصعب .. لان اسعد ابن زرارة ابن خال سعد بن معاذ فمينفعش سعد يقتل ضيف من ضيوفه ( كان عندهم مبادىء )

فذهب أُسَيْد لمُصْعَبُ و هوه رافع سيفه وقال له : ان كان لك حاجه في نفسك فقم من هنا و إلا ضربت عنقك..فرد مُصْعَبُ و قال اسمع مني و فضل يقرأ القرأن و اسيد نزل سيفه ثم اتكا عليه ثم بكى و الشباب اللى كانوا جالسين معاهم قالوا و الله رأينا نور الاسلام في وجه أسيد بن حضير..فسأل أُسَيْد مصعب ماذا يفعل ليدخل في الإسلام فرد مصعب بشهاده انه لا إله إلا الله وأن محمد رسول الله ..فقالها اسيد ..أصل القرأن يخترق القلوب مهما كنت بس المهم صدق النية ..اُسَيْد قال : ان في المدينه رجل لو اسلم لأسلمت المدينه كلها كان يقصد مين؟ يقصد سيد يثرب "سعد بن معاذ" المهم اتفقوا علي خطه .. اصل سعد بن معاذ كان راجل قوي.. زى عمر كده .

رجع أُسَيْد لسعد بن معاذ وقاله ان مصعب عايز يقتل أسعدَ بن زُرَارَةَ فطبعا بسرعه جرى سعد و وصل لعنده فوجد أسعدَ بن زُرَارَةَ في آمان فعرف ان دى كانت لعبه من أفعال أُسَيْد وقال سعد لمصعب ان كان لك حاجه في نفسك فقم من هنا ف مصعب قرأ القرأن و تأثر سعد واسلم .. و بعد ما اسلم سعد بن معاذ ذهب لقبائل المدينة وهو اميرها و قال لهم: كلامي من كلامكم حرام أما تعرفون حبي لكم!(هددهم انه حيقاطعهم ) و قال أما تعرفون خوفي عليكم فأرضي عليكم حرام حتي تشهدوا أن لا إله إلا الله وأن محمد رسول الله فشرح الله قلوبهم للإسلام فأسلموا..

و بسرعه على مكه يرسل مصعب للنبي يبشره بالخبر ..فكلف النبي عليه الصلاه و السلام مصعب بإنه يرجع ليثرب و يحضر مجموعه من مسلمين يثرب لمكه و ان ده يحصل فى الخفا ..فأختار مصعب 75 رجل من قبائل مختلفه من يثرب فخرج المسلمين من يثرب (المدينه) ومعاهم أمرأتين وتم الخروج في موسم الحج وطبعا الحج زمان كان فيه كفار ومسلمين ..و واحده من الستات الاتنين دول اسمها نسيبه بنت كعب أو (ام عماره ) و دى بقى حنشوف بعد كده أنها ست عظيمه و دافعت عن النبي يوم غزوة أحد فضربها واحد كافر على كتفها كذا مره فأتكسرت عظام الكتف بتاعتها و كمان أم عماره دى تبقى أم حبيب ابن زيد ده اللى حيعذبه مسيلمة الكذاب(ده اللى قال على نفسه رسول).. و مسيلمه كان عايز حبيب يشهد انه رسول فرفض حبيب و ثبت على الاسلام و ان محمد عليه الصلاه و السلام هو النبى الخاتم و كان يسخر من مسيلمه و كان يقوله إني اصم لا اسمع ماذا تريدنى ان اقول؟ ماذا ^_^ ؟ فمسيلمه فهم ان حبيب بيعند فقتله :') ♡

الست التانيه كانت اسماء بنت عمرو أبنة عمة معاذ بن جبل ده اللى حيجى يوم القيامه حامل لواء العلم (يعنى رايه العلم) .. معاذ بن جبل ده اللى النبى صلى الله عليه وسلم حيطلب منه بعد كده زى ما حنشوف انه يسافر لليمن لنشر الاسلام وقاله : لعلك لا تلقاني بعد ذلك.. :'( النبى كان حاسس انه حيموت و كان ده قبل موت النبى بسنه ..و لما حيعرف معاذ ان النبي تعبان حيجرى على المدينة لكن حيكون فات الاوان و النبى حيكون مات.. فصدق رسول الله و فعلا كانت اخر مره حيشوفه فيها زى ما قاله..

المهم خرج المسلمين ال75 من يثرب إلى مكه في "بيعة العقبة الكبري" حيبايعوا و يعاهدوا النبى على دخول الإسلام وهم من قبائل مختلفه زى الاوس و الخزرج و دول كان بنهم حروب لكن لما اسلموا.. ربنا ألف بين قلوبهم.. و خرجوا وسط الحجاج اللى رايحيين لمكه و فى واحد اسمه عبد الله بن حرام و ده كان راجل كبير فى السن من ساده القبائل في يثرب..

فواحد قاله: يا عبد الله انك سيدنا وقائدنا و احب الناس الينا والله اني أخشي عليك ان تموت علي هذا الشرك فتكون حطب لنار جهنم فأسلم عبد الله بن حرام و حيستشهد بعد كده زى ما حنشاهد فى غزوه احد و ده اللى ربنا حيكلمه بغير حجاب ..المهم وصل الحجيج لمكه واعطي مصعب تقريرا مفصلا للنبى عن كل الأحداث.. طيب ها يا رسول الله مطلوب إيه تانى؟

نكمل بكره إن شاء الله

هجرة نبينا ﷺ من مكه للمدينه(ج3)
#بيعه_العقبه_الكبرى

شاهدنا اﻻمس أن الحجيج و فيهم اهل يثرب " المدينه" و صلوا لمكه و اعطي مُصْعَبُ تقريرا مفصلا عن كل الاحداث وطلب النبي من مُصْعَبُ و اللى معاه انهم يؤدوا مناسك الحج كلها ومقابله النبي لهم حتبقى في أخر يوم بعد تأديه مناسك الحج وحيتقابلوا عند منطقه اسمها العقبه .. و النبي ارسل للناس ووصاهم : ان الناس تأتى واحد ورا واحد و ﻻ احد يوقظ التانى من النوم..من قام من نومه يحضر و النائم يترك نائم لأن ﻻ ينفع حد ينبهه و يوقظه.. وال75 مسلم فعلا ماشيين على اطراف صوابعهم حتى ﻻ يحس بيهم احد..

فأجتمع المسلمون فى مكان داخلي حواليه الصخور وده كان فى اخر يوم فى الحج حتى ﻻ تشعر بهم قريش... تنبيه(( وانت مكسل فى السرير عن صلاه الفجر.. افتكر ان اللى نام راحت عليه مقابله رسول الله.. اوعى تنام عن صلاه الفجر اوعى تتاخر عن مقابله ربنا و عن طريق النبى :') ♡) و أخيرآ دخل رسول الله عليهم و كأن الشمس طلعت و نزلت الدموع وعجزت الألسنه عن التعبير عن حب النبي صلى الله عليه و سلم ( :') ♡

و دخل العباس ( لم يسلم بعد و ده عم النبى عليه الصلاه و السلام ) و بدأ العباس الكلام و قال : يأهل يثرب انكم تعلمون قدر محمد فينا والله إنا قادرون علي حمايته ولكنه أبي (رفض) إلا الإنحياز إليكم فإن رأيتم أنكم خاذلوه فاتركوه من الآن نحن اولي به ولو رأيتم انكم ناصروه فخذوه (العباس عارف سر التحالف مع اهل يثرب و امر الهجره رغم انه كان كافر ساعتها و ده لأنه كان حابب ياخد دور ابو طالب اخوه بعد وفاته و يكمل مسيرته و يصبح سند للنبى و لعل كلامه ده و وقفته دى كانت سبب ان ربنا الشكور يشكره ويمن عليه بالإسلام بعد كده ) ..فرد البراء بن معرون و قال : تكلم يا رسول الله فداك ابي وامي قل ما شئت.. فتلا القرآن، ودعا إلى الله ورغب في الإسلام ثم قال:
1-تمنعوني كما تمنعون أهلكم واولادكم.. اي تحموني.. قالوا نعم يا رسول الله موافقين :')..2-الامر بالمعروف والنهي عن المنكر.. فقالوا أجل ..3- السمع والطاعة يعنى التنازل والتضحية قالوا نعم ...4- تنفقوا في السراء والضراء فقالوا أجل..5-لاتأخذكم في الله لومه لائم اي الخوف من الله (كل الطلبات دى مش لنفسك يا رسول الله كلها لتبيلغ الدعوه لعبادة الله الحق .. كل ده ﻻجلى و واجلكم)

فقال الهيثم : عندي استفسار يا رسول الله :إن بيننا وبين القوم حبال وإلا قاطعوها يا رسول الله رأيت إن أظهرك الله وفتحت مكة اتتركنا وتعود؟ بمعنى(الهيثم بيقول للنبى احنا بينا و بين البلاد معاهدات و مواثيق و اكيد حتنقطع عشان احنا اخترنا اننا نبقى معاك..الهيثم مش خايف..الهيثم عايز يقول احنا حنرتبط بيك اوى اوى يا رسول الله ♡ فياترى لو انتصرت على كفار قريش. حترجع مكه و تتركنا؟ :'( ) فدمعت عين الرسول الشريفة وقال: لا والله بل الدم الدم والهدم الهدم والممات مماتكم والمحيا محياكم من احبكم احبني ومن أذاكم أذاني انتم مني وانا منكم (يعنى حعيش معاكم و حموت معاكم) ..

فقال أسعدَ بن زُرَارَةَ : يأهل يثرب اننا لم نضرب اعناق الابل الا ونحن نعلم انه رسول من عند الله تعالى..أيها الناس فإن تأخذوه فلا تخذلوه واعلموا ان اخراجه مفارقه العرب وقتل خياركم فانظروا في امره لو كنتم خاذلوه فاتركوه الآن ..فقال رجل يا أسعدَ : والله لو امرتنا ان نميل بأسيافنا علي اهل مني( يعنى نحارب كل اللى فى مكه واللى جى من بره مكه كمان) نميل و نحارب ..فقال سعد بن مُعاذ : يا رسول الله صل حبال من شئت و أقطع حبال من شئت (المعاهدات اللى بنهم و بين البلاد ..يعنى اللى عايز توصله اوصله و اللى عايز تقطعه أقطعه) و سالم من شئت و عادي من شئت وقاتل من شئت و خذ ماشئت والله فيكون الذى اخذته منا احب إلينا مما تركته لنا

(الله شوفتوا كلام سيد يثرب سعد بن مُعاذ !! بس بسألكم دلوقتى. مين منكم ورا النبى.. مين منكم يدافع عن النبى بنشر سيرته و اخلاقه ويمحى الجهل و الصوره السيئه عن الإسلام .. مين منكم حيحرم على نفسه اللى حرمه النبى .. مين منكم حيبدأ يعمل طاعات و يسمع كلام النبى.. مين حينوى وحيحاول و ربنا حيوفقه طبعا ؟ كام سعد على البيدج دى ياترى :') ♡ ) .. المهم بعد ما وافقوا على طلبات النبى قالوا : وماذا لنا يا رسول الله في المقابل ؟ فقال صل الله عليه وسلم: الجنة ..فقالوا ابسط يدك نبايعك يا رسول الله فتتسابق الناس علي كف رسول الله كأن اللى حيمسك ايه الأول حيدخل الجنه..

على فكره حنشاهد بعد كده يوم غزوه حنين ان اهل يثرب (اهل " المدينه "و حيتسموا بالأنصار لانهم نصروا و وقفوا جنب النبى وحموه) بأنهم لاقوا ان رسول الله اعطي الغنائم اللى خدوها من الغزوه للمهاجرين (للمسلمين اللى هاجروا من مكه ليثرب "المدينه" ) و لم يعطي النبى اى غنائم للأنصار.. فزعلوا و سألوا رسول صلى الله عليه وسلم فرد عليهم وقال: اما ترضون ان يرجع الناس بالشاه والبعير وترجعون انتم برسول الله ♡ ..ففرحوا جدا جدا ..
المهم خلصت كده بيعه العقبه الكبرى و كان ده وقت الفجر و فجأه سمع الناس صوت بيقول : ادركوا محمد( ألحقوا محمد) حيهاجر مع اهل يثرب ..فالنبى بص و قال ذلك صوت الشيطان ..فبسرعه كله اتحرك و دخل على الخيام ..

ودخل كفار قريش خيام الحجيج وقالوا هل رأي احد محمد البارحة فكان المسلمين بيكتموا نفسهم عاملين نفسهم نايمين فأتكلم عبد الله بن سَلول و قال : ما قابل احد من هذا المجتمع محمد ..فمشيت قريش و عدت على خير (على فكره عبد الله بن سَلول ده مسلم منافق حنعرف ده بعده كده).. المهم حضر واحد اسمه الطفيل ابن عمرو الدوسي وقال : أبشر يا رسول الله اسلمت دوس فرد النبي وقال إن الله اختار المدينة (يثرب) و حنهاجر هناك..

نكمل بكره ان شاء الله

هجرة نبينا ﷺ من مكه للمدينه (ج4)

امس تعاهد اهل يثرب مع رسول الله على نصرته و حمايته ..هم الأنصار والنبى عليه الصلاه و السلام قال لأهل مكه : أيها الناس لقد اذن الله لكم بالخروج لقد جعل الله لكم فرجاً و مخرجاَ أرضاً تأمنون بها و اصحاباً تأمنون في ارضهم .. و يفرح الصحابة ..و يبدأ الصحابه من اهل مكه فى الهجره إلى يثرب"المدينه" والنبي عليه الصلاه و السلام وصاهم بالهجره واحد واحد او اتنين اتنين.الهجرة مش شيء بسيط هم مش طالعين رحله يومين و راجعين.. ده اللي حيهاجر حيترك اهله و اصحابه و تجارته وبيته .. وحياته..و مجتمعه.

حيترك الدنيا كلها ليذهب لبلد جديدة و لا ضامن المكان اللي حينام فيه و لا الاكل اللي حياكله.. في الطريق ده ممكن يتقتل فى الطريق .. و الصحابه مهاجرين و معرضين نفسهم لكل ده ليه؟ طاعة لله و رسوله ..الصحابه ضحوا والله يا جماعة الصحابة ضحوا تضحيات كبيره..و الله ما في بشر علي وجه الكرة الارضية بعد النبى محمد ضحي كما ضحوا.. فالهجرة مش رحلة او نزهة الهجرة تضحية ..((ده لو احنا حد قال لحد فينا يلا لازم تعزل وتترك بيتك حيقعد يبكى و يقول بيتى و مكتبى و ذكرياتى و سريرى اللى برتاح عليه))..

فالهجرة كانت تضحية ليس بعدها تضحيه فتبدأ الهجرة و يبقى كله يهاجر إلا رسول الله لانه طبعا عمره ما حيقدر يمشى غير لما يطمن على المسلمين كلهم انهم فى امان ..و يبدأ المهاجرين فى الهجره للمدينه واحد اسمه ابو سلَمَه و مراته و ابنهم سلَمَه و تخرج ام سلَمَه مع زوجها و ابنهم ..و فجأه تحس بيهم قريش و تمسكهم .. قريش عامله مراقبه شديده على مكه.. لا حد حيدخل و لا حد حيخرج و اللي حيخرج حنمنعه بكل الطرق إلا لو اسرته بتحميه زي ابو سلَمَه كده.. اصل قريش لما مسكت ابو سلَمَه وزوجته و ابنهم الصغير فأهل زوجته سألوه : إلى أين يا ابو سلَمَه ؟ فرد عليهم و قال: مهاجراً الي الله و رسوله فقالوا له: لماذا تأخذ ابنتنا؟ فيشدوها منه فتصرخ ام سلَمَه فأبنها يتعلق فيها و يجري مع امه و تغضب عائلة ابو سلَمَه و يقولوا مش حنترك حفيدنا عندكم و ياخدوا الولد من امه ..

فيشدوا دراع سلَمَه الولد الصغير فدراعوا يتخلع و يبدأ يصرخ من الألم..اهل امه بيشدوه من ناحية و اهل ابوه بيشدوه من ناحيه.. و يضطر ابو سلَمَه يهاجر لوحده و يستودع زوجته و ابنه في الله و يتركهم لله عز و جل.. طيب ليه يا ابو سلَمَه تتركهم ؟ لأن وقتها الهجره كانت فرض و الهجرة كانت صعبة ..و كان من ﻻ يهاجر كان يصبح عاصي..فيخرج ابو سلَمَه و يستودعهم الله و تأخذ ام سلَمَه و تعيش مع اهلها..و يتاخد سلَمَه الولد الصغير و يعيش مع اهل ابوه و يتعالج الولد.. و بتحكى ام سلَمَه و بتقول: ظللت ابكى والله سنه..( اي أم تتحرم من ابنها لمده سنه ده بلاء و ألم كبير) ..

و كانت ام سلَمَه بتذهب عند المكان اللى أتاخد منه أبنها و تجلس تبكى عليه و على ابو سلَمَه طول اليوم من الفجر للمغرب.. جلست تبكى سنه الى ان مرت السنه الصعبه هذه فمر عليها رجل من قرايبها و رأها ا وهى بتبكى فذهب لأهلها و قالهم: اتركوها تذهب لزوجها و اجعلوهم يرجعولها ابنها و قال : إلى متي تتركون هذه المسكينة لقد سئمنا من صوت بكائها اتركوها ..فذهبوا فعلا و قالوا لها : أخرجي الي زوجك ان اردت، فقد سئمنا من بكائك..

و مشيوا وأحضروا لها ابنها سلَمَه فبتقول: كنت غير مصدقه نفسى من الفرحة و بسرعه أخذت ابنى و جريت بيه، أصلها كانت خايفه يرجعوا فى كلامهم فجريت من غير اكل و لا فلوس، وهتبدء تخرج من مكة ..فقابلها رجل اسمه عُثْمَانَ بْنَ طَلْحَةَ ده كان وقتها لسه كافر بس شهم

فقالها: إلي اين يا ام سلَمَه .. فترد وتقول : أفر و أهرب بديني منكم و ألحق بزوجي في المدينة، فينظر لها و يقولها حتسافري لوحدك علي الجمل بتاعك من مكة للمدينة!! ((تخيلوا معى اللى هي قررت تعمله .. مسافرة كدا علي جمل من مكة للمدينة صعب جدا يا جماعة .. ده متعب نفسيآ و إجتماعيا بالنسبه للعرب كمان..)) يقول عُثْمَانَ بْنَ طَلْحَةَ : يا ام سلَمَه تسافرى وحدك .. من معك؟ قالت الله.. ليس معي سوي ربي و ابني هذا..

فبتقول ام سلَمَه : فأخذ بخطام ناقتي و مشى بي من مكة إلي المدينة و والله ما رأيت رجل اشرف و لا أكرم من عُثْمَانَ بْنَ طَلْحَةَ فكان اذا تعب و اراد ان يستريح... اناخ لي الجمل ..و يصدر صوت (زى احم احم) و اناخ الجمل ثم يذهب و يربطه في عمود شجرة من الشجر و يختبأ خلف شجرة ليستريح..((( وطبعا بيعمل كده عشان تبقي براحتها ومتبقاش مكشوفة قدامه)))..و بتقول :فيتركني فإذا اراد ان يعود عاد بظهره (حتى ﻻ ينظر اليها) و اصدر صوتاً و مسك بخطام الناقة و قال اركبوا: (يعني بيقول لأم سلَمَه اركبي) فتركب أم سلمه..

و تقول : والله ما نظر الي نظرة واحدة فما رأيت اكرم من عُثْمَانَ بْنَ طَلْحَةَ و لما وصلنا الي المدينه قال : يا أم سلَمَه ها هنا زوجك ..ادخلى..و ترك الناقة و رجع،
(رأيتوا عُثْمَانَ بْنَ طَلْحَةَ عنده شهامة .. دى رجولة ملهاش دعوة بالدين لانه كان كافر وقتهاا.. بس علي فكرة ربنا حيكافئ عثمان مكافئه غير عادية؟

حنعرفها بكره ان شاء الله

السلام عليكم .. الحلقه طويله نوعا ما دمجت فيها حلقتين ( 63 و64 ) للاسف الحلقه تحوي قصص
هجره نبينا ﷺمن مكه للمدينه(ج5و6)

رأينا شهامه عُثْمَانَ بْنَ طَلْحَة "قبل إسلامه" مع ام سلَمَه و هو بيرفض انها تهاجر للمدينه لوحدها و فعلا أخذها للمدينه و ام سلَمَه بتحكى و بتقول : والله انا متأكده ان ربى الشكور سيشكره على ما فعل.. طيب كافئ عثمان بإيه؟ بصوا عُثْمَانَ بْنَ طَلْحَة من قبيلة اسمها بني شيبة.. عارفين من هم؟ هم اللي معاهم مفتاح الكعبة لحد النهاااارده.. عثمان بن طلحه حيقف يوم فتح مكة و كان اسلم خلاص الحمد لله و وفى الرسول بوعده معاه وترك المفتاح معاهم ..وقال صلى الله عليه و سلم :يا بني شيبة لن نأخذ منكم مفتاح الكعبة ..فهو لكم .. لا يأخذه منكم إلا ظالم.. ولحد النهاردة المفتاح معاهم وحيفضل معاهم ليوم الدين..

طيب هاجرت ام سلمه و وصلت بالسلامه.. حيخرج مين كمان؟ حيخرج صحابي اسمه صُهَيْبُ الرومي كان عمره حوالى 25 سنه شاب مرفهه و غنى جدااا . فأسلم (فاكرين التعذيب اللى اتعرضله وقت إسلامه؟ لما كان كفار قريش يشدوه من شعره و يغرقوه فى ميه سخنه و اول ما يحسوا انه خلاص حيموت فيطلعوه) المهم قرر
صُهَيْبُ يهاجر اتباعآ لأمر النبى بالهجره من مكه للمدينه.. و صُهَيْبُ كان مهاجر ب 12 جمل عليهم أكل و شرب و فلوس وكمان لابس لبس شيك جدا و متعطر بعطر جميل (العدد ده معناه انه مليونير ).. فيطلع عليه كفار قريش فيقولوا له: إلي اين يا صُهَيْبُ فيقول مهاجراً إلى الله و رسوله..فبدأت قريش تفكر تأذيه و تمنعه، فقالوا له: أتخرج بكل هذا المال؟ لقد دخلت مكه صعلوكآ فأخرج يا صُهَيْبُ كما دخلت ..(( فعلاً هوه دخل مكه و كان فقير.. بس ده ميعيبوش لأنه اشتغل و كسب و قدر يعمل ثروه بمجهوده).)

فالمهم صمموا و قالوا: أخرج كما دخلت صعلوكآ يا صُهَيْبُ و إلا سنمنعك من الهجرة (هم طبعا قالوا اكيد هيرفض يترك ماله ويهاجر.. هم هدفهم انهم يضغطوا عليه حتى ﻻ يهاجر) فرد صُهَيْبُ عليهم و قال: يا معشر قريش أرأيتم إن دليتكم علي المكان الذي دفنت فيه باقى مالي أتتركونني ؟ فقالوا : أجل.. فقال : إما أن تأخذوا المال و تتركونى.. فإن أبيتم ذلك و قررتم ان تقتلوني فوالله لأخرج ما معى من سهام و أفرغها عليكم .. يا معشر قريش تعلمون أني من أرماكم، والله لا تصلون إليَّ حتى أرميكم بكل سهم معي، ثم أضربكم بسيفي ما بقي بيدي منه شيء " . .. المهم طبعا قرروا يخدوا المال و ذهبوا على الوصف اللى وصفه واخذوا المال.. و بعدها نظروا على الجمال ال12 اللى معه و قالوا له : و ماذا عن تلك الجمال فلن نتركك تأخذها ابدا .. فقال صُهَيْبُ : خذوا الجمال.. ((شايفين التضحيات و بياخد قرارات سريعه ازاى!))
فقالولوا له بكل إستهزاء: الآن اذهب يا صُهَيْبُ و هاجر كما امرك محمد..
بس تضحيه صُهَيْبُ مش ببلاش ابدا والله ..تعرفوا ان لما وصل للنبى بعد كل اللى عملته قريش مع صُهَيْبُ.. قام النبى قال إيه؟ قال النبى : ربح البيع ابا يحي..ربح البيع ابا يحي..(دى شهاده من رسول الله ان ربنا حيعوض صُهَيْبُ بكل اللى خسره اضعاف اضعاف ف الدنيا و الاخره كمان) وينزل في صُهَيْبُ الرومى الأيه : "وَمِنَ النَّاسِ مَن يَشْرِي نَفْسَهُ ابْتِغَاءَ مَرْضَاتِ اللَّهِ وَاللَّهُ رَءُوفٌ بِالْعِبَاد" ..

و يجى ميعاد خروج زينب بنت محمد رسول الله صلي الله عليه و سلم .. و زينب كانت حامل في الشهر السابع و خرجت و هي راكبة علي الناقة بتاعتها رضي الله تعالي عنها و ارضاها..

فترصدها قريش و تخرج وراها قريش فيجى واحد اسمه هبّار بن الاسود (قبل إسلامه) يحاول يمنعها من الهجره للمدينه فيبدأ يضرب الناقه بتاعتها بالسهام..فبدأت الناقة تتحرك و تجرى جامد ..فوقعت زينب.. فجالها نزيف حااد حاامل فى السابع .. وفضلت زينب تصرخ من الألم ..و قريش من المنظر ده بدأت قريش تخاف و تقلق انهم بكده اتورطوا فى مصيبه كبيره فيهدَّد كنانة بن الربيع (اخ ابو العاص زوج زينب ) قريشًا بالقتل بسهامه، إن لم يرجعوا ويتركوا زينب فرجع الكفار عنهما وحملها الي بيت أخيه وظلت هناك حتى بدأت تستعيد قواها بجانب أبى العاص زوجها الذي لا يكاد يفارقها لحظة... فخرج بها كنانة مرة أخري، حتى سلمها إلى زيد ابن حارثة، الذي صحبها حتى أتت بيت أبيها صلى الله عليه وسلم بالمدينة، فاستقبلها المسلمون استقبالا طيبًا حافلا..
طيب يقول علي بن ابي طالب : ظل اصحاب رسول الله يخرجون مستخفين رجلا او رجلين في منتصف الليل يخافون من كل خوف و يخافون من كل نفر من انفار قريش الا رجلا واحدا..سيدنا على بيقول : ما علمت احداً إلا و خرج مستخفياً إلا عمر بن الخطاب .. طب ازاى؟ عمر راح بالليل و أخد الحربة و القوص بتاعه و راح علي الحرم و قال : يا معشر قريش يا معشر قريش ..فكله اتجمع ..فراح عمر قايل : من اراد ان تثكله امه و يُيتم ولده و ترمل زوجته ( اللي عاوز امه يبقي ابنها ميت و مراته تبقي ارملة و عياله يبقوا يتامى) فإنى مهاجرآ الى المدينه عند الفجر.. فليتبعني ^_^

و طلع عند الفجر و مفيش مخلوق قرب منه .. رضي الله تعالى عن عمر عن الفاروق (يفرق الله به بين الحق و الباطل )

نكمل بكره إن شاء الله♡

هجره نبينا ﷺ من مكه للمدينه (ج7) <3

هاجر سيدنا عمر بن الخطاب وكان فى اتنين من صحابه معاه واحد اسمه عياش بن أبى ربيعه والتانى هشام بن العاصى ..و في نص الطريق اتبعتت لهشام بن العاصى مراسيل بتحرضه انه يرجع لمكه و ميهاجرش للمدينه.. وللأسف أستجاب و افتتن و رجع مكه ..أما عياش ابن ابى ربيعه ..ابو جهل قاله: أدرك أمك يا هشام.. لقد نذرت ان لن تستظل من الشمس حتي تعود اليها و إلا تموت..

فطبعا عياش اتخض.. فقام و راح لعمر بن الخطاب و قام قايله : امي يا عمر.. يجب ان ارجع ..فعمر قاله: متصدفش يا عياش.. دول بيكدبوا . فأبوجهل قال لعياش: امك قد نذرت ألا تمتشط (تسرح) شعرها و لا تستحم حتي تعود .. فقام عياش قايل لعمر.. فعمر قاله: يا عياش لئن اكل القمل رأسها فستمتشط.. و ان حرقتها الشمس فستستظل.. بس للأسف عياش صمم وقال : سأبر قسم امى و لى فى مكه مال فسأرجع لآخذه..

فقام سيدنا عمر قاله: سأعطيك نصف مالى و لكن لا تعود إلى مكه ..ستفتتن فى دينك يا عياش.. المهم عياش صمم يرجع عن الهجره و يرجع لمكه تانى.. فقام عمر بن الخطاب قاله : يا عياش خذ هذه الناقه فهى مطيعه و سريعه جدا فإذا رايت غدراً من القوم فاركب عليها و الحق بنا و تلحقنا ان شاء الله (شفتوا قد ايه عمر بيهتم بصاحبه :') ♡ ).. فيركب عياش علي ناقة عمر..

فيروح ابو جهل في نص الطريق قايل لعياش انا ناقتى ضعيفه اوى ممكن تبدل معايا و تديني ناقة عمر.. فيادوب عياش بينزل فقام ابوجهل مكتف عياش و تطلع خدعه و مكيدة زي ما قال عمر بن الخطاب و يوصل عياش لمكه متكتف بالسلاسل الحديد.. فيبدأو يعذبوه فى مكه لحد ما يفتنوه عن دينه و يترك الاسلام..

ورغم كده إلا انهم كانوا بيأنبوا نفسهم.. فكانوا بيقولوا : ما الله بقابل ممن افتتن صرفا ولا عدلا ولا توبة ، قوم عرفوا الله ، ثم رجعوا إلى الكفر لبلاء أصابهم !
و تنزل الأية : "قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيم"..
الأية دى نزلت فى الناس اللى ماهجروش و مأطاعوش أوامر رسول الله صلى الله عليه و سلم فى الهجره من مكه للمدينه..فعمر بن الخطاب فرح بالأية فجاب ورقة و كتب عليها الأية و طبقها و بعتها لمين؟ لهشام بن العاصى.. فيقول هشام: فوصلني الكتاب (الجواب) من عمر بن الخطاب فجعلت أقرأ الورقة و اديرها كى أفهمها ودعوت ربى ان يفتح عليا بفهمها حتي قراتها وفهمتها و ألقى الله فى صدرى ان هذه الأيه نزلت فينا
فقلت و الله ما نزلت هذه الأيه إلا في أنا و أصحابي .. وركب هشام الناقه و هاجر للمدينه و بيقول هشام تاب الله علي فى المدينة ..

قريش توقعت ان اكيد النبي هيهاجر مدام الصحابة كلهم بيهاجروا ..فقريش أتجننت وعملت اجتماع في دار الندوة انهم لازم يمنعوا محمد من الهجره..فقام واحد يقول انا عندي فكرة.. نكتف محمد و نربطه .. فرفضوا و قالوا هيجى قرايبه يفكوه..فقام واحد تانى قال نقتل محمد.. فردوا عليه و قالوا : طب كنا قتلناه من زمان لكن حتيجي بني هاشم تنتقم مننا

فيقوم تالت واحد قايل : نطرده ..فردوا عليه و قالوا: ما ده اللي محمد عاوزه.. يبقى كده مستفدناش حاجة ..فتنزل الأية :وَإِذْ يَمْكُرُ بِكَ الَّذِينَ كَفَرُوا لِيُثْبِتُوكَ أَوْ يَقْتُلُوكَ أَوْ يُخْرِجُوكَ وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِين

نكمل بكره إن شاء الله <3

هجرة نبينا ﷺ من مكه للمدينه (ج <3
الصحبة يارسول الله

شفنا المرة اللى فاتت ان كفار قريش بدأو يستعدوا و يفكروا إزاى يمنعوا رسول الله من الهجره و فى اجتماعهم شفناهم بيفكروا فى وسيله يمنعوا النبى بيها عن الهجره. وفى وسط اقتراحات محدش اقتنع بيها ،يطلع واحد بفكره خبيثة جدا قال : نقتل محمد و نأتي برجل من كل قبيلة و كل راجل منهم يمسك بسيف عظيم..و يهجموا على محمد وهو خارج و ينقضوا عليه و يذبحوه صلي الله عليه و سلم و فعلا كفار قريش وافقوا على الفكره و عجبتهم جدا.. طيب ياترى ليه ؟

اصل لما اكتر من رجل يشترك فى قتل النبى و يكونوا رجال من قبائل مختلفه ده حيخلى دم النبى يتفرق بين القبائل ،فلما تيجى قبيله بنى هاشم "قبيله رسول الله " تنتقم و تقتص فساعتها حتنتقم من مين وللا مين!! .. كده حتضطر تحارب قبائل العرب كلها..و ده طبعا مستحيل.. فساعتها بنى هاشم حتضطر تقبل الدية فى مقتل رسول الله و بكده يبقى كفار قريش نجحوا..فحصل إجماع على الفكره دى و كلهم موافقين.طيب امتي قريش حتنفذ الخطة دي؟ أنهاردة بليل .. انهاردة محمد حيتقتل مش بكرة مفيش وقت خلاص ..

و ينزل جبريل على رسول الله ويقول له : يا رسول الله لا تنام الليلة علي فراشك ان الله قد أذن لك بالهجرة فاخرج يا رسول الله.. فأنهم يدبرون لقتلك الليلة يا رسول الله.. فبسرعة حيخرج النبى علي بيت ابو بكر الصديق فى وقت الظهيره و يكون ملثم صلي الله عليه و سلم و اختار الوقت ده لان الشمس بتكون حاميه اوى فقريش بتبقى جوه بيوتها... فيعرف ابو بكر ان النبى جى عليهم من بعيد فيقول ابوبكر لعائشة (عائشة دى بنت سيدنا ابو بكر رضى الله عنهما ولسه مكانتش زوج لرسول الله)

فيقول ابو بكر: يا عائشه ما جاء رسول الله الا بأمر عظيم(مدام جى فى الوقت ده يبقى فى حاجه مهمه اوى)..على فكره ابو بكر كان كل ما يسأل النبى متى الهجرة..فكان النبى يرد يقوله : يا ابا بكر لا تعجل لعل الله يجعل لك صاحبا ♡..و يوصل النبى لبيت ابو بكر و يقول: أذن الله لنا بالهجره يا ابا بكر..فيبكى ابو بكر و يقول الصحبه يا رسول الله؟.. فيرد صلى الله عليه و سلم : الصحبه يا ابا بكر.. و تحكى عائشه و تقول: لم اكن اعلم ان البكاء قد يكون بسبب الفرح إلا بعد ان رايت ابى يبكى فرحآ بالصحبه مع رسول الله وقت الهجره :') <3 ..

و يخرج النبى صلى الله عليه وسلم ويروح لعلى بن ابى طالب و يخليه ينام مكانه فى الفراش و دى حتبقى عمليه تمويه لكفار قريش... وكمان الرسول عليه الصلاه و السلام كلف على بن ابى طالب بمهمه تانيه انه يرد الامانات لكفار قريش اللى سايبين فلوسهم معاه..اصل كفار قريش مش بيلاقوا حد أمين زى محمد عليه الصلاه و السلام عشان يسيبوا فلوسهم عنده و رغم شدة عدائهم له صلى الله عليه وسلم، إلا انه كان مشغول و حريص قبل الهجره برد الأمانات..
(تخيلوا كده كل دقيقه ممكن يندفع فيها حياه النبى هدر .. ولكن الامانه :') ♡..صدق الله عزوجل..إنك على خلق عظيم يا رسول الله )

نكمل بكره إن شاء الله <3

هجره نبينا ﷺ من مكه للمدينه (ج9) <3

و شفنا امبارح ابو بكر بيبكى من الفرحه لأنه هيهاجر فى صحبه النبى صلى الله عليه و سلم و بدأ يستعد للهجره، و بدأ النبى عليه الصلاه و السلام يحط الخطه بإن على بن ابى طالب ينام مكانه و أعطى النبى البرده الخضراء بتاعته عشان يتغطى بيها على رضى الله عنه .. دلوقتى جه وقت الهجره..بس النبى لسه فى بيته ..وتحصل مشكله كبيره ..قريش جت بدرى..

قريش على باب بيت النبى بالسيوف مستنينو يخرج عشان يقتلوه و ينفذوا خطتهم و مكرهم،لكن الله خير الماكرين.. وينزل وحى للنبى ان ربنا هيخلى غشاوه على عين كفار قريش و حيقدر يعدى منهم ..و يخرج النبى و فى إيده حفنه من التراب و يعدى و هوه بيقرأ الأيه دى:{وَجَعَلْنَا مِنْ بَيْنِ أَيْدِيهِمْ سَدًّا وَمِنْ خَلْفِهِمْ سَدًّا فَأَغْشَيْنَاهُمْ فَهُمْ لَا يُبْصِرُونَ} [يس:9].وبقى يعدى النبى من وسطيهم و يحط فوق راس كل واحد منهم شويه تراب و كفار قريش لا حاسين و لا شايفين .. الحمدلله ..الله على كل شئ قدير ♡

و يعدى النبى بسلام و يروح على بيت ابو بكر و يكون ابو بكر مجهز ناقتين فقال للنبى : يا رسول الله ، إن عندي ناقتين أعددتهما للخروج ، فخذ إحداهما ، فقال النبى : بالثمن (النبى عايز ثواب الهجره كله ..حتى اى مال حيندفع فى السفر عايز يدفعه من ماله الخاص ..ده حال رسول الله لما يلاقى ثواب .. وده لازم يببقى حالنا احنا كمان.. اننا نطمع فى الثواب و لو بتسبيحه واحده و منكسلش عنها، قال تعالى:قُلْ يَا قَوْمِ اعْمَلُوا عَلَىٰ مَكَانَتِكُمْ إِنِّي عَامِلٌ )َ

المهم يخرج ابو بكر و النبى من الباب الخلفى و أتجهوا جنوبًا إلى غار ثور (والمدينة المنورة فى الشمال )، طيب النبى اتحرك و هاجر.. مين لسه واقف مستنى النبى يطلع من بيته ^_^

كفار قريش لسه واقفين و محاصرين البيت فيعدى واحد من الكفار و يلاقيهم واقفين فيقول لهم ..ماذا تنتظرون هنا؟ قالوا: محمدًا.. فقال: خيَّبَكم الله، والله لقد خرج عليكم محمد. (النبى خرج و هاجر من باااادرى.. انتو واقفين على الفاضى) لما كفار قريش عرفوا اتجننوا من الغيظ و اللى جننهم اكتر التراب اللى لاقوه على راسهم ^_^ ..

لان ده دليل ان محمد حط التراب و عدى فعلا من قدامهم و محدش فيهم شافه.. فأكيد دى معجزه.. قام كفار قريش بسرعه حاولوا يبصوا من فتحات فى الباب فلاقوا واحد متغطى بالبرده الخضرا..فقالوا: والله إن هذا محمدا نائم.. فقام واحد منهم اقترح أنهم يقتحموا البيت لكن اعترض معظمهم ..طب ليه؟ اصل يا جماعه الكفار قالوا: والله إنها لسُبة "عيب"في العرب أن يتُحدثَ عنا أنْ تسورنا الحيطان على بنات العمِّ، وهتكنا سترَ حرمتنا...(شايفين الأخلاق..الرسول صلى الله عليه و سلم قال: إنما بعثت لأتمم مكارم الأخلاق.
يعنى كان فى شويه اخلاق ..كان فى انسانيه ..و ربنا اتم علينا النعمه بنزول القرآن و ببعثة محمد خير خلق البريه )

المهم فضل الكفار مستنين للفجر فقام على بن ابى طالب من فراش رسول الله، فلما قريش شافت كده اتجننت.
و أعلنت حالة طوارىء.. و أول قرار اخدوه هو البحث عن ابو بكر الصديق ..لانه صاحب رسول الله..فيجرى أبو جهل بنفسه ومعاه مجموعه من المشركين، وخبط على الباب و فتحت أسماء بنت أبى بكر رضي الله عنها، فزعق ابو جهل وقال: أين أبوك؟ فقالت أسماء : لا أدري. فرفع أبو جهل ايده و ضربها بالقلم لدرجه ان الحلق قطع ودنها و وقع على الأرض ..رضى الله عنها اسماء بنت ابى بكر :')♡

دلوقتى كفار قريش بيراقبوا مخارج و مداخل مكه .. و بدأو يعلنوا عن مكافأه كبيره للى يدلهم عن مكان محمد.. طيب النبى عليه الصلاة و السلام فين دلوقتى؟النبى مع ابو بكر ماشيين حوالى 8 كيلو لناحيه الجنوب لحد ما وصلوا لجبل صعب جدا و طريقه كله طوب اسمه جبل ثور وكان فيه غار فأتسمى بغار ثور..فيدخل ابو بكر الغار قبل رسول الله علشان يطمن ان مفيش فيه ثعبان او اى شئ مؤذى و يبدأ يقطع من هدومه عشان يسد الفتحات اللى جوه الغار عشان لو فيها عقرب او تعبان ..و بعدين يقوله ادخل يا رسول الله ..جميل اوى يا سيدنا ابو بكر.. وتتبقى فتحه عارفين ابو بكر حيعمل ايه؟

ابو بكر حيسدها برجله.. و ابو بكر يخلى النبى يسند راسه على رجله عشان يرتاح شويه.. (وعايزاكو تتخيلوا معايا سبب حنان سيدنا ابو بكر ورعايته لرسول الله حتلاقوا ان السبب هوه رقه و براءه طبع سيدنا النبى و طيبته و تحمله للمشقه و معاملته الجميله اللى بتخلى اى شخص معاه عايز يشيله من على الارض شيل.. و حتفضلوا على مدار السيره حتتعلموا صدق الحب و جمال الصداقه و الوفاء بين رسول الله و ابو بكر)

و بعد ما سد ابو بكر برجله الفتحه.. فيلدغه عقرب ..فأبو بكر يمسك نفسه و ميحركش رجله عشان ميقلقش راحه رسول الله و من شده الألم تدمع عين ابو بكر و تنزل الدموع على خد رسول الله فيصحى و يقول مابك يا ابا بكر؟.. فيقول ابو بكر: أصيبت قدمى يا رسول الله فيتفل النبى (حبه مايه من فمه الشريف) على الجرح المسمم فيشفى ابو بكر بإذن الله..

نكمل بكره إن شاء الله <3

هجره نبينا ﷺ من مكه للمدينه (ج10)
ثَانِيَ اثْنَيْنِ إِذْ هُمَا فِي الْغَارِ <3

كفار قريش قالبين الدنيا على النبى..و بيدورا فى كل حته و فعلا اكتشفوا الطريق اللى مشى فيه النبى عليه الصلاه و السلام وصاحبه ابو بكر رضى الله عنه.. و وصل الكفار للجبل اللى فيه الغار :'( .. و طلعوا الجبل و وقفوا قدام الغار بالظبط.. و الغار صغير اوى.. ابو بكر جوه مش مصدق انهم قدام الغار..فبدأ يتوتر و بقى مضطرب جدا.. اصل ابو بكر مش خايف على نفسه ..ابو بكر خايف على النبى و على الدعوه لدين الله

فبمنتهى القلق بص للنبى و قال : يَا رَسُولَ اللَّهِ، لَوْ أَنَّ بَعْضَهُمْ طَأْطَأَ بَصْرَهُ رَآنَا. (لو حد منهم بس يوطى راسه كده و يبص تحت ..حيكشفنا )و يرد النبى و هوه قاعد فى سكينه و يقول : "يَا أَبَا بَكْرٍ، مَا ظَنُّكَ بِاثْنَيِنْ اللَّهُ ثَالِثُهُمَا".و فعلا الحمدلله ربنا حفظ رسول الله و صاحبه عن الكفار.. يقول الله تعالى:إِلَّا تَنصُرُوهُ فَقَدْ نَصَرَهُ اللَّهُ إِذْ أَخْرَجَهُ الَّذِينَ كَفَرُوا ثَانِيَ اثْنَيْنِ إِذْ هُمَا فِي الْغَارِ إِذْ يَقُولُ لِصَاحِبِهِ لَا تَحْزَنْ إِنَّ اللَّهَ مَعَنَا فَأَنزَلَ اللَّهُ سَكِينَتَهُ عَلَيْهِ وَأَيَّدَهُ بِجُنُودٍ لَّمْ تَرَوْهَا . وهنا اتذكر ابو بكر فى القرآن الكريم و اثبتت صحبته لرسول الله ♡

دلوقتى الرسول صلى الله عليه وسلم حيقعد مع ابو بكر فى الغار لمده ثلاث أيام..و دلوقتى فى ادوار مهمه اوى حيقوم بيها اكتر من شخص منهم . عبد الله بن ابو بكر وده كان شغله المخابرات .كان بيروح كل يوم يروح بليل للغار يبلغهم اخبار قريش ويرجع قبل الفجر .
وعامر بن فُهَيرة رضي الله عنه ده كان مولى ابو بكر الصديق رضي الله عنه..عامر حيرعى الغنم فى الطريق اللى فيه آثار قدم النبى الشريفه و ابو بكر وعبد الله ..عشان يمحى آثار الاقدام وساعتها محدش من الكفار حيقدر يعرف طريقهم..

أما أسماء بنت أبي بكر رضي الله عنها كانت بتاخد الاكل و الشرب و تروح يوميآ الغار لرسول الله و ابوها.. و كان مناسب جدا انها تمسك المهمه دى عشان محدش حيشك فيها ..اصل صعب ان إمرأه تمشى المسافه دى فى الصحرا و خصوصا لو فى الشهور الأخيره لحملها وكانت بتربط الأكل و الشرب بحزام حوالين بطنها وعشان كده سماها الرسول بذات النطاقين وكانت بتمشى المسافه دى وتطلع الجبل الصعب ده لمده 3 ايام متواصله..

و فى واحد اسمه عبد الله بن أُرَيْقِط
ده حيبقى مع النبى و ابو بكر فى تكمله المسيره للمدينه و حيجيب ناقه تالته، و كمان حيكون معاه عامر بن فُهَيرة و حيكملوا معاهم لحد المدينه بإذن الله..خرج الرسول مع ابو بكر بالليل من الغار .. و اتجهوا ناحيه اليمن و بعدين غربا ناحيه البحر الاحمر و بعدين شمالا فى طريق صعب اوى كله تعاريج و حفر و هنا كان ابو بكر بيعمل حاجه جمييييله اوى .. ابو بكر كان يمشى على يمين النبى و بعدين يلف و يمشى على شماله و يلف و يمشى قدامه و بعدين يلف يمشى ورا النبى :') ♡

فالنبى خد باله فسأل ابو بكر و قال : ما بك يا أبا بكر؟ فرد ابو بكر و قال : يَا رَسُولَ اللَّهِ أَذْكُرُ الطَّلَبَ (ان حد يجيلك من وراك) فَأَمْشِي خَلْفَكَ، ثُمَّ أَذْكُرُ الرَّصَدَ (ان حد يجيلك من امامك) فَأَمْشِي بَيْنَ يَدَيْك.ثم اذكر الميمنه و اذكر الميسره.. شايفين ابو بكر بيحمى النبى ازاى !! كان ابو بكر بيقول للنبى : إِنْ قُتِلْتُ أَنَا فَإِنَّمَا أَنَا رَجُلٌ وَاحِدٌ، وَإِنْ قُتِلْتَ أَنْتَ هَلَكَتِ الْأُمَّةُ.

طيب دلوقتى قريش حتتجنن ، و بتحاول تحفز الناس كلها بالمكافأت انهم يدورا على النبى و كانت المكافأه 100 ناقه يعنى ثروه كبيره جداا .. وكله كان مموت نفسه و بيجتهد عشان يلاقى النبى عشان ياخد المكافأه لكن كلهم فشلوا إلا واحد اسمه سُرَاقَةُ بن مالك .. سُرَاقَةُ سمع من واحد انه شاف النبى و ابو بكر فبسرعه خد فرسه و سلاحه لحد ما قرب من النبى و ابو بكر ، و ابو بكر شاف سُرَاقَةُ بيقرب منهم اكتر بس الحمدلله حصلت معجزه.. إيه هيه؟ رجل الفرس اللى راكبه سراقه عماله تغرس جوه الرمل .. مره و اتنين و تلاته فسُرَاقَةُ فهم ان فى شئ مانعه عن الرسول و ابو بكر فقام قايل: يا محمد أسألك الأمان ..

و فعلا قرب من النبى و قال : ان قريش عامله ديه للى حيمسك بيكم و انا عايزها.. فقال رسول الله صلى الله عليه وسلم: يا سُرَاقَةُ "أَخْفِ عَنَّا" يعنى متقولش لحد انك شفتنا . و بعدين قال له كلام عجيب اوى قال صلى الله عليه و سلم : "كَأَنِّي بِكَ يَا سُرَاقَةُ تَلْبَسُ سُوَارَيْ كِسْرَى ".. (النبى بيقوله حيجى اليوم اللى حتاخد فيه الاساور الذهب اللى كِسْرَى ملك الفرس بيلبسهم فى ايده ) فسراقة بقى مذهول مش مصدق ان ممكن ده يحصل فى يوم من الأيام و مشى سراقه و بدأ يضلل الناس عشان يبعدوا عن طريق النبى و يقول لهم: ابعدوا ..الطريق ده انا دورت فيه كويس اوى بلاش تمشوا فيه مش حتلاقوا محمد.. سبحان الله ربنا سخر سراقه لرسول الله ..قال تعالى: {وَمَا يَعْلَمُ جُنُودَ رَبِّكَ إِلَّا هُوَ} على فكره حتمر الأيام و حنشوف بعد كده بعد فتح مكه و سراقه حيسلم و بعد وفاه رسول الله و بعد ما حتتفتح بلاد الفرس على ايد امير المؤمنين الخليفه عمر بن الخطاب.. حيكون فى غنائم المسلمين و فيها اساور كِسْرَى ملك الفرس .. فحيدى سيدنا عمر رضي الله عنه سُوَارَيْ كِسْرَى لسراقه تنفيذا لوعد رسول الله صلى الله عليه وسلم ..قال تعالى:" وَ مَا يَنْطِقُ عَنِ الْهَوَى* إِنْ هُوَ إِلَّا وَحْيٌ يُوحَى " صدقت يا رسول الله ♡

نكمل بكره إن شاء الله <3

هجره نبينا ﷺ من مكه للمدينه (ج11) <3

دلوقتى النبى عليه الصلاه والسلام فى طريقه للمدينه طريق طويل و صعب اوى وطبعا ده عشان يقدر يهاجر من غير ما قريش تمسكه و تمنعه من الهجره .. ابن اريقط مشى معاهم شويه وآدى خدمته و دلوقتى سابهم (وعلى فكره مش وارد فى السيره اذا كان اسلم ولا لأ) .. و النبى و ابو بكر و عامر فى الطريق حسوا انهم جعانين و عطشانين اوى.. فمروا على خيمه فيها إمرآه اسمها " أم مَعْبد " و طلبوا منها تمر و لبن عشان يشتروه منها و لكن ملاقوش عندها اكل للأسف .. فالنبى بيبص كده فلاقى معزه صغيره فقال : " ما هذه الشاة ؟ "

قالت : شاة خلفها الجهد عن الغنم (دى ضعيفه) ، فقال : " هل بها من لبن ؟ " قالت : هي أجهد من ذلك ، قال : " أتأذنين إلي أن أحلبها ؟ " قالت : نعم ، ، إن رأيت بها حلبا فاحلبها ، فالنبى قال أحضروا الشاه .. فبدأ النبى يمسح بأيده الشريفه على ضرع الشاه و يدعى ، فالضرع بقى فيه لبن فقال احضروا إناء و فضل النبى يحلب المعزه دى لحد ما الطبق اتملا على آخره.. فشربوا كلهم و شبعوا و فضل كمان لبن لأم معبد و مشيوا..

و بعد شويه زوج أم معبد جه فلما شاف أبو معبد اللبن استغرب جدا جدا وقال : من أين لك هذا اللبن يا أم معبد والشاة عازب ، ولا حلوبة في البيت ؟ فقالت : مر بنا رجل مبارك ، من حاله كذا وكذا ، قال : صفيه لي يا أم معبد ..( ركزوا بقى معايا عشان ام معبد وصفت النبى بدقه رهيبه :') ♡..فقالت أم مَعْبد: " رأيت رجلاً ظاهر الوضاءة، أبلَجَ الوجهِ (وشه منور )،لم تَعِبه نُحلَة (جسمه مش رفيع الرفع الوحش) ولم تُزرِ به صُقلَة( و مش تخين)، وسيمٌ قسيم (جميل و وضيء)، في عينيه دَعَج(يعنى سواد)،

وفي أشفاره وَطَف (رموشه جميله طويله )، وفي صوته صحَل (بحَّة و حُسن وجمال)، و في عنقه سَطع (طول)، وفي لحيته كثاثة(كثرة شعر)، أزَجُّ (حواجبه طويله و مقوسه )، إن صَمَتَ فعليه الوقار، و إن تَكلم سما و علاهُ البهاء، أجمل الناس و أبهاهم من بعيد، وأحلاهم و أحسنهم من قريب، حلوُ المنطق (فصيح و حروفه واضحه)، فصل لا تذْر ولا هذَر (كلامه فى النص لا بالقليل ولا بالكثير)، كأنَّ منطقه خرزات نظم يتحَدَّرن (كلامه مسترسل و تحب تسمعه)
رَبعة لا يأس من طول، ولا تقتَحِمُه عين من قِصر(لا طويل و لا قصير) غُصن بين غصنين( هوه و اصحابه فيهم حسن و جمال) ، فهو أنضَرُ الثلاثة منظراً، وأحسنهم قَدراً، له رُفَقاء يَحُفون به(له صحاب دايما حواليه.. يعنى ليه هيبه ) إن قال أنصَتوا لقوله، وإن أمَرَ تبادروا لأمره، محشود محفود ( لو بس قال كلمه أطاعوه فورآ)، لا عابس ولا مُفَنَّد (وشه مش مكشر ، وكلامه خالٍ من الخُرافة يعنى معقول فيه حكمه) الله <3 يا جمال سيدنا النبى .. اللهم صل على أكمل و أجمل خلقك... اللهم نسألك رؤيه النبى فى المنام ..
و بعد ما سمع أبو مَعْبد الوصف ده راح قايل : هو والله صاحب قريش الذي ذكر لنا من أمره ما ذكر بمكة ولقد هممت أن أصحبه ، ولأفعلن إن وجدت إلى ذلك سبيلا ( ده هوه ده اللى قريش بتتكلم عنه والله انا كنت ناوى اروح معاه و اتبعه و والله نويت أتبعه ♡)..

الرسول مر من مكان اسمه عسفان و اتسمى المكان بالأسم ده بسبب من تعسف و صعوبه المشى فيه و على فكره المكان ده كان مخصص لمرضى الجزام لانهم لازم يقعدوا فى حته بعيده اوى عن الناس .فتخيلوا التعب و المشقه اللى النبى عليه الصلاه والسلام مر بيها و حر الشمس كمان ..النبى بدأ يقترب من المدينه و يحصل شئ عظيم .
شوفوا معايا حكمة ربنا عز وجل الرحيم الكريم فيقدر ربنا ده فى توقيت مهم.. ايه اللى حصل؟
الزبير بن العوام يكون راجع بقافلته من الشام الى مكة (جمال متحمله ببضاعه ) فيقابل النبى فى الطريق .قدرا ♡..طبعا مفيش صدف كل شئ مدبر بحكمه الله الحكيم ..

فيبدأ النبى يحكى للزبير عن الهجره من مكه للمدينه لأن الزبير مكنش يعرف شئ عن الهجره ..ففرح الزبير جدا و يقدر ربنا ان نوع التجاره اللى راجع بيها الزبير تكون ملابس.. وكأن ربنا عز وجل لا يرضى لنبيه عليه الصلاه و السلام انه يدخل المدينه بلبس حالته بقت صعبه بسبب الرمال والسفر ومتنسوش ان الهجره من مكه للمدينه كانت مدتها 14 يوم .. فأراد الله ان النبى يدخل على اهل المدينه (الأنصار) فى هيئه جميله و مشرفه ..

فيروح الزبير و يجيب ثلاث عبايات بيض جداد و ايه مستوردين من الشام .. ولبسوا الهدوم و كملوا فى طريقهم للمدينه.. وفى موقف حصل لازم تعرفوه و النبى مهاجر فى الطريق ..فوجئ برجل اسمه بُرَيْدَة بن الحصيب زعيم قبيلة اسمها "أسلم"، خرج و معاه سبعين من قومه عايز يمسك برسول الله صلى الله عليه وسلم وأصحابه عشان ياخد المكافأة الكبيرة، ولكن النبى صلى الله عليه وسلم وقف و عرض عليهم الإسلام في هدوء وسكينة، فوقعت كلمات الله رب العزه فى قلب بُرَيْدَة و قلب أصحابه وآمنوا كلهم في لحظة واحدة، .كانوا في أول اليوم من المشركين وبقوا في آخره من الصحابة، شايفين فضل ربنا العظيم عليهم وعلى الدعوة، ده كان عشان النبى يدعوا حد للإسلام كانت قريش تقف له عشان بس يدعوا لواحد بس..

لكن دلوقتى اسلم عدد كبير على يد رسول الله و فى لحظه واحده.. الحمدلله.طيب إيه أخبار الصحابه اللى اتحركوا قبل النبى للهجره من مكه للمدينه؟و الصحابه تعبانين مش بيناموا و لا قادرين ياكلوا و لا يشربوا من شدة القلق على النبى لأن الطريق من مكه للمدينه ياخد أربع او خمس ايام بس لكن دلوقتى عدى 14 يوم..وكل يوم يقفوا يستنوا النبى على باب المدينة لحد اليوم العاشر لحد ما جه عليّ بن ابى طالب ..تخيلوا !!

عليّ هاجر بعد النبى و هاجر ازاى عليّ ؟ هاجر ماشى على رجله. اصل كفار قريش اخدوا الناقه بتاعته و ومرضيش يرجع لمكه.. لانه خاف يتأخر عن رسول الله :') ♡ كل اللى مسيطر عليه دلوقتى هو انه يشوف النبى بعينيه..فيقول عليّ : واصلت الليل بالنهار فكنت اركض وأجرى واسقط وأنام وأقوم وأجرى واسقط حتى وصلت إلى المدينة فقلت أين رسول الله فقالوا: لا ندرى فبدأت الناس والنساء بيبكوا ويقولوا مات رسول الله .. قتل رسول الله ..

نكمل بكره إن شاء الله <3

هجره نبينا ﷺ من مكه للمدينه(ج12)
و أشرقت المدينه بمجئ محمد رسول الله <3

الصحابه "المهاجرين من مكه للمدينه"و اهل المدينه" الأنصار" فى حزن شديد و بكاء ..قلقانين على رسول الله لأنه أتأخر اوى فى الطريق.. و فى اليوم ال14 الرسول عليه الصلاه و السلام بدأ يقرب للمدينه و وصل لمكان أسمه الثنيه .. فكان فى واحد من اهل المدينه طالع على نخله بيشوف القوافل بتاعت التجاره وصلت ولا لأ ..فيقدر ربنا انه يشوف رسول الله .. فالراجل ده بيحكى و بيقول: رأيت ثلاث يمشون فى السراب ويلبسون البياض فناديت يا معشر العرب جاء الذى تنتظرون..جاء الذى تنتظرون..

وبيحكى و بيقول فارتجف بدنى "( اترعش اوى) وسقطت على الأرض.. و اول ما الناس عرفت خبر مجئ رسول الله .. عليت اصوات التكبير .. الله اكبر .. الله اكبر.. و الأرض بقت تترج من صوت الناس ..اللى بيضحك واللى بيبكى و الكل بيقول جاء رسول الله..جاء رسول الله ..والمسلمون فرحانين بقدوم النبي صلى الله عليه وسلم، وخرجوا للقائه، فتلقوه، وحيّوه بتحية النبوة، فأحدقوا به، مطيفين حوله، والسكينة تغشاه والوحي نزل عليه

(فَإِنَّ اللَّهَ هُوَ مَوْلَاهُ وَجِبْرِيلُ وَصَالِحُ الْمُؤْمِنِينَ وَالْمَلَائِكَةُ بَعْدَ ذَلِكَ ظَهِيرٌ) سورة التحريم
يا بختهم ♡ :')
اللهم صل على الحبيب..
واحد من أحبار اليهود (رجل دين يهودى) اسمه عبد الله بن سلام راح يشوف النبى ..فبمجرد انه شاف رسول الله و نظر فى وجهه ..قام قايل : أشهد ان لا اله الا الله وأنك رسول الله .. وقال ما هذا بوجه كذاب .

وأشرقت المدينة بقدوم رسول الله .. أنس بن مالك بيقول( وده حيبقى خادم رسول الله صلى الله عليه وسلم) : دخل الرسول المدينة يوم الاثنين فأنار منها كل شيء ومات يوم الاثنين فأظلم منها كل شيء :') ♡ ..و يدخل النبى المدينه و يوصل لمكان اسمه قباء وكل الصحابه يتلموا حواليه وبدأ النبى بالكلام وكانت اول كلمات للنبى ..قال صلى الله عليه و سلم : أيها الناس افشوا السلام ،واطعموا الطعام ،وصلوا بالليل والناس نيام ،تدخلوا الجنة بسلام " دول 3 جمل ،كلام سياسى اجتماعى ودينى ...،

عامل سياسى : افشوا السلام حتتوقف الحروب ..،واطعموا الطعام : وده عامل اجتماعى عشان ميكنش فى فقر فى المجتمع، وصلوا بالليل .. وده عامل دينى روحانى .. و ينهى كلامه النهاية بعامل تحفيزى و وعد من الله سبحانه وتعالى بالجنة.. فلا يوجد قائد فى العالم يأتى بكل هذه العناصر فى جمله الا محمد عليه الصلاه و السلام..اللهم صل و سلم و بارك على من أوتى جوامع الكلم ♡..
طيب ايه أول عمل حيقوم به النبى صَلِّى الله عليه وسلم؟

بناء مسجد .. طيب يا سيدنا النبى ..حضرتك بقالك 14 يوم لا نوم كويس ولا راحه و ارض صعبه و طريق متكسر واكل قليل و تقرر تبنى مسجد؟ تعبت كتيييير اوى عشانا يا رسول الله :') ..
اصل المسجد يا جماعه ده أساس المجتمع الإسلامى.. و ده حيبقى مسجد قباء اللى ربنا عز وجل قال عنه : " لَّمَسْجِدٌ أُسِّسَ عَلَى التَّقْوَىٰ مِنْ أَوَّلِ يَوْمٍ أَحَقُّ أَن تَقُومَ فِيهِ فِيهِ رِجَالٌ يُحِبُّونَ أَن يَتَطَهَّرُوا وَاللَّهُ يُحِبُّ الْمُطَّهِّرِين " و قال صلى الله عليه و سلم : من توضأ فى بيته وأتى قباء فصلى به ركعتان كانت له عمرة تامه تامه تامه.. ويبدأ الرسول فى بناء مسجد قباء بمساعدة اهل المدينة ..

و الصحابه فرحانين فيبدأوا يقولوا شعر عشان يحمسوا نفسهم .. فيقولوا بيت شعر جميل أوى.." لأن قعدنا والرسول يعمل ما ذاك منا إلا العمل المضلل ) ويرددوا البيت.. فيرد النبى عليه الصلاة والسلام ويقول " اللهم لا عيش إلا عيش الآخرة فأرحم الأنصار و المهاجرة".. (يقصد بالانصار اهل المدينه.. و بالمهاجره يقصد الصحابه اللى هاجروا من مكه ♡ )

نكمل المره الجايه إن شاء الله <3

رسول الله فى المدينه <3

المره اللى فاتت شفنا النبى و الصحابه بيبنوا مسجد قباء .. و فى النص و همه بيبنو المسجد يكون فى واحد صحابى كل ما ياخد طوبه يحطها على كتفه وينقلها عشان البناء يقوم باصص على كتفه فيلاقى تراب فينضفه .. و ياخد طوبه غيرها و بعد ما يحطها يلاقى تراب.. يقوم منظف تانى و هكذا فى كل طوبه فعلي بن ابى طالب لاحظ ده.. و على رضى الله عنه كان دمه خفيف اوى .. فقال بيت شعر: "لا يستوي من يعمر المساجد يدأب فيه قائما قاعدا ومن يرى عن الغبار حائدا " .. فالصحابى مسمعش بيت الشعر ^_^

بس عمار بن ياسر كان واقف فسمع بيت الشعر و مكنش يعرف ان على بن ابى طالب قاصد ببيت الشعر ده الصحابى ..فحفظ عمار بيت الشعر و فضل يكرر فيه طول ماهو بيشتغل فالصحابى سمع و قال: سمعت قولك يابن سميه ! والله لان لم تنتهى لأضربن بهذه العصى وجهك وأنفك .. فعمار واقف مخضوض و مش فاهم إيه الموضوع فسكت.. فالنبى سمع و غضب وأحمر وجهه الشريف صَلِىّ الله عليه وسلم وقال : من هذا الذى يريد ان يضرب وجهه عمار بن ياسر فإن عمار جلده بين عينى وانفى (ده عمار ده حته منى..عمار ده اللى امه ماتت قدامه و قال كلمه الكفر من كتر التعذيب و نزلت فيه آيه عشان يطمن بإن اللى ينطق كلمه الكفر بلسانه و هوه مغصوب .. فهوه لسه على دين الإسلام ) فبكى عمار لقول رسول الله و بكى علي وبكى الرجل وتعانقوا جميعا وانتهى بناء مسجد قباء ..

طيب دلوقتى النبى عليه الصلاه و السلام محتاج بيت يعيش فيه .. فحيتبنى بيت للنبى .. مكان البيت ده حيعمل مشكله.. لأن كل واحد حيبقى عايز النبى يعيش جانبه.. و هنا حيجى دور القصواء ( ده اسم ناقه النبى) اصل النبى رقيق القلب و المشاعر .. محب ودود.. فكان يحب يسمى حاجاته .. وكمان ناقه النبى دى مش ناقه عاديه دى كانت بتفهم النبى..
طب تعرفوا ان بعد وفاه النبى كل واحد من الصحابه كان عايز ياخد الناقه و اتفقوا انهم يقسموا احتياجاتها عليهم واحد يأكلها و التانى يشربها..لكن القصواء أمتنعت عن الطعام والشراب حزنآ على النبى و ماتت الناقه حبا لرسول الله.. طيب ايه دور القصواء النهارده ؟ القصواء ربنا سخرها عشان يتحدد المكان اللى حيتبنى فيه بيت رسول الله..

وحيقول النبى: "أيها الناس دعو القصواء فإنها مأموره" مكان ما تتوقف هيتبنى بيت رسول الله ..فتقوم الناقه تمشى حبه و تبرك (تقعد ع الارض) و تمشى تانى و تبرك و تالت مره مشيت شويه و بعدين بركت و مقامتش.. ففهم النبى عليه الصلاه و السلام ان ده المكان اللى حيبنى بيته فيه..عند بنى النجار .. عارفين مين بنى النجار؟ دول أخوال النبى عليه الصلاه و السلام(فاكرين لما إمنه اخدته يزور اخواله و هوه صغير و ماتت فى طريق رجوها لمكه) .. وكأن ربنا عزوجل أراد ان النبى ميحسش بالغربه و الوحشه و يعيش جنب قرايبه .. و عشان محدش يقول انه محمد أتغرب مع ناس غرب.. لأ.. ده قاعد وسط أهله و قرايبه..

و مره خرجت بنات صغيرين من بنى النجار ماسكين دفوف و بيقولوا شعر جميل ..فرحانين بالنبى " نحن بنات بنى النجار.. يا حبذا محمد من جار" ،فيمسح النبى على رؤسهن ويقول لهن : اتحبوننى؟ فيقولن : أجل يارسول الله ..فيقول لهن: إن ربى يعلم أن قلبى يحبكن.. و احنا حنقلد بنات بنى النجار و نقولك بنحبك يا رسول الله :') ♡ ..طيب لحد ما بيت رسول الله يتبنى .. النبى النهارده حيبات فين؟ فى صحابى اسمه ابو أيوب الأنصارى كانت أمنيته هيه أنه يأخذ النبى عنده فى البيت .. وفعلا الناقه كمان حتبرك عند بيته فينزل النبي عنده..
و راح النبى مع ابو أيوب وكان بيت ابو ايوب من دورين .. دور سفلى و دور علوى فقال : يارسول الله بيتى من طابقين فأصعد انت فى العلوى وأبيت انا وأم أيوب فى السفلى فلا نطيق ان نقف على سقف انت تحتها يارسول الله فرفض النبى وقال إن معك زوجتك ام أيوب و سيأتى إليا اصحابى (فبكده حيمروا على الدور الاول قبل ما يطلعوا للنبى . فأم أيوب مش حتبقى براحتها)

و أصر النبى علي ده ، و سكت ابو ايوب و سمع كلام والنبى قعد فى الدور السفلى. فلما جه الليل انكسر اناء لهم فيه ماء , فقال ابو ايوب : فقمت أنا وأم أيوب بقطيفة لنا مالنا لحاف غيرها ننشف بها الماء تخوفاً أن يقطر على رسول الله صلى الله عليه وسلم منه شيء يؤذيه " ... يااااااه .. الله عليهم <3

نكمل بكره إن شاء الله <3

بلغ الحب بين المهاجرين والأنصار حتى يقول احدهم لأخيه يا أنا ♡ ..

النبى عليه الصلاه و السلام بات عند ابو ايوب الأنصارى فى الدور السفلى ..و ابو ايوب و زوجته فى الدور العلوى وشفنا ابو ايوب و زوجته ازاي كانوا حريصين جدا علي النبي ..أول ما طلع الفجر ، قام أبو أيوب راح للنبى و قاله يا رسول الله والله لا نطيق ان نكون على سقف تحته رسول الله أبدآ..

فالنبى فهم الأمر و وافق أنه يصعد فى الدور العلوى ونزل ابو أيوب و زوجته فى الدور السفلى وكل يوم كان بيصعد ابو أيوب بالطعام للنبى عليه الصلاه و السلام وينزل بيه عند انتهاء النبى منه ..و كان أبو أيوب و زوجته يتلمسون موضع أصابع رسول الله و ياكلوا مكانه عشان يتلمسوا بركته صَلِّى الله عليه وسلم و فى يوم نزل الطعام فأبو أيوب أتفزع .. طب ليه؟ اصل ابو ايوب لاقى الأكل زى ماهوه فأتفزع و بسرعه راح للنبى عليه الصلاة و السلام و قال: أأغضبناك فى شيء يارسول الله ؟ فقال النبى : لا ولكن الطعام به ثوم وانا لا أأكل الثوم.. فقال أبو أيوب..أحرام هو يارسول الله ؟ فقال النبى: لا ولكنى اناجى من لا تناجى..(النبى يقصد جبريل عليه السلام .. و الملائكه تتأذى مما يتأذى ابن آدم) ..

فقال ابو أيوب : والله لا اذوقه أبدا يا رسول الله .. و عاش ابو ايوب و زوجته طول عمرهم و ماكالوش ثوم أبدآ.. و كان النبى عليه الصلاه و السلام مش بيكل الثوم و البصل و الكرات..طيب دلوقتى الناس فى المدينه محور حياتهم بقى رسول الله عليه الصلاه و السلام وكانوا يمتثلون إلى أوامره ويتوقفوا عند نواهيه ..فمكنش حد بيحب حد اد ما حب أصحاب محمد محمدآ ♡.. و النبى واجهه مشكلات فى المدينه مفيش قائد فى الدنيا يقدر على مواجهتها .مرة مؤرخ أجنبى أسمه برنارد شو قال: لو كان محمد حياً بيننا لأستطاع ان يحل مشاكل العالم و هو يحتسى فنجانآ من القهوه.. طيب ايه المشاكل اللى فى المدينه ؟

1-وباء : حمى قاتله تأتى لأهل المدينة ،فسميت يثرب من التثريب لكثره الأوبئه فيها.. و الحمى أصابت أبا بكر وعائشه وبلال ،فكانت عائشه تبكى طوال الليل من الحمى .ومن كتر المرض كان الصحابه يأتوا الرسول ويقولوا له يارسول الله ادعوا لنا الله ليحبب لنا المدينة كحبنا لمكه او أشد .. يا جماعه الغربه كانت صعبه جدا على الصحابه..

٢-بطاله : اهل المدينه عددهم كبير و زاد عليهم المهاجرين من مكه و متنسوش ان المهاجرين بلا عمل و بلا مسكن و لا مال.و كمان المهاجرين كان عملهم فى مكه بالتجاره أما المدينه أهلها بيعملوا فى الزراعه

.٣-اليهود والمنافقين .

٤-حرب اهليه بين قبلتى الاوس والخزرج .

فيرفع النبي يديه ويدعي ( اللهم اجعل بالمدينة ضعفي ما جعلت بمكّة من البركة ) فاستجاب الله لدعاء النبي فسميت "طَيبه" فهى طِيبه من طيب هواءها من كل سوء ♡..ولحل مشكلة البطالة آخى النبى بين المهاجرين والأنصار يعنى المهاجرى يبقى أخ للأنصارى و يورث فيه ؛أصل المهاجرى عنده علم و قرآن و سنه.. والانصارى عنده الدنيا.. عنده مال و عمل فآخى بينهم الرسول عليه الصلاه و السلام و اصبح المهاجرى يعلم الانصارى القرآن و السنه و الأنصارى يساعد المهاجرى فى المعيشه..

و يورث المهاجرى الأنصارى و يبقى كأنه اخوه فعلا لحد ما الله عز وجل حينسخ الحكم ده بعد كده فى قوله تعالى فى سورة الأنفال: (وَأُولُوا الْأَرْحَامِ بَعْضُهُمْ أَوْلَى بِبَعْضٍ فِي كِتَابِ اللَّهِ إِنَّ اللَّهَ بِكُلِّ شَيْءٍ عَلِيمٌ).. دلوقتى فأصبح ابو بكر اخ لزهير بن خارجه و عمر بن الخطاب اخ لعتبان بن مالك ، و الزبير بن العوام اخ سلامه بن سلامه بن وقش ، طلحة بن عبيد الله اخ كعب بن مالك ، وابو عبيدة بن الجراح اخ لسعد بن معاذ واسماء تصل لتسعين صحابيا .. ويقول الصحابه :والله قد بلغ الحب بين المهاجرين والأنصار حتى ان احدنا يقول لأخيه يا أنا ♡ ..

فقال تعالى : لِلْفُقَرَاءِ الْمُهَاجِرِينَ الَّذِينَ أُخْرِجُوا مِنْ دِيَارِهِمْ وَأَمْوَالِهِمْ يَبْتَغُونَ فَضْلًا مِن اللَّهِ وَرِضْوَانًا وَيَنْصُرُونَ اللَّهَ وَرَسُولَهُ ۚ أُولَٰئِكَ هُمُ الصَّادِقُونَ *وَالَّذِينَ تَبَوَّءُوا الدَّار وَالْإِيمَانَ مِنْ قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِمَّا أُوتُوا وَيُؤْثِرُونَ عَلَىٰ أَنْفُسِهِمْ وَلَوْ كَانَ بِهِمْ خَصَاصَةٌ ۚ وَمَنْ يُوقَ شُحَّ نَفْسِهِ فَأُولَٰئِكَ هُمُ الْمُفْلِحُونَ...
ويقف الرسول ويقول : "أيها الناس هؤلاء إخوانكم جاءوا إليكم وتركوا أموالهم وأبناءهم فلا تتركوهم " فيتحول الأنصار إلى كم من العطاء الغير مسبوق..

ويبدأ بالظهور نماذج عجيبه من الصحابه أمثال ام سليم مثلا..أم سليم راح لها واحد عشان يخطبها ..اسمه ابو طلحه وهو صاحب أخلاق ومال وجمال وحسب ونسب ولكنه مشرك .. فقالت يا أبا طلحه انك رجل صاحب خلق وحسب ونسب ومال ومثلك لا يرفضه أحد .غير انك رجل مشرك وإنى مسلمة فإن هدى الله قلبك الى الاسلام كان ذاك مهرى ولا اريد منك شيء ،وهذا الارتباط بالدين لفت انتباه ابو طلحه فيقرر انه يحاول يعرف عن دين الإسلام..فيذهب الى النبى .. فيشوف النبى طلحه و هوه جى عليه من بعيد ..فيقول النبى لأصحابه: أيها الناس يأتيكم أبو طلحه بين عينيه الاسلام.. سبحان الله النبى كان يحس باللى جوه اللى قدامه ..و فعلا يجى ابو طلحه و يبص لوجه النبى فيقول اشهد ان لا اله الا الله و انك رسول الله..

نكمل بكره إن شاء الله <3

و فى المدينه فضل النبى عليه الصلاه و السلام يعلم المسلمين الاخلاق و يقول : ايها الناس ليس المسلم بالطعان و لا اللعان ولا الفاحش ولا البذيء...المسلم من سلم المسلمون من لسانه و يده .... لا يدخل الجنة من لا يأمن جاره بوائقه.... لا يؤمن احدكم حتى يحب لاخيه ما يحب لنفسه... الراحمون يرحمهم الله..سباب المسلم فسوق و قتاله كفر... و يزداد حب الصحابة للنبى و يزداد حبهم له و من كتر حب الصحابه للنبى بقوا يقلدوه فى كل شئ مشيته ..تسريحه شعره..لبسه..وفي كل احواله ..و أخلاقه ♡..

طيب أتبقى مشكلة واحدة .. إزاى نجمع المسلمين فى الصلوات الخمس ؟ ( اصل مكنش لسه فيه آذان) فواحد أقترح استخدام البوق .. بس النبى معجبتهوش الفكره لأن اليهود بيستخدموه.. فقام واحد تانى اقترح يستخدموا الناقوس(الأجراس) والنبى رفضها لان يستخدمها النصارى.. ففى واحد من الصحابه أسمه عبد الله بن زيد كان مهموم لانه لاقى النبى بيفكر و مهموم .. فبقى عبد الله عمال يفكر فى طريقه عشان يحل المشكله دى و يرتاح رسول الله و ينبسط .. فعبد الله نام و شاف رؤيه فى المنام ..

عبد الله بن زيد حلم بإنه ماشي في طرقات المدينة و قابل راجل شايل ناقوس فطلب عبد الله انه يديله الناقوس ده فرفض الرجل و قال لعبد الله هل أدلك على خير من هذا ؟ فقال عبد الله: أجل .. فرد الراجل و قال له: قل.. الله اكبر .. الله أكبر .. الله أكبر.. الله اكبر اشهد ان لا إله الا الله أشهد أن محمد رسول الله إلى آخر الآذان .. و أنتهى الحلم )

و يصحى عبد الله و يجرى على النبى فى المسجد و يحكيله على الرؤيه.. فيرد النبى و يقول : إنها لرؤيا حق إن شاء الله فقم يا عبد الله و ألْقِ على بلال ما رأيت فإنه أندى صوتاً منك (يعنى عبدالله بن زيد مش بقى المؤذن لأن صوت بلال احلى ♡ الرسول لو كان بينا كان مش حيخلى غير اللى صوته جميل هوه اللى يأذن ^_^ )

المهم قام عبد الله و قال لبلال رضى الله عنه على الآذان و وقف بلال يؤذن فبمجرد ما سمع عمر بن الخطاب رضي الله عنه صوت الآذان وهو في بيته خرج يجرّ رداءه بيجرى بسرعه للمسجد النبوى و قال : يا رسول الله والذي بعثك بالحق لقد رأيت مثل سمعت الآن..فيقول النبى : فلله الحمد♡.. (قال صلى الله عليه و سلم :الرؤيا الصالحة جزء من ستة وأربعين جزءاً من النبوة )..

بدأ مجتمع المنافقين في الظهور.. ناس بيبينوا أنهم مسلمين لكن يبطنوا الكفر جواهم .. بيكسبوا ود رسول الله و أصحابه عشان تستمر مصالحهم في المدينة بنفاقهم وكمان يكسبوا ود اليهود في نفس الوقت .. كان على رأس المنافقين واحد اسمه عبد الله بن أبي بن سلول .. طيب ليه عبد الله بن أبى بيحقد على الإسلام و رسول الله بالشكل ده؟ اصل يوم وصول النبى للمدينة .. كان عبد الله بن ابي بن سلول بيتم تتويجه سيدآ فى المدينه.. و لما وصل الرسول عليه الصلاه و السلام للمدينة ..الناس سابت تتويج عبد الله و جريت لرؤيه النبى .. فأتغاظ عبد الله جدا و اتملى قلبه بالحقد ..و يفضل عبد الله زى ما حنشوف بعد كده يؤذي المسلمين لحد ما يموت..طيب قريش.. اخبارها ايه بعد هجره الرسول و الصحابه منها ؟

قريش حتموت من الغيظ ^_^ حتتجنن.. و يتبعت جواب من سيد قريش إلى محمد ابن عبد الله :أظننتم انكم قد افلتم منا! لا والله لنبعثن إليكم في كل عام جيش حتى نستاصل شأفتكم (جذوركم ).. والله لنقاتلنكم حتى نتفانى ..شايفين تهديد قريش! قريش مش بتهزر قريش .

طيب وصل تهديد قريش للنبى عليه الصلاه و السلام بأنهم حيحاربوهم.. فيبدأ النبى في تكوين سرايا من الصحابة (سرية : مجموعة جنود بيخرجوا بس من غير رسول الله.. سواء يحاربوا أو لأ) و زاد تهديد قريش لدرجه أنها أرسلت سرية قتالية بقيادة كرز بن جابر الفهري و دخلوا المدينة في نص الليل و حرقوا النخل و هدموا مناطق حيويه لكن مقتلوش حد و هربوا و مقدرش الرسول و الصحابه انهم يمسكوهم..طيب حتعمل إيه يا رسول الله ؟

هنعرف المره الجايه إن شاء الله <3