مغامرة في سجن القلعة

مغامرة في سجن القلعة
.....

في ثمانينات القرن الماضي كانت قلعة محمد علي تتبع للجيش فقط .
مدخل القلعه وقتها من منطقه اسمها المحجر من وراء مش من صلاح سالم زي دلوقتي .
كانت اجزاء منها كتير مهدومه قبل ما تأخدها وزارة الاثار وتجديدها .
روحت مره مع والدي وانا صغير نصلي الجمعه وقعد يشرح لي مذبحة القلعه كان فين مكانها وازي حصلت وكده .
وقعدنا علي حافة السور العريض الي بيبص علي القاهره كلها الي جانب مسجد محمد علي. كان في سلم صغير علي جانب اليمين للسور فاستهبلت ونزلت منه من وراء والدي فشوفت باب صغير حديد مفتوح بس مختفي تحت السور الحجر بالظبط و لان المكان ده ممنوع النزول فيه لان مافيش له سور والارض متكسره لقيت العسكري بينادي عليا : اطلع ممنوع تنزل .
جه ولدي وزعق لي .
فرحت للعسكري اتأسف وسالته : ايه الباب الي تحت ده
قالي : ده زمان كان سجن القلعه بس خطر انك تنزل علشان الأرض متكسره وايله للسقوط .
ومن اليوم ده وانا عندي فضول اشوف السجن ده .
ولما كبرت في يوم كنا عوزين نعمل مغامره فحكيت لهم عن الباب بتاع السجن الي في القلعه .
الفكره عجبتهم واتفقنا نروح نشوفه.
كنا اربعه انا وسالم واحمد واسامه رحمه الله حضرنا كشافات وعلي الساعه ١٠ صباحا رحنا وفضلنا مراقبين الحارس لغايه ما مشي ونزلنا بسرعه للباب كان عليه قفل قديم خبطه كان اتفتح دخلنا بسرعه ورجعنا القفل زي ما كان ...
دخلنا ممر منحوت في الصخر ضيق جدا ضلمه كحل شغلنا الكشافات كان السقف واطي وضيق فمشينا وراء بعض المكان كله عنكبوت والجو كله تراب وكنا بنتنفس بالعافيه في آخر الممر لقينا سلم ضيق حجر حلزوني فضلنا ننزل مده طويله وصلنا لباب خشب ضخم وتقيل كان مفتوح بس مايعديش واحد حاولنا نفتحه وبالعافيه فتح يادوب يدخل واحد بعد ما نزل علينا كمية تراب ردمنا .
دخلنا لقينا مكان واسع وكله اعمده و حوائط حجر وعليها سلاسل وبقع سوده كتير اعتقد تماما انها دم .
كملنا في نفق ضيق تاني يدوب يدخل واحد وصلنا لأوض ضيقه تقريبا زنزانات سجون فجاه اتخيلت بعينين بتلمع في الظلمة سلطت الكشاف لقتها قطة كبيره غير عاديه بتبص لينا وح تهجم علينا سالم حدفها بطوبه جريت في ممر ...شويه وسمعنا اصوات قطط عالي بس كانها ناس بتتكلم بس مش مفهوم خارجه من المكان الي دخلت فيه فقلنا ندخل الممر الي فيه صوت القطط مالقناش ولا قطه اختفوا فجاءه سالم وقفنا وقال الأرض هنا تهتز جامد خلي بالكو لتقع بينا لان الارض خشب عروق ومتهالك .مشينا بحزر جانب الحائط لغايه مالقينا جزء من الارض واقعه وحفرة كبيره وعميقه قدمنا بس في صوت صوصوه جي من تحت وفوق راسنا كمان رفعنا الكشاف لقيتا كميه من الخفافيش كتيره جدا متعلقه في السقف
اسامه مسك طوبه ولسه ح قوله بلاش كان حدفها عليها لقينا كل الخفافيش طارت بقيت تخبط فينا كانها بتنتقم مننا والي تحت طلعت من الحفره كمان
كلنا خبينا وشنا بيد والتانيه بنبعدها عنها وطلعنا نجري من الاوض دي دخلنا ممر ضيق بس نازل بميل والسقف واطي جدا كنا ماشين علي ادينا ورجلنا وراء بعض وصلنا لزنزانه واسعه حوائط بس وسلاسل ودم وخشب قديم اعتقد اوضة التعذيب لان شكل السلاسل الحديد علي الحيطه والدم بيقول كده بعد ماشوفنا المكان لقينا اربع قطط سوده كبيره بشكل غير طبيعي واقفين علي رجلهم الخلفيه وبيبصوا لينا وسدين المكان علينا بصراحه خوفنا منهم وبدانا نمشي براحه من جنبهم لغاية ما عديناهم وطلعنا نجري في ممر .
فجاه اسامه صرخ الارض كانت مهدومة والمكان ضلمه فوقع فيها وكانت انا وراه ح اقع بس مسكت نفسي وجهنا الكشافات علي الحفره كانت حوالي ٤ متر لاوضه في الدور الي تحت بس اسامه كانت رجله اتعورت و اتجزعت لما وقع عليها نادينا عليه ..انت كويس قال اه بس رجلي مش قادر امشي عليها واتعورت فقلتله طب خليك عندك ح ننزل ليك
الغريب اننا كنا سامعين اسامه يصرخ ويقول امشوا ...اوعوا .. بيس بيس ..الحقونننني كأن في حد بيهجم عليه . نزلنا سلم جري لغايه ما دخلنا ممر تاني وصلنا لاسامه وكان لسه بيصرخ وكان بيهش حاجه بس احنا مش شيفنها اول ما شافنا صرخ وقال حوشوا القطط بتهجم عليا وبتعضني قلنا له ده متهيأليك صرخ وقال لازم نخرج من هنا .
سندناه وبدأنا نتحرك وحسينا اننا في متاها جت فكره في دماغي فقلت حد معاه ولاعه فقال احمد انا فقلت له هاتها اخدت الولاعه وولعتها ابتدي اللهب يتهز فقلت لهم في هواء جي من هنا ياله بينا فضلنا ماشين في ممر فجاه ظهر نور من بعيد فضلنا ماشين واسامه عمال يقول قطط سوده كبيره قد الكلب حولينا بتبصلي وبتبصلكم انا شايفها لفينا الكشافات المنوره مفيش حاجه احمد وسالم مسندينه وانا ماشي قدمهم لغاية ما وصلنا لشباك من الحجاره بصيت منه لقيته بيبص علي جبل رملي قريب جدا ومنه للشارع تحت عند الاتوبيسات بدانا ننط من الشباك علي الجبل ونزلنا وحده وحده لغايه الشارع تحت وحمدنا ربنا وكان شكلنا كاننا خرجين من قبر بكم تراب وعنكبوت علي راسنا وجسمنا ورحنا بسرعه مستشفي الخليفه واسعفنا اسامه وروحنا .
بس اسامه للاسف كان بيحلم بكوابيس لقطط بتعضه وتهبشه . لغايه ما جه شيخ وقراء قران وقاله انت ازيت قطه كانت جن وهو الي عاملك مشاكل والحمد لله مشي وبقيت تمام .

لو عاوز تتأكد من كلام روح عند سور القلعه الي بيبص علي القاهره ح تلاقي
الكلام صح

» تفاصيل مذبحة القلعة مارس 1811ميلادية