من معالم الاسكندرية محلات سوق الصاغة الكبيرة بالسكة الجديدة المنشية

#اسكندرية_الجميلة
منتدى المركز الدولى 
#شارع_السكة_الجديدة 
#المنشية من معالم اسكندرية
🟢اللي كتير من حضراتكم هنا من اهل اسكندريه لا تعلموه ان شارع السكة الجديدة او ماسمي لاحقا بشارع #الباب_الاخضر كان يطلق عليه قديما سوق {#الصاغة_الكبيرة} لانه كان هو السوق الرائد والرائج والاقدم في تجارة وصناعة الذهب وقتها ..

وكان شارع الصاغة الكبيرة بيضم معظم تجار ومحلات الذهب والمصوغات بينما كانت الصاغة الحالية بشارع فرنسا وسوق الدقاقين تسمي ب {الصاغة الصغيرة} ..

و محلات سوق الصاغة الكبيرة بالسكة الجديدة كانت تمتد من الجانب الايمن من الشارع وابتداء من امتداد عمارة ابو طالب اللي بعد محل بقالة كونه مباشرة وكانت تنتشر فيه محلات بيع الذهب والمجوهرات ومن اشهر تجار الذهب والصياغ بالاسكندريه بالشارع بل اشهرهم سمعة علي الاطلاق كان المقدس/ زكي بشاره الذي كانت تاتي اليه الزبائن ليس من مناطق وربوع الاسكندريه فقط بل من كل محافظات الوجه البحري حول الاسكندريه وذلك لطهارة ذمته ومعاملاته مع زبائنه وزنا وبيعا وشراء رحمه الله ..

وبالمناسبة ديه كانت والدتي رحمها الله تفضل دائما التعامل معه بيعا وشراءا بكل ما كانت تقتنيه من ذهب ومصاغ وقتها ..

وياتي بعده المرحوم الحاج / محمد البنداق واخيه المرحوم الحاج / علي البنداق وكان شارع السكة الجديدة ايضا بيضم وقتها ايضا ورش صناعة المصاغ والمشغولات الذهبية .. 

ويجدر الاشارة الي انه كان يوجد قديما بشارع السكة الجديدة وصلة ترام من باب الكراسته عند باب 14 الي ميدان المنشية والعكس ..  

نعود ثانية للحديث عن محل بقالة كونه الذي اشرنا الي انه يقع علي اليمين ببداية شارع السكة الجديدة واما عن اهمية وقدم هذا المحل وحتي الان فحدث وقتها ولا حرج لانه كان من دواعي فخر اي سكندري او ممن حولها او اي وافد لها وقتها انه ينول الشرف ويقدر يشتري بقالته واحتياجات بيته من المحل ده ..

وده لانه كان ياتي له الزبائن من كل فج عميق وحتي اطراف الاسكندريه وحدود البحيرة وما بعدها لان فيه فرق في جودة منتجاته التي كان يجلبها عادة من جيرانه الارمن والجريچ والكرد من صناع البسطرمه والسدق المعقل المحترم ومن افضل منتجي انواع الجبنات البيضا والتركي من نباروه والزيتون اليوناني واللي له محل اصغر منه بالجهة المقابلة لهذا المحل بمدخل سوق راتب وبجوار محل خردوات منسي اول محل علي الناصية اليسار لشارع السكة الجديدة ..

ومن المعروف ان من بعد مدرسة الباب الاخضر الكائنة علي يمين الشارع وعلي الجانبين كان يوجد اشهر مصانع ومعامل انتاج البسطرمه والسدق المعقل البقالي المحترم علي الطريقة الكردية والارمنية والتركية وكانت تمتد هذه المصانع حتي تقاطع شارع كوم الناضورة مع السكة الجديدة في اتجاه السير الي شارع السبع بنات وللاسف معظم هذه المصانع عندما اشتراها ابناء البلد من السكندرين غشوا في صناعة البسطرمة والسدق اللي كنا واحنا صغيرين بنشوف الارمن والكرد جايبين افخاد العجول علي ترابيزة المحل كدا وبيشفوها ويطلعوا منها العروق المتميزة وديه طبعا افضل القطع المختارة التي تصنع منها البسطرمة ويعملوها وينشروها علي اسطح المعامل والمصانع ديه اما السدق فكان بيصنع من نطر الافخاد وفرم اللحوم وبواقي تجهيز البسطرمة ولو اي حد مر الان بمنطقة كوم الناضورة حيشاهد للان فوق اسطح المحلات ديه مناشر السدق والبسطرمة التي كانت تستخدم لتجفيفها قديما ..
ومن ممارسات هولاء النبلاء من الارمن والجريج والكرد انهم كانو بيعطفوا علي فقراء الحي من السيدات والرجال ويعملوا لهم راتب اسبوعي من بواقي اللحم ومواسير العظم اللي لايصلح لعمل البسطرمه والسدق وبيعتبروا ده واجب اجتماعي ومشاركة انسانية تجلب لهم حب الجيران والزباين من حولهم ..

كما كان يشتهر الشارع ايضا بمحلات صناعة القباقيب الخشب والهون او الجورن الخشب المستخدم في المطبخ كبديل عن الهون النحاس بعد تحول الناس عنه لارتفاع اثمانه .. 

كمان كان يشتهر اول الجانب الايمن والايسر من شارع السكة الجديدة ايضا بوجود صناعة وتجارة الصنادل والاحذية الجلدية والتي كانت تدار من مجموعات من جاليات الكرد والارمن حيث كانت تزخر منطقة المنشية والجمرك حينها بمجموعات لاباس بها منهم باسرهم وعائلاتهم ..

ومن اشهر واقدم محلات السكة الجديدة في جهة اليسار محلات الحاج سعيد فرغل للمنسوجات والقطنيات الفاخرة رحمه الله والتي كانت من انتاج مصنعه بالمحلة الكبري ويا بختك لو اقتنيت اي منتجات قطنية من انتاج مصنعه وقتها ..

وقد اشتهرت السكة الجديدة ايضا بانها مركز تجارة ادوات صناعة الاحذية والشنط والمنتجات الجلدية ومن اشهر التجار رحمهم الله في هذا المجال :
الحاج محمد ابوغربية والحاج ياقوت فهمي والحاج خميس وهان وعائلة شاهين والاخوة الحاج العربي والحاج محروس رحمهم الله اللي مازالت محلاتهم موجودة للان وتدار بمعرفة اولادهم بارك الله فيهم ..

ومن بين اشهر حلوانية الاسكندريه بشارع السكة الجديدة الحاج / علي قدح واللي كان ياتي له الناس من كل بقاع اسكندريه لتناول قطعة من هريسته او فطائره اوحلوياته الشرقية التي اشتهر بها رحمه الله ..

ومن ما اشتهرت به السكة الجديدة وقتها وجود محل الحاج / محمد علي للفول والفلافل وده كان صيته وقتها يفوق صيت مطعم محمد احمد لاسباب كتيرة جدا منهم طعم وحلاوة فوله وفلافله وحشوتها وبهراته عليها .. 

ومن ما اشتهرت به السكة الجدية قديما تجارة المنتجات المنزلية الزجاجية وكان اشهر التجار في الحقبة ديه هو المرحوم الحاج / سعيد عبد المعطي صاحب محلات تجارة الزجاج والادوات المنزلية والتي يديرها ابنه الحاج محمد سعيد عبد المعطي ومازالت محلاته كائنة علي الصفين علي اليمين واليسار بوسط شارع السكة الجديدة حتي الان ..

ومن اشهر واقدم صيدليات الاسكندرية والمنشية صيدلية اواجزخانة المعارف بشارع السكة الجديدة علي الناصية التي تقع عندها قهوة البس وكذلك بعدها علي شارع السكة الجديدة الرئيسي كانت تقع قهوة بطاطا وكانت تضم صالون ادبي لمجموعات المثقفين من اهل الحي ..

وبعدهم مباشرة وبنفس العقار كان ومازال يقع محل بقالة بطاطا اشهر محلات البقالة بوسط السكة الجديدة وبعدهم محل جلال للصنادل والشباشب والبلغ (جمع بلغة) حذاء سكندري اصيل لاهالي الاسكندرية قديما تكمل السروال والصديري بتوع لبس الصيادين بالافلام زمان ..

بعدهم مباشرة تقع محلات شاهين لدباغة وتجارة الجلود وتعد عائلة شاهين من اعرق عائلات الاسكندريه المعروفين بمزاولة انشطة دباغة وتجارة الجلود ولوازم الاحذية والشنط بوسط البلد ..

واذا استمرينا بنفس الاتجاه سنصل للبيت التالي وهو بيت الحاج سعيد بتاع الصيني والزجاج وده من اشهر تجار السكة الجديدة رحمه الله وبنفس المنزل كان يقع محل ترزي قمصان جورج ولو انت كنت محظوظ زمان ولك شان كبير حتقدر تنال شرف انك تشتري قماش لينوه مصري وتروح تفصله عن جورج وده من فرط شهرته وازدحام محله وارتباطه بشخصيات سكندريه مهمة كتيرة تعد من كبار زبائنه وبع محل جورج كان ومازال يقع محل عم منصور بتاع القباقيب الخشب اللي كان يصنع ايضا المنتجات الخشبية الشهيرة وقتها زي الهون الخشب والمعالق الخشب وادوات المطبخ ..

وبعدهم كان محل دخاخني الابياري وبعده محل فول وفلافل عبد الستار وده للان من اشهر معالم السكة الجديدة ..

واذا اتجهنا لليسار ورجوعا للوراء كان يقع محل تفصيل قمصان شهير اسمهم الاخوة ابو الحسن وكذلك محل خيوط كدارة اشهر محل خيوط وكلفة بالسكة الجديدة .. 
وبعدهم علي اليسار ايضا كان يقع محل ابو ادكتور وهو اشهر محل برانيط للراس وكمان عم محمد الاسكافي ومحل الناني الخياط وبعدهم يقع محل جابر العطار او الحاج قاطش كما كان يشتهر وقتها وبعدهم وملاصقا له كان محل المرحوم الحاح عبد الرازق العطار اشهر تجار العطارة بالسكة الجديدة والذي له مجموعة محلات شهيرة بمنطقة العصافرة وشرق الاسكندرية .. 

وبعدهم يسار كان تقع محلات الفحامين محلات تختص ببيع الفحم لمحلات ومطاعم الشواء وبعدهم كان يقع مخبز وفرن توحه اشهر مخابز العيش الفينو الوحيد بالسكة الجديدة وبعدهم مباشرة وبنفس اتجاه اليسار تقع مكتبة لبني اشهر مكتبات السكة الجديدة ..
بعدهم وعلي اليسار كان هناك حلواني شهير يبيع الهريسة والفطائر الشهية وكان ابنه مدرس مادة العلوم 
بمدرستي ابراهيم الاول الاعدادية براس التين بالمرحلة الاعدادية ..

واذا عدنا ادراجنا يمينا بنفس الشارع سنجد محلات الشربتلي بتاع الجلود رحمه الله وبعده مباشرة كان يقع محل الزكي بتاع الثلج وكمان يمارس مهنة تصليح الاحذية ايضا وده للمفارقة الغربية وبعدهم كان يقع محل الحاج مصطفي بتاع الفول والفلافل ..

وبعدهم كان يقف علي نفس الاتجاه عم حسين رحمه الله بتاع الارز بلبن والعاشورة بعربيته المتواضعه واللي كان بيساعده ابن اخيه عادل باخر ايامه ..

شارع السكة الجديدة فعلا كان باب من ابواب التجارة السكندرية المحترمة وكان بيضم زي ما وضحت نخبة من افاضل التجار المصريين واللي كانوا مشهورين بامانتهم وطهارة ذمتهم وحبهم واحترامهم لجيرانهم من سكان المنطقة وزبائنهم ايضا بلا شك ..

ختاما :
اتمني اكون قدمت لحضراتكم وجبة دسمة وشهية من زكريات الزمن الجميل لاشهر واجمل مناطق وسط البلد بالاسكندرية وهي شارع السكة الجديدة ..
والي ان التقيكم بمقالة قادمة عن مدينتنا الساحرة لكم مني كل المني ..
ودمتم في امان الله ورعايته
۩❁#منتدى_المركز_الدولى❁۩