خطوات السفر إلى العمرة بدون شركات السياحة فى بلدك

إزاي تطلع رحلة عمرة لوحدك بدون شركة سياحة؟
البوست دة عبارة عن دليل شامل لرحلة العمرة.. بالتفاصيل والخطوات والأسعار.
الحمد لله ربنا وفقنا وحجزنا وطلعنا لوحدنا بدون شركة سياحة في رمضان من الثلاثاء 26 مارس إلى السبت 30 مارس 2024.. وبناءً على رحلتنا.. كتبت لك الدليل دة..
يللا نبدأ بسم الله..
1) تأشيرة دخول للسعودية
2) تذاكر طيران ذهاب وعودة
3) حجز الفنادق
4) عملة السعودية (ريالات)
5) بطاقة بنكية (كارت فيزا أو ماستر)
6) طريقة الانتقالات في السعودية
7) طريقة أداء مناسك العمرة
8 ) الطواف والسعي
9) أثناء تواجدك في الحرمين
10) المسجد النبوي وحجز الروضة الشريفة
11) الطقس
12) الأكل
13) الأدوية
14) الهدايا
15) الناس والمعيشة في السعودية
16) تنظيف الملابس
17) الإنترنت وخط الموبايل
18) المزارات في مكة والمدينة
19) برنامج مقترح لرحلة العمرة
20) تكلفة الرحلة
21) جزء الروابط

1) تأشيرة دخول للسعودية:
- بعد ما يكون معاك جواز سفر ساري لمدة ست شهور من تاريخ سفرك.. هتحتاج التأشيرة.. اللي هي إذن دخول للسعودية.
*هما كتر خيرهم بييسروا ويسهلوا على الناس ودة هتحس بيه في كل حاجة.. في أنواع كتير متوفرة من التأشيرات..
*احنا اشترينا تأشيرة إلكترونية (يعني بتقدم لها وتدفع فلوسها من موقع وزارة الخارجية السعودية (بتعمل عليه حساب جديد للزوار بإيميل وكلمة سر وتسجل طلب جديد بتأشيرة جديدة)..[هتلاقي الرابط تحت في جزء الروابط برقم (أ)] وتستلمها على بريدك الاكتروني وبتطبعها وتخليها مع جواز سفرك وانت مسافر.. مش بتكون ختم مطبوع في جواز السفر زي الأنواع التانية) نوعها (زيارة سياحة) مدتها سنة متعددة السفرات سعرها 107 دولار.. لأن الحمد لله كان معانا فيزا شنغن..
*لو مش معاك فيزا شنغن أو مع أحد أقاربك من الدرجة الأولى.. دلوقتي فتحوا تأشيرة جديدة للزيارة سياحة بدون فيزا شنغن.. بتحتاج خطاب HR وكشف حساب بنكي بس.. [في فيديو أ.عبد الرحمن الباز-ربنا يكرمه- بيشرح طريقة الحصول على التأشيرة دي.. رابط الفيديو تحت في جزء الروابط برقم (ب)]..
-لو ماعندكش شركة تديلك خطاب HR.. في نوع تأشيرة تانية اسمها (تأشيرة العمرة B2C ودي بتحتاج تشتري باركود عمرة من شركة سياحة مصرية بحوالي 2500 جنيه..
* باركود العمرة صالح لمدة ٦ ايام بس.. لازم يكون تاريخ الذهاب خلالهم واتأكد برضه من المعلومة) اسأل عليها أكتر وشوف ممكن تعملها من موقع وزارة الخارجية بنفسك وللا لأ.
-الشباب اللي في سن التجنيد أو مكتوب في جواز سفره مطلوب للتجنيد.. لازم يجيب تصريح سفر يشوفوه في المطار.
-تأشيرة الزيارة تسمح لك بعمل العمرة لكن لا تسمح لك بالحج بدون تصريح ولا تسمح لك بالإقامة في مكة في الفترة بين 15 ذي القعدة إلى 15 ذي الحجة.
- في مطارات تُخصص للحجاج فقط وتمنع استقبال تأشيرة زيارة سياحة وهي (مطار جدة – مطار المدينة – مطار ينبع – مطار الطائف) في الفترة من ١٨ مايو إلى ١٦ يونيو ٢٠٢٤م.. عمومًا ابعد عن المواعيد دي في السفر.
-تأشيرة الترانزيت بحوالي 95 ريال لكن بتضطر تحجز تذكرة سفر لوجهة ثالثة.. وفي ناس كتير معرفتش تخرج بيها من المطار بعد ماحجزت التذاكر والفنادق.. رأيي لو مش متمكن منها وفي حد سافر بيها يساعدك في خطواتها.. ماتسفرش بيها.
-أي معلومات تخص التأشيرة لازم تقرأها بنفسك من على موقع نسك أو موقع زور السعودية أو موقع وزارة الخارجية السعودية.

2) تذاكر الطيران:
- دخلنا على موقع Wego.. [رابط (ج) في جزء الروابط] وحددنا تاريخ الذهاب والعودة وأسماء المطارات وعرضلنا تذاكر الطيران المتاحة في شركات كتير وأسعارها وأوقاتها.. (رأيي.. حاول تختار التذاكر بحيث في يوم الذهاب توصل السعودية الصبح بدري 7صباحا مثلًا.. وفي يوم العودة حاول تسيب السعودية وقت العصر 5 مساءًا مثلًا.. لأن دة في رأيي أنسب وقت يتفق مع مواعيد الوصول والمغادرة في الفنادق علشان ما تشيلش هم الشنط).. (لو مش محدد أيام سفر معينة شوف أسعار التذاكر في أوقات مختلفة واختار الأرخص واقرأ الشروط كويس وعدد الشنط المسموح (بس خليك خفيف الحركة قدر الإمكان يعني شنط قليلة)).. (رأيي خلي الذهاب من مطار القاهرة إلى مطار المدينة والعودة من مطار جدة إلى مطار القاهرة أو مطار سفنكس).
حجزنا تذاكر من (النيل للطيران) - كانوا عاملين عرض - من القاهرة إلى جدة ومن جدة إلى القاهرة والحمد لله الرحلة كانت جميلة.

في المطار:
* في مصر.. هتروح المطار قبل الميعاد بثلاث ساعات وفي أيدك جواز السفر الساري ومطبوع معاك صور التأشيرة وتذاكر السفر ذهاب وعودة وحجز الفندق (مش هيتطلب منك في المطار بس خليه معاك).. بتدخل المطار بيتأكدوا من ورقك ويفحصوا الشنط بالجهاز أو يدوي.. بعدين بتشوف رقم رحلتك وبتقف عند شباك شركة الطيران اللي انت عليها بيسجلوا بياناتك حاجز وبيستلموا الشنط .. بعدين بتروح الجوازات بيتأكدوا من ورقك ويختموا جواز السفر بالمغادرة من القاهرة.. بتنتظر لغاية موعد الطيارة في صالة الانتظار الخاصة برقم البوابة اللي مكتوب في تذكرتك.. لما ينادوا على رحلتك هتروح تركب الطيارة من الباب المحدد.
-في المطار ماتجيبش سيرة العمرة لموظفي الجوازات.. قلل كلامك معاهم قد ماتقدر.. لو سألك عن غرض السفر.. قول: سياحة.. رايح أغير جو.. لأن العمرة ليها ترتيبات وقواعد وشروط عندهم.. لو انت مش مستوفيها مش هيخليك تسافر.. ولو كنت رايح مكة الأول.. ماتلبسش لبس الإحرام إلا بعد ماتعدي من كل شبابيك الجوازات وتقعد في صالة انتظار الطيارة.
*صالة انتظار الطيارة فيها حمامات للبس ملابس الإحرام للرجال ومسجد لصلاة الركعتين.. بلاش حد يعمل حسابه انه يرتدي ملابس الإحرام في حمام الطيارة لأنه مش هايعرف للازدحام.. ودة في حالة لو كنت رايح مكة الأول.. وفي الطيارة (من القاهرة إلى جدة).. هيبلغوك قبل المرور على الميقات علشان تحرم منه .. لكن لو كنت رايح المدينة الأول.. هتحرم من المدينة (ميقات ذو الحُليفة في منطقة أبيار علي) ثم تتوجه لمكة.
*في السعودية.. لازم تروح قبل ميعاد الطيارة ب3 ساعات وتراعي فروق التوقيت في ميعاد الطيارة.. وخد بالك من بيانات التذكرة المطار قديم وللا جديد واسم الصالة.. الصالة الشمالية مثلًا.. هتدخل.. هيتأكدوا من ورقك وتأشيرتك ويفحصوا الشنط بالجهاز أو يدوي.. بعدين بتشوف رقم رحلتك وبتقف عند شباك شركة الطيران اللي انت عليها بيسجلوا بياناتك حاجز وبيستلموا الشنط .. بتعدي على بوابة بيوزن شنطة إيدك اللي هتطلعها معاك على الطيارة (حسب شركة طيارانك غالبًا.. بحجم صغير وأقل من 7 كيلو).. بعدين بتروح الجوازات بيتأكدوا من ورقك ويختموا جواز السفر بالمغادرة من السعودية.. بعدين بتنتظر لغاية موعد الطيارة في صالة الانتظار الخاصة برقم البوابة اللي مكتوب في تذكرتك.. لما ينادوا على رحلتك هتروح تركب الطيارة من الباب المحدد.
-شنطة اليد لو فيها أي مخالفة.. ستتركها على الجهاز قبل الصعود للطائرة مثل آلة حادة أو معدن أو سائل أو سبراي او غيره.. ستجد الممنوعات مكتوبة في لوحة كبيرة عند شباك فحص تذكرتك حيث يتم تسليم الشنط لشركة الطيران التي حجزت عليها.. وتقدر ساعتها تنقل أي حاجة ممنوعة من شنطة إيدك إلى شنطة بطن الطيارة.. أو ممكن تضطر تسيبها خالص للموظف.
-خللي الإبرة والخيط والمقص صغير والقصافة والسكينة والأدوية في شنطة بطن الطيارة.

3) حجز الفنادق:
دخلنا موقع تريفاجو وحددنا مواعيد الذهاب والعودة والمدينة وعرض لنا الفنادق والأسعار في بوكينج Booking وأجودا Agooda ومواقع تانية بس مضاف إليها خصم خاص بتريفاجو.. لو دوست على أي فندق (على بوكينج مثلا) هيوديك رابط موقع بوكينج ويشغل لك الخصم الإضافي تلقائي على كل الفنادق في الموقع.
*شرح طريقة حجز الفندق (لو هتروح يوم الثلاثاء 26مارس الصبح 9صباحا مثلا.. هتحتاج تحجز ليلة الفندق بحيث تكون تسجيل الوصول يوم الثلاثاء وتسجيل المغادرة في صباح اليوم التالي يعني تبات ليلة وتغادر الأربعاء 9 صباحًا مثلا.. لو عايز تغادر الخميس هتحتاج تحجز ليلتين وتسجل مغادرة الخميس 9 صباحا)
*احنا حجزنا ليلتين في مكة (فندق الخلفاء الفضي في حي الروضة).. رأيي فيه (نضيف وتعامله ممتاز وسعره جيد وله باص يوصل للحرم في فترة تواجدنا في رمضان.. معرفش في غير رمضان له باص وللا لأ.. (بدون الباص هتدفع تاكسي حوالى 40 ريال علشان تروح أو ترجع من الحرم )) وليلتين في المدينة المنورة (فندق إعمار طيبة).. رأيي فيه (نضيف وتعامله ممتاز وقريب من الحرم خمس دقايق مشي)
*رأيي احجز فندق قريب من الحرم في مكة مشي ومش موجود على مطلع (مرتفعات صعبة).. اقرأ آراء الناس (الريفيوهات) اللي نزلت في الفندق قبل ما تحجز على موقع بوكينج.. ولما تحجز ادفع الفلوس وانت هنا علشان الحجز بتاعك مايتلغيش.. وعلشان ماتضطرش تدفع هناك بالريال.
*على موقع بوكينج وأجودا هتلاقي إمكانية تصفية النتائج حسب ميزانيتك وحسب البعد عن المسجد الحرام في مكة أو المسافة من المسجد النبوي في المدينة المنورة.
*كل ما عدد السراير زاد في الغرفة.. كل ما السعر قلّ.
* أسعار الفنادق متدرجة حسب احتياجك وميزانيتك وفي شقق فندقية أو شقق للايجار أو سراير بالليلة بتتحجز مع المناديب.. لو معرفتش تحجز غرفة من بوكينج.. شوف موقع bedinroom أو airbnb تأكد شغال هناك وللا لأ.. لو مالاقيتش.. اكتب بوست فيسبوك في مجموعة خاصة بالعمرة.. عايز (سرير أو غرفة) قريب من (الحرم المكي أو المدني) بسعر كذا أو بسعر مناسب.. وان شاء الله تلاقي.
* لما تحجز الفندق .. خد لقطات شاشة للوكيشن فيها: اسم الفندق على جوجل خرائط وخريطة مكانه وأسماء الشوارع اللي حواليه والعلامات المميزة.. واعرف واحفظ عنوانه بالضبط وأسماء الشوارع والعلامات المميزة بجوار كذا أمام كذا.
*لو حجزت من بوكينج أو أجودا.. اطبع فاتورة حجز الفندق ويكون ظاهر فيها المبلغ المدفوع أو اطبع إيميل تأكيد الحجز.
*في ناس (نساء ورجال) بتبات في الحرم المكي سواء مسجلين اعتكاف أو لأ.. ومش بيحجزوا إقامة.. غالبًا بيناموا في المصلى في التوسعات بداخل المسجد الحرام بيكون معاهم شنطة ظهر صغيرة بس وشال ثقيل لأن المكيفات تكون باردة بالليل..
* لو تحب.. تقدر تبحث عن (كيفية التسجيل للاعتكاف في الحرم للرجال والنساء) وتعرف مواعيد حجزه من قبل ما تسافر.

4) عملة السعودية (ريالات): علشان تجيب ريالات سعودية روح بنك مصر قبل ميعاد السفر بيومين بشرط يكون لك حساب فيه مفتوح قبلها بست شهور ومعاك جواز سفرك وتأشيرتك مطبوعة وتذاكر السفر مطبوعة.. هيصور الورق ويديلك لغاية ألفين ريال وهيختم لك على جواز السفر انك عملت تدبير عملة فميش بنك هيديلك تاني.
* لو هتحتاج ريالات أكتر.. دور في شركات الصرافة قبل ما تروح البنك.
* البنوك التانية غير بنك مصر بتدي أقل من ألفين ريال.
*وانت هناك خللي معاك مبلغ أمان احتياطي ماتقربلوش مثلًا 500 أو ألف ريال..
*اسأل في البنك بتاعك عن إمكانية فتح حد البطاقة البنكية لما تسافر (ولو بالاتصال بخدمة العملاء بالتليفون).. تكون أمان ليك تقدر تسحب منها فلوس من أي ATM هناك وتاخد ريالات لو احتاجت.
* لو عايز تصرف وتتفسح.. خليك حريص ومأمن نفسك بكذا حاجة (فلوس احتياطي.. كارت فيزا.. رقم قريب ليك معاه كارت فيزا يدفع لك.. قطعة ذهب تبيعها.. لأن في ناس كتير حصل لهم ان فلوسهم خلصت أو اتزنقوا في الفلوس هناك. لأن ممكن حد يحتاج دوا يكون غالي أو حاجة سعرها يزيد مع زيادة الطلب عليها وقلة عددها (زي التاكسي مثلاً أو سيارات الانتقال بين المدن)
*ماتسافرش بجنيه مصري هناك.. التعامل هناك بالريال أو الدولار فقط.. ولو لقيت حد يبدله لك بريالات هيكون غالي جدًا.

5) بطاقة بنكية (كارت فيزا أو ماستر)
علشان تدفع فلوس التأشيرة والفندق وتذاكر السفر هتحتاج كارت فيزا يسمح بالدفع الدولي وليها بدائل -لو مش معاك-
*لشراء التأشيرة بتدفع الفلوس على الموقع السعودي 107 دولار.. دة دفع دولي.. وفي معظم بطاقات المشتريات دة مسموح لأنه أقل من الليميت الشهري أو حدود الدفع .. لو مش عندك خللي حد موثوق يدفع لك وتحاسبه بالمصري.
*لحجز الفندق.. عندك كذا حل:
إما انك تدفع كارت فيزا يسمح بالدفع الدولي.. أو تشوف بوكينج ان كان يقبل الدفع ببطاقة محلية أو تحدد دفع عند الوصول بالريالات أو الدولار.. أو تحجز على موقع فنادق تاني يكون مصري وبيقبل دفع محلى.. أو تحجز لما توصل السعودية بالريالات سواء من الفندق نفسه أو عن طريق مندوب (غالبًا كل ما قللت الوسطاء كل ما قللت السعر)
*لحجز تذكرة الطيران.. برضه عندك كذا حل:
إنك تدفع كارت فيزا يسمح بالدفع الدولي.. أو تدفع جزء بكارت المشتريات لغاية حد الدفع وتروح مكتب شركة الطيران تدفع باقي المبلغ بالجنيه زي طيران فلاي ناس مثلا.. أو انك تختار شركة طيران مصرية وتدفع كله بالجنيه بكارت الفيزا المحلي من الموقع أو تدفع نقدي في مكتبهم زي شركة مصر للطيران أو النيل للطيران أو نسما للطيران أو غيرهم.

6) طريقة الانتقالات في السعودية
-من مطار جدة إلى مكة ركبنا باص نورث ويست ب25 ريال للفرد مدة الطريق حوالي ساعتين
-الموقف الرئيسي في مكة اسمه موقف جرول G-Roll
- الموقف الرئيسي في المدينة المنورة أمام مول توب تن Top 10 Mall
- بالقرب من موقف جرول ركبنا سيارة من مكة للمدينة ب 60 ريال للفرد مدة الطريق حوالى 4 ساعات
- في المدينة المنورة من موقف توب تن.. كان في سيارات كتير بتحمل لمكة.. احنا ركبنا سيارة من المدينة إلى جدة ب 150 ريال للفرد.. مدة الطريق حوالي 4 ساعات
- نزلنا تطبيق بولت Bolt [رابط (هـ) في جزء الروابط] لحجز عربيات للانتقال داخل مكة أو المدينة (أسعاره أفضل بكثير من التاكسي).. لو التطبيق مااشتغلش هتضطر تاخد تاكسي أو أتوبيس
- الناس هناك قالوا ان تطبيق أوبر شغال في السعودية.. بس احنا مانزلناهوش.
- موجود قطار الحرمين السريع بيشتغل بين مكة وجدة والمدينة المنورة تقدر تحجزه بس خللي بالك من اشتراطاته في الشنط المسموحة.. واحجزه قبلها بفترة علشان تلاقي حجز اقتصادي في الميعاد اللي انت محتاجه.. ورتب وقتك بحيث توصل محطة القطر قبل الميعاد بساعة [رابط (و) في جزء الروابط]
- موجود باص نورث ويست North West للانتقال بين المدن ولكنه بطئ مقارنة بالسيارات الميكروباص.. رأينا شباك الحجز الخاص به في موقف جرول في مكة.. وشباك الحجز في مسجد السيدة عاشة رضي الله عنها (مسجد التنعيم) (حيث تحرم منه لعمرة جديدة إذا أردت) حيث يوفر رحلة عودة للحرم المكي ب 5 ريال للفرد ومرة الطريق حوالي ساعة.. وكان لهم مكتب في المدينة المنورة.. يوفر رحلات لمدن كثيرة.. ما عرفته هو رحلة إلى جدة ب 60 ريال للفرد ومدة الطريق حوالي 6 ساعات لكن يجب أن تحجزها قبلها بفترة لو عندك ميعاد طيارة وعايز تلحقه.
- الناس بتقول للانتقال من المدينة المنورة إلى جدة.. (تطلع من باب 333 أو334 أو 335 في الحرم النبوي وتمشي لآخر الشارع هتلاقي النقل الجماعي يوصلك إلى مطار جدة ب100 ريال).. أو (عن مول توب تن.. سيارات الكدادين اللي بتروح جدة.. مريحة وجميلة الفرد ب 50 ريال.. السيارة سريعة وبتاخد من 7 إلى 9 أفراد).. أو (سيارة ملاكي الفرد ب 60 أو 70 ريال)
- في خدمة اسمها (خدمة النقل الترددي لضيوف الرحمن Jedco).. بتوفر باص مجاني لنقل المعتمرين من جدة إلى مكة والعكس.. من (مطار الملك عبد العزيز - صالة 1) إلى موقف (كديْ) إلى موقف (وقف الملك عبد العزيز) في مكة.. والعكس من مكة إلى مطار جدة.. (لو من المطار يشترط ارتداء زي الاحرام).. شباك حجز هذه الخدمة في صالة رقم 1 .. في منطقة حوض السمك في مطار الملك عبد العزيز بجدة.. بيكون في رحلة كل ساعتين من 10 صباحا إلى 10 مساء.. لكن لا تعتمد عليها كوسيلة أساسية.. لأنها ساعات مش بتشتغل.

-باص الفندق بيقف في جزء من موقف الباصات مخصص لكل باصات فنادق منطقته.. مثلاً.. موقف غزة للباصات ستجد فيه مئات الباصات.. مقسمة حسب المناطق وأجزاء المناطق .. مثلا: باصات العزيزية الشمالية والجنوبية وحي الروضة وهكذا..اعرف مكان موقف باص فندقك وأسماء الفنادق المجاورة له.. لأن الباصات الأخرى سترحب بك لتركبها مجانا لو لم تجد باص فندقك.. غالبا ستجد في كل فندق ورقة بمواعيد الباصات والأشخاص المسئولين عنها وأرقام هواتفهم.. صوَّر الورقة ولو تهت في الموقف.. اطلب من أحد مسئولي الموقف أو أفراد الأمن.. الاتصال برقم مسئول باص الفندق ليخبرك عن مكان الباص أو يدلِّك على طريق الرجوع للفندق.

7) طريقة أداء مناسك العمرة
نزلنا تطبيق (المطوف) فيه كل تفاصيل العمرة.. هتعمل ايه في البيت قبل ما تسافر.. هتحتاج إيه.. تعمل إيه.. تقول إيه.. ربنا يبارك للي عاملينه. [رابط (ز) في جزء الروابط]
وفي فيديو عاملاه وزارة العمرة والحج السعودية لشرح مناسك العمرة [رابط (ح) في جزء الروابط]
وموقع نسك Nusuk فيه شرح مناسك العمرة وآدابها وقواعدها [رابط (ط) في جزء الروابط]
- ممكن تنام وانت محرم في الطيارة أو الفندق وتتغطى بشرط عدم تغطية الرأس.

8 ) الطواف والسعي:
- الطواف في الصحن.. حول الكعبة مباشرة.. دة أجمل حاجة.. وبيكون للنساء متاح وللرجال المعتمرين فقط (مرتدي لبس الإحرام) ولو عايز وقت فاضي فالناس نصحتنا من بعد الفجر بساعتين لغاية قبل الضهر.. الطواف في الأدوار العليا بتكون مسافة الشوط أطول.
- في الطواف.. ماتزاحمش حد علشان مع التدافع سهل قوي ان حد يقع يتعور أو يحصل له حاجة.. كل ما تلاقي زحمة وسع دايرة الطواف (ابعد عن الكعبة).. وماتتحركش أبدًا عكس الاتجاه.. في نهاية الشوط السابع لو لقيت الناس زحمة.. اخرج بالتدريج بخطوات للدوائر الأبعد (ما تقطعش الصفوف بسرعة).
- بعد ما بتخلص الطواف في أماكن مخصصة لصلاة الركعتين لو كانت الدنيا زحمة ومفيش مكان تصلي في الصحن. ماتصليش أو تقعد في ممر علشان ماتقطعش طريق أو تضيّق على حد.
- وبالنسبة للسعي بين الصفا والمروة.. ففي الدور الأرضي هتشوف جبل الصفا و في مطلع (أرض مرتفعة تطلعها) لما تقرب من جبل الصفا ولما تقرب من جبل المروة.. فلو معاك حد رجله بتتعبه ممكن تسعى من الدور الأول مفيهوش مطلع ومش هتشوف الجبل قدامك بس ممكن تبص عليه من الشرفة.
- لو عايز تركب حاجة.. بس هتطوف من دور عالي أو من بعيد.. فعندك خدمة عربات القولف (الجولف) للطواف بسطح المسجد الحرام وحديثًا تم إتاحتها للسعي لكبار السن وذوي الاحتياجات الخاصة.. ب50 ريال للفرد في الطواف والسعي.. أماكن حجزها (مصاعد باب الملك عبد العزيز – مصاعد باب العمرة – سلالم أجياد الكهربائية).. بتشتغل من 4 عصرًا إلى 4 الفجر.. لو سألت عليها الأمن والمتطوعين مش هيعرفوها لأنها مش مشهورة.. لكن هيوصفولك خدمة تانية وهي خدمة العربات الكهربائية دي بتكون تذكرة الفرد للطواف أو السعي ب 57 ريال وبتكون سايق بنفسك العربية المفردة أو المزدوجة (رأيي لو مش محتاجها ماتركبهاش لأن الطواف بيها بيكون بعيد عن الكعبة وبتكون مشغول بالسواقة والناس اللي حواليك واسأل واتعلم طريقة سواقتها الأول علشان ماتخبطش حد.. والطواف في الصحن تحت أجمل بكتييير).. شوف الأنسب ليك.. وفي كراسي متحركة كهربائية وعادية.. مجانية وبفلوس اسأل عليها الأمن والمتطوعين لو محتاجها لنفسك أو لحد معاك.. (في ناس بتقول عند مكتبة السيدة خديجة.. أو عند المروة في المسعى.. أو عند العربات الكهربائية أو ممكن تتوفر في الفندق.. أسأل برضه)
- لما تخلص السعي.. لازم تتحلل من الإحرام.. للنساء.. لما تروح الفندق هيكون معاكي مقص صغير.. تقصي بيه جزء من شعرك. للرجال.. في ناس بتروح لحلاق في الحرم بعد باب المروة.. أو لما تروح الفندق بتقص جزء من شعرها بمقص.. أو بتجيب معاها ماكينة حلاقة وتقصر شعرها كله أو تحلقه.. وبيعملوا حساب لو هيعملوا عمرة تانية هيحتاجوا يحلقوا تاني. وكدة الحمد لله نكون أدينا مناسك العمرة وربنا يتقبل.
-هتلاقي الطواف والسعي زحمة خصوصًا في رمضان.. الناس بتقول ان اكتر وقت بيكون الحرم المكي فاضي هو بعد عيد الفطر وبعد الحج مباشرة.

9) أثناء تواجدك في الحرمين
- افتكر دايمًا الآية دي: (يَا أَيُّهَا الَّذِينَ آمَنُوا إِذَا قِيلَ لَكُمْ تَفَسَّحُوا فِي الْمَجَالِسِ فَافْسَحُوا يَفْسَحِ اللَّهُ لَكُمْ ۖ وَإِذَا قِيلَ انشُزُوا فَانشُزُوا يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ ۚ وَاللَّهُ بِمَا تَعْمَلُونَ خَبِيرٌ (11) سورة المجادلة
-لما تكون الدنيا زحمة والناس مش لاقية مكان تقعد.. جمّع حاجتك ضُمَّها عليك وقرب من اللي جنبك ووسع مساحة لجلوس ضيوف الرحمن.. وممكن تنده لهم لو مش شايفين المكان الفاضي.
- هتلاقي ناس من كل الجنسيات ومنهم كتير مايعرفوش عربي.. كل ما تفتكر نفسك أعلى من حد وللا أحسن منه.. قول: دة أحسن مني.. ربنا يقبلني أنا بعيوبي ومشاكلي وذنوبي دي كلها.. ربنا كرمنى وجابني هنا.. ربنا وفقني ويسرلي عمل طيب ربنا يقبله مني ويجعله خالصًا لوجهه الكريم.. وادعي للإنسان دة واستعيذ بالله من الكبر ومن كل حاجة وحشة.. سيدنا محمد عليه الصلاة والسلام قال : (مَنْ أُعجب بعمله حبِط أجره).. اللهم احفظنا.
- طول ما انت مسافر وانت بتتوضى ماتبلش الأرض مياة.. إلا في المغاسل المخصصة للوضوء.
- لو شوفت ورقة مرمية على الأرض أو أي حاجة تؤذي الناس.. شيلها وشرَّف نفسك بخدمة بيت الله الحرام أو خدمة مسجد سيدنا النبي عليه الصلاة والسلام.
-ماتسيبش شنطة أو حذاء أو أي حاجة في الحرم.. لأنها هتترمي ومش هتلاقيها.. ولو روحت تدور في مركز المتعلقات بيكون في كذا مركز وآلاف الشنط وغالبًا محدش بيلاقي حاجته.
- في أماكن مخصصة للصلاة للنساء والرجال (اسأل على مصلى النساء أو الرجال) غالبًا هتلاقي مصلى فاضي في التوسعات.. دي ممكن تقعد فيها براحتك شوية لأن في الصحن الحركة كتير.. هيقومك كل شوية للتنظيف أو لتوسيع دائرة الطواف لزيادة عدد الناس أو بدون سبب.
- ملابس الإحرام.. للرجال.. طقم إحرام يكون بدون خياطة وله أنواع كتير.. وله طرق تثبيت مختلفة.. وقطعة داخلية اسمها (سترة) (ودي اختيارية).. وحزام للأوراق والفلوس وله مقاسات..
- ملابس الإحرام.. للنساء.. مفيش له شروط محددة.. غالبًا لبس محتشم غير ملفت.. مثلًا عباية واسعة.. طولها مناسب (علشان ماتتكعبليش أو تضطري تفضلي ماسكاها) وطرحة.. أغلب الناس هتلاقيهم لابسين عباية سوداء.. ممكن تلبسي زيهم لو حابة وطرحة بيضاء أو فاتحة علشان تبعد الشمس.. العباية البيضاء هتتوسخ بسرعة.. وممكن ترتدي ملابس قطنية تحت العباية بنطلون وتيشيرت مثلاً.
- أول ما تدخل بلاط الحرم المكي أو المدني.. اخلع الحذاء اللي انت جاي بيه من الشارع.. الرجال.. يا إما بدون حذاء أو ترتدي شبشب بدون خياطة يكون جديد نظيف.. تخصصه للحرم.. وعند الخروج تبدل لحذاء الشارع.. للنساء.. يا بدون حذاء أو شراب.. أو ترتدي شراب ثقيل ثابت في القدم.. أو حذاء مريح جديد نظيف مخصص للحرم.
- الشراب الثقيل اسمه.. (شراب فوطة كاملة أو شراب نص فوطة.. اللي يريحك.. النص فوطة بيكون مبطن وسميك في أسفل القدم بس).. نوع الفوطة الكاملة مريح أكثر مع المشي الكثير.. هاتي رقبة الشراب عالية شوية علشان مايتخلعش منك..
-ممكن تكتفي بالشراب أو لو حبيتي تلبسي حذاء.. موجود في الصيدلية (فَرش سيليكون).. يوضع داخل الحذاء.. بيكون مريح أكثر في المشي.
-مع الازدحام غالبًا الشبشب هيتقطع.. حد يدوس لك عليه يتقطع.. كان فيه شباشب كتير واقعة على الأرض أثناء الطواف وممكن تكعبل الناس. لو حد عايز يلبس صندل أو حاجة ثابتة في الرجل بتتقفل يكون أحسن.. مرضى السكر من النساء.. الأحسن يلبسوا حذاء سكر مقفول.. نظيف مخصص للحرم علشان يحموا رجلهم وتحته شراب مريح مش ضيق أبدًا.. فيه في المحلات.. شراب سكر.. بيكون طري والأستيك بتاع خفيف (طبقة واحدة).. ممكن تجيب مقاس مضبوط علشان مايضغطش على الأصابع ويعمل كدمة -بعد الشر- أو يمنع وصول الدم للرجلين.
- ماتجربش حذاء أو شبشب جديد لما تسافر.. جربه في البيت الأول واتأكد أنه مريح.
- شنطة ظهر تكون بكتافات عريضة (تشبه شنطة المدرسة) لتكون مريحة أثناء المشي.. مش حبال.
- الأشياء المهمة لا تكون في شنطة الظهر أبدًا.. لأنها مع الازدحام تكون سهلة السرقة -اللهم احفظنا-.. اجعل بها الحذاء والمناديل والطعام البسيط وزجاجة ماء.. وتأكد أن يدها متينة.
- أمِّن على ورقك وفلوسك كويس مع الازدحام لتفادي السرقة - اللهم احفظنا- .. ممكن تثني بداية لبس الإحرام على الحزام اللي فيه الفلوس.. علشان مايبانش.. أمان ليك.
- أفراد الأمن بينظموا آلاف الناس بمئات اللغات.. فاسمع كلامهم لأن دورهم مهم جدًا وركز في عبادتك بس.
- ماء زمزم -ما شاء الله- متوفر في كل مكان في الحرم المكي والحرم النبوي.. اشرب واملأ مياة زي ما تحب بس ماتوقعش نقطة مياة على الأرض علشان ما تتسببش ان انسان يتزحلق أو يتكسر -بعد الشر-.. لو شفت مياة واقعة امسحها بمناديل وقول للأمن والمتطوعين.
- أماكن الوضوء متوفرة داخل المسجد الحرام و داخل المسجد النبوي ولو ملقيتهاش ممكن تخلي معاك إزازة مياة صغيرة وفوطة ومناديل تتوضى على جنب ومتوقعش نقطة مياة على الأرض.
- في إمكانية إصدار تصريح للعمرة من تطبيق نسك Nusuk لو حبيت تعمله بس الأمن ماسألش عليه.. بعد ما بتعمل العمرة التطبيق بيسألك : هل أديت مناسك العمرة؟ لو نعم.. بيظهرلك شهادة باسمك انك أديت العمرة.
- لو رجال الأمن حاطين حاجز يمنع العبور.. لازم تلتزم بيه.. لأنك لو اخترقته هيطلب جواز سفرك ويعمل لك مشكلة.
- لو هتصور.. خللي بالك ان التصوير لا يعطل طريق ولا تصور ناس وشها ظاهر بوضوح ولا تصور رجال الأمن.
-لو توهت.. أو موبايلك فصل أو معرفتش تتواصل بحد معاك.. خلَّص العمرة وروح الفندق.. سواء مشي أو بباص الفندق أو بتاكسي بالفلوس الاحتياطي اللي معاك.
- لو توهت ومعرفتش تروَّح.. اسأل على مركز رعاية التائهين في الحرم.. ولو شوفت طفل أو حد من كبار السن تايه وديه أو قول لهم يودوه لمركز رعاية التائهين.
- في ناس بتلبس لبس الإحرام علشان تدخل الصحن وهي مش داخلة تعمل عمرة.. لأنه مسموح دخوله للرجال اللي هتعمل عمرة فقط.. وفي ناس يتحجز الطواف بس بالعربات الكهربائية ويتكمل بالعربية للسعي كمان في وسط الزحمة من غير ما يدفعوا ثمنه.. نصيحة بلاش تعمل حاجة غلط وانت رايح تعمل عبادة.
- لو لقيت حد بيوزع حاجة.. خد واحدة بس وسيب لغيرك.. افتكر الآية (ويؤثرون على أنفسهم ولو كان بهم خصاصة).. خُلُق الإيثار ربنا بيحبه.

10) المسجد النبوي وحجز الروضة الشريفة
الحمد لله زرنا سيدنا النبي عليه الصلاة والسلام بفضل وكرم ربنا.. المسجد ليه أبواب مخصصة لدخول الرجال وأبواب مخصصة للنساء وكذلك الساحات اللي هتضطر تصلي فيها لو رحت متأخر ولقيت المسجد ممتلئ (يضعوا شاشة على رقم الباب ممتلئ فيمنع الدخول أو متاح فتدخل للمسجد)
- الرجال بيدخلوا للزيارة والسلام على سيدنا النبي عليه الصلاة والسلام وأصحابه الطيبين الطاهرين من باب رقم 1.. باب السلام وبيعدُّوا عند المقام الشريف ويسلِّموا.
- النساء بيدخلوا من باب رقم 2.. باب سيدنا أبو بكر الصديق رضي الله عنه أو من باب 27 أو باب 32.. اسألي الأمن على (دخول الروضة الشريفة للنساء بدون حجز).. بيكون بعد الفجر وبعد العشاء.. بتدخلي من باب محدد (هيقولولك عليه) وبعدين بيدخَّلوا مجموعة كل نص ساعة.. بتكوني قريبة جدًا من المقام ومن منبر سيدنا النبي عليه الصلاة والسلام.
- المسجد النبوي -ما شاء الله- واسع وفيه جزء أساسي (المسجد القديم) وفي أجزاء مضافة له (توسعات).. حاول تلف وتمشي حوله كله علشان تشوف القبة الخضراء وتكون بجوار المقام الشريف من الخارج.
- دخول الروضة الشريفة بالحجز للرجال والنساء.
- الحجز بيكون للفرد مرة واحدة كل 365 يوم.. عن طريق تطبيق (نسك) وتطبيق (توكلنا خدمات) [الرابط بالأسفل] بتسجل عليهم باسمك ورقم جواز السفر ورقم التأشيرة ورقم هاتفك.. لرؤية الأوقات المتاحة لحجز الروضة الشريفة.. احنا معرفناش نحجز.. في تطبيق (توكلنا خدمات).. تضغط على (الخدمات) من الأسفل.. ثم الخدمات الدينية .. ثم حجز الروضة الشريفة.. شوف المواعيد المتاحة كل شوية.. على رأس الساعة أو النصف ساعة.. بيفتح خمس دقايق ويقفل تاني.. لما بتلاقي موعد.. بتحجز وتكون على الباب قبلها بساعة.. تقف في طابور.. والأمن بيفحص الكود اللي التطبيق بيرسله لك قبل الموعد بساعتين.. وبيسمح بالدخول لمدة نصف ساعة أو أقل.
- في ناس بتسأذن مشرف فوج ويدخلوا معاه.. بس اختار فوج لناس شبهك في الشكل أو الجنسية.
- في دخول الروضة الشريفة.. كبار السن يفضل يكون معهم كرسي أو يأخدوا كرسي من الكراسي الموقوفة للحرم لأن الطابور طويل.
- هتلاقي في الحرم المكي أو الحرم النبوي كراسي كتير مكتوب عليها وقف للحرم.. استعملها طول ما انت في الحرم.. كبار السن اللي عايزين يمشوا بنفسهم في السعي ممكن يستخدموها كعكاز ويريحوا ويقعدوا عليها على جنب كل شوية.. بس ما تحركهاش من الحرم.. ماتروحش بيها الفندق وتقول هارجعها بكرة.
- طول ما انت مُحرِم ماتموتش أو تؤذي أي حيوان في الحرم (في مكة كلها)
- مكة كلها حرم.. وانت داخل مكة هتلاقي علامة (بوابة) مكتوب عليها (بداية حد الحرم).. ووانت خارج من مكة.. أو لو رحت مسجد السيدة عاشة رضي الله عنها (مسجد التنعيم).. هتلاقي علامة مكتوب عليها (نهاية حد الحرم)..
-ماتقساش على حد مرافق ليك تعبان سيبه يصلي في الفندق وانزل انت.

11) الطقس:
شوف الطقس على جوجل قبل ما تسافر علشان تعرف الملابس اللي تاخدها معاك
- عمومًا مكة حر شوية والمدينة جوها حلو.. حاول تتفادي الشمس.. لو حد ضغطه بيعلى فربع ساعة بس تحت الشمس كفيلة تعلي ضغطه.. لو الحر شديد ممكن تتفادى النزول بالنهار.. أو تفضل دايمًا في الظل ولو اضطريت امسك شمسية أو هات شمسية ثابتة في الرأس و استخدم كريم شمس واشرب مياة كتير.

12) الأكل:
خد أكل من هنا معلبات فول – جبنة مثلثات – حلاوة طحينية - خيار طماطم موز أخضر تفاح تونة ليمون عيش بسكويت تمر باتيه مغلف مخبوزات من الفرن – ممكن تاخد فراخ بانيه مشوية أو كفتة مشوية بس مش هاتقعد معاك كتير يومين ثلاثة بالكتير.
العيش هناك طعمه حلو والرغيف بريال أو بنصف ريال في السوبرماركت.. اسمه عيش تميس وعيش بُر.
خد معاك حاجات جامدة تتحمل السفر وأول ما تروح الفندق دخلها الثلاجة.
-الأكل في المطاعم معظمه فيه بهارات كتير غريبة.. لو البهارات بتتعبك أو عندك حساسية بلاش تجربه.
-السخان الكهربي.. لو الغرفة فيها كاشف أدخنة مش هتعرف تشغله.. علشان هيشغل إنذار الحريق في الفندق كله..
فلو كنت قاعد في أمان الله في الفندق ولقيت إنذار الحريق اشتغل (جرس عالي).. ماتتخضش وخليك هادي وإعرف ان غالبًا حد يا إما أشعل دخان أو شغَّل سخان داخل الغرفة.. افتح باب غرفتك وشوف الدنيا برة غرفتك حالتها ايه.. ناس بتجري وللا الموظفين بيطمنوا الناس ان مفيش حاجة.. واعرف طريق مخرج الطوارئ احتياطي وماتستخدمش الأسانسير ساعتها أبدًا.
-المياة.. اعتمد على مياة زمزم في الشرب.. أملأ من الحرم زي ما تحب.. بس تكون أوعية مقفولة كويس ماتنقطش أو تتدلق على الأرض وتأذي الناس.. أو مياة معدنية لو عايز.. لكن ماتشربش مياة من حنفية الفندق ولا تطبخ بيها.
-هات معاك شاي وسكر ملح وبواكي أعشاب وغالبًا هتلاقي غلاية كهرباء في الفندق.. لو مالاقيتش اطلبها منهم. واطلب منهم فوط وشامبو وصابون وكوبايات.. لو استلمت الأوضة قبل ما يحطوهم.
-في معلبات خضار ولحمة من شركة قها.. جاهزة للأكل.. جربها الأول وممكن تعتمد عليها في الغداء هناك لو تحب.
-تجنب انك تاخد معاك أعشاب أو عطارة مطحونة في أكياس بلاستيك.. انت اللي معبأها.. علشان ماتعملش مشكلة في المطار.. خد حاجات معبأة وعليها اسم الشركة أءمن.
-خد معاك اطباق بلاستيك صغيرة وسكينة ومعالق هتفيدك جدا ولو عرفت خد معاك كسرولة خفيفة احتياطي.. علشان لو الفندق فيه سخان ساعات مش بيحطوا معاه حلل او أي أواني.. فمش هتعرف تستخدمه.

13) الأدوية
-خد معاك أدويتك كلها اللي بتاخدها كل يوم واللي نادرًا ما بتحتاجها وأدوية احتياطي.. مضاد حيوي – دواء برد – إسهال – إمساك -مطهر معوي – خافض حرارة – استحلاب للزور – كريم للشد العضلي – علاج تسلخات والتهابات الجلد – فازلين لأنه بيقلل احتكاك الجلد مع المشي الكتير وبيرطب كويس لو جلدك بيجف بسرعة - دواء أو فوار حموضة - علاج بواسير - كريم للحروق / للجروح / للكدمات / كريم وأقراص مسكن / كريم وأقراص مضاد التهاب – كريم أو جيل مضاد للتورم (كذا عبوة) - علاج لقرح الفم - كريم مضاد حيوي للالتهابات خارج الفم – دواء سكر وضغط والكوليسترول لو بتحتاجهم (وهات منهم شريط زيادة عن أيام رحلتك) مثلا.. لأن الأدوية هناك غالية وفي حاجات مش هاتعرف تشتريها إلا بروشتة دكتور.. ممكن تاخد الشرايط بس بدون العلب.. علشان ماتملاش الشنطة.
-ضروري تروح للدكتور قبل السفر بفترة كافية وتضبط أدوية السكر والضغط.
-تجنب الشمس على قد ماتقدر.
-هتقابل خلال لرحلتك.. فترات جلوس طويلة سواء في الطيارة أو في مواصلات الانتقال بين المدن.. خللي ركبتك دايمًا مفرودة بزاوية أكبر من تسعين درجة.. وحرك رجلك باستمار واعمل تمرينات أثناء الجلوس (دور عليها على النت).. زي انك تثبت كعبك على الأرض وترفع مشط رجلك.. أو انك تثبت قدم رجلك وترفع كعبك.. وتكررها خمس مرات كل عشر دقايق أو ربع ساعة.. لأن عدم حركة الرجل فترة طويلة بيعمل عدم سريان للدورة الدموية بشكل منتظم.. اللي ممكن يعمل تورم أو -بعد الشر- يعمل تجمع للدم في الجزء السفلي من الجسم..
- مخدة الرقبة هتسهل عليك فترات الجلوس الطويلة في المواصلات.

14) الهدايا
- رأيي.. اشتري هدايا بسيطة من مصر أوفر.. سجادة صلاة مثلُا.. ولو حبيت تشتري عجوة المدينة (بلح لونه أسود) من المدينة المنورة ومياة زمزم توزعهم على حبايبك.
- ممكن تملى أزايز صغيرة مياة زمزم وتغلفها كويس وتحطها في شنطة بطن الطيارة.
- في المطار في مياة زمزم مغلفة بتتباع وبتكون مغلفة بكرتون.. اكتب اسمك عليها بخط كبير علشان تعرف تاخدها من سير الشنط لما توصل.
- في مصاحف مجانية بتتوزع في الحرم المكي وفي الحرم النبوي.. مسموح لك تاخد واحد بس.. اسأل الأمن والمتطوعين على أماكن توزيعها.. الناس بتقول في الحرم المكي.. (التوسعة السعودية الثالثة باب 114 بعد صلاة العشاء يوم الأحد والإثنين والثلاثاء) و (باب المروة رقم 25 سطح القشاشية من الساعة 9ص إلى الساعة 10ص يوم الإثنين والثلاثاء والأربعاء) و (عند باب الملك فهد.. تنزل إلى البدروم عند سلم الشبيكة الكهربي أو سلم الملك فهد الكهربي.. بيتوزع كل يوم بعد صلاة العصر)

15) الناس والمعيشة في السعودية
-مش هاتحس بغربة.. لأن الناس ودودين وبيساعدوا بعض.. والحمد لله ان اللغة واحدة.
-واحنا في مكة كنا بنشوف مصريين كتير جدًا في الحرم.
-الحمد لله كل السعوديين اللي قابلناهم كانوا كويسين ومرحبين بينا وبيساعدونا.. ربنا يبارك لهم في بلادهم.
-لازم تفاصل.. قلل النص بعدين زود خمسة او عشرة ريال في كل مرة.. انت بالنسبه لهم سائح مش عارف سعر حاجة.. فبيقولك أضعاف السعر الحقيقي.. جايز يكسب منك فلوس أكتر.. هما بيحبوا الفصال.. بيستمتعوا بيه.. مش بيضايقهم.. لو وصلت لسعر مناسب ليك او أغلى شوية.. تمم الخدمة.. لو ما وصلتش.. شوف حد تاني. بس ما تضيعش وقتك في الفصال.. ممكن تقدِّم ثلاث عروض سعر وشوف حد تاني.. ابعد عن الحلفان أو محاولة إقناعه بالكلام او بحكي مواقف علشان هتضيع وقتك.. وممكن تسأل واحد سعودي او عايش هناك عن السعر التقريبي للحاجة.
-جواز سفرك خليه معاك على طول.. في ناس بتسيبه في الفندق وتكتفي بصورة منه ورقية مطبوعة أو على الموبايل.. رأيي انه يكون.. للرجال.. في حزام الإحرام المغطى بلبس الإحرام معاك (اثني الجزء السفلي من لبس الإحرام وخليه يغطي الحزام).. وللنساء في شنطة كروس صغيرة (توضع يد الشنطة علي كتف واحد ويكون جسم الشنطة على الجانب المقابل للكتف الموضوع عليه اليد)..
-غرفتك في الفندق ممكن أي حد يفتحها وانت برة.. فحافظ على حاجتك كويس.

16) تنظيف الملابس
- غسيل ونشر الملابس.. الأحسن خد معاك هدوم كفاية وعلَّق في الحمام كيس مخصص للملابس المتسخة ولما ترجع مصر اغسلهم.. لو اضطريت تغسل حاجة بسيطة بشكل يدوي على الحوض.. ممكن تسييها تنشف في الحمام (علقها على شماعة أو في البانيو) وافتح التكييف أو مروحة الحمام.. لو اضطريت تغسل بشكل أساسي.. اسأل الفندق لو متوفر غسالات واماكن للنشر في سطح الفندق..
- بأي حال ماتنشرش داخل الغرفة خارج الحمام.. خصوصًا لو في موكيت على الأرض لأنه هيكمكم وهيعمل ريحة وحشة للأوضة كلها.

17) الإنترنت وخط الموبايل
- أساسي جدًا تاخد شاحن موبايل بفيشة ثلاثية.. لأنه لو مش معاك.. الموبايل هيقفل منك ومش هتعرف تتصل بأهلك وهتضطر تروَّح على الفندق علشان ماتقلقهمش عليك.
-علشان تفعَّل خدمة التجوال والخط يشتغل معاك هناك لما تسافر.. لازم تطلب كود التفعيل من موبايلك وانت في مصر.. وبيكون مختلف لكل شركة.. اسأل عليه.. وكذلك باقة الانترنت.. لازم تشتريها ومن انت في مصر وهتشتغل وتتخصم فلوسها اول ما توصل السعودية.. لو روحت هناك وانت مش مفعل خدمة التجوال ولا شاري باقة انترنت.. الخط المصري بتاعك مش هيشتغل.
-اتصل بخدمة العملاء الخاصة بشبكتك وانت في مصر وافهم منهم تشتغل ازاي بخطك في السعودية وتعمل ايه قبل ما تسافر وكود تفعيل التجوال وهتتحاسب ازاي واكتب كل حاجة وراهم في المكالمة..
-كانت الأسعار (بس اتأكد) لأي موبايل داخل السعودية سواء خط مصري أو سعودي في فودافون واتصالات ووي.. سعر الرسالة ٥ جنيه.. وسعر الدقيقة سواء ارسال او استقبال ٨ جنيه.. وسعر الميجا الواحدة ١٠ جنيه.. فكان لازم تشتري باقة انترنت.. بيعملوا عروض عليها.. شوفها في كل الشبكات لو عندك كذا خط واختار الخط اللي هتشتغل بيه هناك.
-لو كلمت حد من أهلك اللي مسافرين معاك.. انتو الاتنين هتدفعوا سعر الدقيقة. ارسال واستقبال.. الرنة ببلاش.
-اشحن خطك برصيد يكفيك وزود احتياطي أو ممكن تشحن هناك لو بتعرف تستخدم التطبيق وكارت فيزا محلي او تقول لحد يشحن لك رصيد.
-معظم الفنادق فيها واي فاي (واتأكد وانت بتحجز).. تقدر تعتمد عليه بشكل أساسي.. لكن الانترنت في الشارع هتحتاجه لو قررت تطلب سيارة من تطبيق Bolt توصلك.. أو لو حبيت تتواصل مع أهلك واتساب أو ماسنجر او فايبر.. لكن التواصل في رأيي.. مكالمة دقيقة ب٨ جنيه.. هتحل الموضوع..
-رأيي الأسعار دي والتعامل بخطك المصري أوفر لك بكتير من شراء خط سعودي مقارنة بسعر الريال اللي هو ١٣ جنيه.. شوف الأنسب ليك حسب مدة إقامتك.
-الخط السعودي يا إما بيتوزع مجانا وانت تشحنه.. يا إما بتشتريه من مكاتب شركات الاتصالات.. سعره في المطار غالي عن سعره بره.. وفي شركات شبكتها شغالة كويس وفي شركات شبكتها ضعيفة ووحشة وبيكون الخط معاه دقايق وباقة نت وتشحن تاني لو خلصتهم.
-حافظ على شحن الموبايل لأنه أساسي معاك وأمان ليك.. افصل عنه تحديد الموقع المستمر وبيانات الهاتف والواي فاي واقفل التطبيقات المفتوحة وشغَّل وضع توفير البطارية أو البطارية الفائقة.. حاول تستخدمه في أضيق الحدود.. وماتخليش البطارية تقل عن النص. واخرج بيه من الفندق مشحون ١٠٠٪.. وممكن تاخد معاك باور بانك Power Bank لو تحب.
-لو خطك المصري اشتغل هناك وانت مش عامل باقة نت.. هتتحاسب على الميجا ب ١٠ جنيه.. الجيجا ألف ميجا.. رصيدك كله هيطير بسرعة جدًا لو انت كارت ولو فاتورة هتدفع كتير.. خللي بيانات الهاتف مقفولة إلا للضرورة.. ولازم تعمل باقة انترنت (سعرها أوفر ١٠ جيجا مثلا ب ٣٠٠ جنيه) .. وحدد التطبيقات اللي تشتغل بيها بس من إعدادات الهاتف (علشان الباقة ماتخلصش بسرعة من تطبيقات انت مش محتاجها).. اسمح لواتساب وبولت بس مثلا حسب احتياجك.. واسمح لكل التطبيقات تشتغل في الواي فاي.
-ما تعتمدش ان الحرم فيه واي فاي.. لأننا مالقيناهوش.

18) المزارات في مكة والمدينة
- الناس بتقول انهم هناك بيتعرفوا على مسئول أحد الأفواج في شركة سياحة وبيطلعوا المزارات مع الفوج.. ممكن تكتب منشور على الفيس في جروب خاص بالعمرة.. هتلاقي ناس بتنظم رحلة المزارات في مكة أو المدينة.
- وفي أتوبيس سياحي في المدينة بيعدي على كل المزارات.. وبتسمع تعليق صوتي وممكن تنزل المزار لمدة نصف ساعة وتركب الباص تاني بنفس التذكرة وهكذا.. لكن الدفع بكارت الفيزا فقط.. اسأل عليه هناك لو تحب.

19) برنامج مقترح لرحلة العمرة
مثال: بداية الرحلة يوم الثلاثاء - نهاية الرحلة يوم السبت
*اليوم الأول ثلاثاء
- الساعة 4 صباحا طائرة من القاهرة إلى المدينة
- وصول المدينة بإذن الله 7صباحا
- الانتقال من مطار المدينة إلى الفندق: عن طريق تطبيق بولت أو ركوب تاكسي أو السؤال في المطار عن حافلات إلى الحرم المدني ثم تاكسي أو بولت Bolt أو أوبر للفندق.
- استلام الفندق (يمكن تحديد وقت تقريبي للاستلام المبكر في الصباح.. عند الحجز)
*مبيت في الفندق ليلتان ( ثلاثاء وأربعاء).. مغادرة الفندق يوم الخميس صباحًا
- خلال يومين المدينة.. الذهاب للحرم المدني بإذن الله مشيًا.. أو بباص مجاني خاص بالفندق (لو متوفر).. أو باص نقل عام (حافلات المدينة).. أو تطبيق بولت.. أو تاكسي (حسب بعد الفندق عن الحرم)
*يوم الخميس صباحا..
- الانتقال من المدينة إلى مكة عن طريق سيارات H1 أو سيارات هايس (تشبه الميكروباص ولكنها مريحة).. من أمام موقف مول توب تن Top Ten بجوار الحرم المدني.. الفرد بحوالي 70 ريال أو حجز باص نورث ويست أو قطار الحرمين السريع
ثم تاكسي أو تطبيق Bolt للفندق (أو يمكن تأجير سيارة من موقف توب تن في المدينة إلى الفندق في مكة مباشرة)
-استلام الفندق في مكة
*مبيت في فندق مكة ليلتان ( خميس وجمعة) مغادرة فندق يوم السبت صباحًا (أو الاتفاق معهم حسب موعد الطائرة)
- خلال يومين مكة.. ذهاب للحرم المكي بإذن الله.. مشيًا أوعن طريق باص مجاني للفندق أو باص نقل عام (حافلات مكة) ب 4 ريال للفرد كاش (ذهاب وعودة بتذكرة واحدة) أو تاكسي أو تطبيق بولت أو أوبر
- إذا أردت أداء عمرة جديدة وأنت في مكة.. تذهب إلى مسجد السيدة عائشة رضي الله عنها (مسجد التنعيم).. عن طريق باص نورث ويست ب 5 ريال (تذكرة ذهاب وعودة) من موقف جرول أمام الحرم المكي أو تطبيق بولت أو تاكسي إلى المسجد من الفندق والعودة بباص نورث ويست من المسجد للحرم.
*يوم السبت صباحا..
- الانتقال من الحرم المكي إلى مطار جدة.. للعودة إلى القاهرة.. مع مراعاة التواجد في المطار قبل موعد الطائرة بثلاث ساعات كاملة.. عن طريق:
-- حجز باص نورث ويست من موقف جرول بمكة (أمام الحرم) إلى مطار جدة ب 25 ريال للفرد
-- أو عن طريق باص مجاني من موقف وقف الملك عبد العزيز (اسمه خدمة النقل الترددي للمعتمرين).. (لكن لا تعتمد عليه لأنه يعمل من 12ظهرًا إلى 12 صباحا.. وساعات لا يعمل)
-- أو تاكسي أو تطبيق بولت أو أوبر من الفندق إلى مطار جدة
- عودة بسلامة الله من مطار جدة إلى القاهرة بالطائرة مساء السبت
20) تكلفة الرحلة
- لو اتبعت كل الخطوات اللي في الدليل.. ستصبح التكلفة الإجمالية للرحلة حوالي 20 ألف جنيه للفرد.
- لو حجزت الطيران والفنادق بدري – قبل السفر بشهر أو أكثر – أو لو حجزت في فترات العروض.. هتاخد أسعار أحسن والتكلفة الإجمالية هتقل.
- مواقع السفر بتنصح بأنك تدخل يوم الثلاثاء تحجز الطيران علشان تلاقي أسعار أقل.

21) الروابط في أول تعليق

بس كدة.. ان شاء الله الدليل دة يساعدك تتوكل على الله وتطلع العمرة.. ربنا يكرمنا ويسعدنا ويرضى عنا ويوفقنا لما يحب ويرضى ويهدينا الصراط المستقيم ويرزقنا حج بيته الحرام وزيارة سيدنا النبي عليه الصلاة والسلام ويتقبل منا.
منقول للإفادة.. ربنا يبارك لمن كتبه ومن نشره..
انشره لو تحب
[ندعوك للتسجيل في المنتدى أو التعريف بنفسك لمعاينة هذا الرابط]