جولة مع فواكه اللحوم

جولة مع فواكه اللحوم
المشكلة ببساطة إن أسعار اللحوم ارتفعت بشكل خرافي، وبقت ناس كتير جدا مش قادرة على شراء اللحوم
وبقوا ميقدروش يشتروا غير فواكه اللحوم، فواكه اللحوم للإخوة العرب ده مصطلح مصري بيطلق على حوايا الذبيحة، يعني محتويات تجويف جسم الذبيحة بالإضافة للأرجل والرأس
فواكه اللحوم برغم إنها مبقتش رخيصة تقريبا بقت بسعر اللحوم نفسها من فترة قريبة، لكن برضه تعتبر مخرج مناسب للي يقدر على سعرها‍�
وده خلى ناس كتير بتسأل، هل ممكن نستبدل اللحوم بالكرشة و الفشة والممبار و لحمة الراس و نحصل على نفس القيمة الغذائية للحم اللي مش قادرين على تمنه ده
خصوصا إننا كمصريين بطبيعتنا بنحب فواكه اللحوم وتعتبر من أشهى الأطعمة بالنسبالنا، ولها عندنا وصفات طبخ كتير جدا بتناسب جميع الأذواق.
هقولكم
مبدأيا فواكه اللحوم لها قيمة غذائية محترمة، ولو اعتبرناها أقل فائدة من اللحوم فاحنا كده بنظلمها
فواكه اللحوم لها فوايد كتير جدا منها مثلا
مصدر للحديد الحيواني(حديد الهيم) وده بيتميز عن الحديد النباتي في إن قدرة الجسم على الإستفادة منه أكبر، وكمان فايدته مش بتتأثر كتير بعادتنا الغذائية الغلط زي شرب الشاي بعد تناول الطعام مثلا
مصدر للبروتين الحيواني طبعا، وده بروتين عالي الجودة وفوايده معروفة في دعم النمو و بناء العضلات ودعم الجهاز المناعي، ويكفي نعرف إن أنسجة الجسم الأساسية المختلفة معظمها بروتين
مصدر للفيتامينات والمعادن وخاصة فيتامين ب12 وفيتامين أ والسلينيوم والزنك وحامض الفوليك وغيرهم.
مش بتحتاج فترة كبيرة للتسوية وده بيخليها تحتفظ بقدر كبير من فوايدها لأنها مش بتتعرض للحرارة لفترة طويلة.
مصدر للكولاجين، وده بيخليها تدعم صحة المفاصل وتقي من خشونتها، وتدعم صحة والشعر والبشرة.
هتستغربوا لو عرفتوا إنها ممكن تدعم برامج إنقاص الوزن، لأن البروتين بيعزز الإحساس بالشبع وده ممكن يساعد في تقليل كميات الطعام في العموم.
فإجابة السؤال هل ممكن فواكه اللحوم تبقى بديل للحوم نفسها، أها ممكن جدا وتبقى بديل ممتاز كمان.
لكن هنا لازم نقول معلومة مهمة جدا، فواكه اللحوم محتواها من الكوليسترول عالي جدا، أعلى منه في اللحوم الحمرا، وده بيخليها مناسبة للسلام الأصحاء لكن متناسبش مرضى بعض الأمراض المزمنة
مين هما المرضى الممنوعين من فواكه اللحوم
مرضى ارتفاع ضغط الدم.
مرضى السكر.
المرضى اللي لهم تاريخ مرضي مع الجلطات بأنواعها.
مرضى القلب.
مرضى الكبد.
مرضى قصور الكلى.
مرضى النقرس.
كمان لو هناكل فواكه اللحوم نراعي الآتي
لازم تكون من مصدر موثوق، لأنه يجرى عليها اللي بيجرى على احتياطات أكل اللحوم نفسها‍�
لازم نراعي نظافتها كويس جدا قبل الطهي، وخاصة الكرشة والممبار.
احتياجات الشخص العادي من البروتين الحيواني عموما مش كبيرة، مفروض متتعداش 100 جرام يوميا، حضرتك مش بطل كمال أجسام ولا رفع أثقال️‍� علشان تاخدلك نص كيلو لحمة في اليوم، فطبعا لازم نراعي عدم الإسراف لأنه الإسراف في المفيد بيحوله حتما لمضر، ماهو أعضاء جسمك لها طاقة في التعامل مع مخرجات التمثيل الغذائي لازم تراعيها علشان تحافظ عليها‍�.
نراعي اختيار طرق طبخ متستعملش فيها كميات كبيرة من الدهون، ويفضل متستعملش فيها دهون أصلا، هي فواكه اللحوم دهونها عالية لوحدها فمش ناقصة نضيفلها احنا دهون كمان
ناكل سلطة خضرا، وخاصة #الخضروات_الورقية، احنا نسبة كبيرة من أمراضنا سببها إهمالنا للسلطة الخضرا اللي وصل لشبه إقلاع عن تناولها‍�
نشرب ميه كتير علشان نساعد الجسم في التخلص من مخلفات التمثيل الغذائي بالطرق الطبيعية، علشان المخلفات دي متتراكمش في الجسم وتسممه وتسببلنا أمراض‍�
كقاعدة عامة في الطعام عموما، الحركة بركة، مينفعش آكل وبعدها أنام أو اقعد على السوشيال ميديا أو اتفرج على التفلزيون، من أهم فوايد الغذاء عموما إنه مصدر طاقة، لو أنا مستعملتش الطاقة دي زي ماهو غالبا بيحصل، هتكون نتيجة ده كل المشاكل الصحية اللي بقى الكل بيشتكي منها، نحرص على الحركة‍� و ممارسة الرياضة لأنها أرخص وأضمن وسيلة وقائية وعلاجية لأمراض كتير جدا
منقول دكتور كشكول ‍��‍�
المصدر:
   #منتدى_المركز_الدولى