أزمة ضمير بقلم شاعر العامية عبدالخالق شويل (القصيدة باللهجة المصرية)
أنا بشكـُر الشِعر واشكـُر دمعتو الحَره
خلاني أقول كلمتي في الحق لو مُـــره
راكِب فلوكة زجل،فارد شراعي فصيح
معجون بميِّة أدب، معرفشِ غير حُره
علِمني (يوسف شِتا)أغزل حروفي شال..(فنان شعبي أصيل)
واحس بلي وقع واسنــد معاه لو مال
الكِلمة مقياس بيعرف وزنــَّها فنــان
صادق مُش الصدق بينجي من الأهوال..؟
أمَر م الصبـــر حاجتك للعويـل مرَّه
الحُر لو جاع ف بيتو بيحمدو بره
ماتهنش نفسك كرامتك هي كُل ماليك
ل تعُض ايدك ندم والحَوجه ليه مُره..!!
السِت فوق الدماغ تنشال م تألمهاش
نوارة البيت ولو دبلت م تكسرهاش
شورها وشاور وخد بالرأي لوصايب
ولو ماختش برأي الست م تعبهاش
مجني عليه والعسل جاني وشمعو فيه
وذنبي إني بدرت السِدر يوم حواليه
بحب لكن بخاف من لسعةِ الملِكات
جاني ومجني على قلبو ومين يداويه..؟
توب الرجولة على خايب الرجا بيجُــر
مايخيلش فيه إلا راجل وابن راجل حُر
إلبس مقاسك يكون ع الأد مِتفصـــل
الصقر لو حطَّ ع الجيفه مايبقاش حُـر
طب يابني احسب حساب العِشرة مِنك ليه
ليه اللي طبطب على قلبك تقطــَّع فيــــه..؟
اسأل ولو جبر خاطِر مرة تشفع ليك
فين اللي ركِب جناح عباس ياخلق الاقيـه..؟( عباس بن فرناس)
مايبعش ودك خلاف اللي ماعونه صدي
والزهر لو تقطفــــو بدري بيبقى ندي
دخلت سوق العشم مالقيتش غير بتمن
قـالو السلام سد خانه , قلت عند ردي
اسند على الله بلاش تسند على الجُدران
خليك ف رُكن الملِك سيبك من الإنسان
علِم على اللي يخونك مرة مِش مــرَّات
والزم حدودك مع اللي تلتقيـــه انسان
إياك وسِكة قليل الأصـل والمعيوب
وسِكة اللي لِبس توب الأدب مقلــــوب
وسِكة اللي شِبع والجوع مأصل فيــــه
ليزقلوك العيال بين السِكك بالطوب
قالو المحبة وفا ، قلت الوفا دفنوه
سخافة المهزلة فرضت شيطان عبدوه
لو تُحكُم المصلحة هات العُشار وادبح..!!
إللي بتحكم مرا والواد بيضرب أبوه..!!
أزمة ضمير ف البلد ضلِت معاها نفوس
خلت ولاد الهفأ ,, كِترت معاها فلـوس
ماعادش وازع يرجَّع للحياه أمـوات
والكدب بين البشر أصبح شِعارملمـوس
مليت ولاد للي مُش هشتم كفاني ذنوب
وكمان قليل الأدب اللي تناه معطـــــوب
حاوِّلت انافِق لقيت أصلِ الربايه مـَــل
ولساني لو حـَل هيبـَّطــَّح كتير بالطــوب
عبد الفلوس لو تبيِّن طرف ميت لحلوح
يبيع ضميره ويعمل قرد فين م تروح
يلعق مداسك ويعمل م الفسيخ شربـات
ولو هتركب يوطي لك كمان مسموح
بفلوس تغيَّر ذِمم بفلوس تبدِّل ناس
بفلوس تعجِّم عرب تفقع هنود (مدراس) مدينة في الهند
بفلوس تروِّض أسد يتبع خـُطاك حارس
لكن بقرشك ما تحلم يوم بحُب الناس
اوعاك تظـُن الجمال يوم تشتريه بالقرش
أو يوم تهرجـل عبط ويسقفولك طــُرش
مِنحة جمال ربنا مِش روج يداري عيب
الوحشه لو سبِّلت جنِب ل يكلك قرش
الوحشة لو سبِلت طرف الغنج تكفيك
العُمر مش بعزئه أوعى العائول يكفيك
لو أنت أد اللجام امسك زمـــام مُهرة
ولو جنابك خِرع هتفِز بيك تكفيـــك
أظن عيبه أوي إنك تحِز ف ابوك
علشان مراتك تقلـِّل من كرامة ابوك
رباك وكبَّر وعلـِّم واحتواك ياغبـي
ليه لمّا تِكبر تبيع أمك وتـُهجُر ابوك
مِن سِنديان الأدب والحِشمة تاج ماسي
الحرف شاهد على بصمة أديب ماسي
بدرت غـَلِة حيا يمكن تنبــِّت خير
يرَّجع الجيل لنهجِ المُصطفى الماسي
الدنيا لو غيِّمت أُصبر مسيرها تروق
ولما تِحرَن فرس بالصبر سيبها تروق
ما توقفش دايما وأيـًّا كان ع الواحدة
خليك ف كوم ربنا بالصبر كـُلو يروق
ابن اللي خلِف مرا جرجر ابوه للذل
يلبس مقطـَّع ويظهر عورِّتـو للكـُـل
لو أبن راجل هيـُستـُر بالحيــا نفســو
لكِن عليه العوض مالت عليك يادهُــل
أزمة ضمير بقلم شاعر العامية عبدالخالق شويل (القصيدة باللهجة المصرية)
السبت 8 فبراير - 22:47
