هل تحرير ليبيا من المليشيات اهم من سد النهضة

استحملوني في طول المقال - بس اقرا وافهم وفهم ولادك....عشان نتعلم من التاريخ بدل ما يعلم علينا....
هي ليبيا أهم من الميه في اثيوبيا؟
عشان اجاوبلك على السؤال ده لازم اقولك عبارة باكررها لنفسي كل يوم، مفادها:" التاريخ لا يبدع مواقفه، التاريخ بيكرر أفعاله لأن الناس ما بتفتكرهوش وبتنساه". ومن هنا اقولك ليه مصر تعلن جاهزية قواتها لمواجهة التمدد التركي في ليبيا في الوقت اللي بتتفاوض فيه مع اثيوبيا ولما فشل التفاوض لجأت لمجلس الامن...
يعني ايه؟
أقولك....
- التاريخ بيقول إن مصر زي ما انت شايف كده على الخريطة، قلب العالم كله مش العالم العربي بس ولا منطقة الشرق الاوسط. التاريخ بيقول انها كانت مطمع المحتل ايا كانت هويته على مدار السنين، التاريخ بيقول ان كل طامع بيستنى لحظة ضعف الجيش المصري عشان ينقض عليها لتامين مصالحه. التاريخ بيقول إن من سنة 1948 و عدو مصر الاول والاخير صهاينة العالم ومقر حكمهم اللي اتزرع بإرادة دولية في فلسطين المحتلة( وحط تحت ارادة دولية مليون خط من اول بريطانيا وفرنسا، الى امريكا والاتحاد السوفيتي).

- التاريخ بيقول ان من الد اعداء العثمانيين الأوائل هي مصر لأسباب كتيرة أهمها قيمتها وحضارتها و سيطرتها، المماليك كانوا ملوك البحار في وقتهم واجهو سليم ولولا خيانة بعضهم ما كانش هوب ارض مصر، ابراهيم باشا هزم العثمانيين في قونية في وسط هضبة الاناضول على ارضهم سنة 1832 ولولا تدخل روسيا كنا احتلينا استنبول، ابراهيم باشا مسح بيهم الارض تاني سنة 1839 في معركة نزيب ولولا تدخل بريطانيا والنمسا برده كنا رجعنا ندخل استنبول. العثمانيين القدام ما بينسوش ان مصر والعرب ما صدقوا خلصوا من احتلالهم بعد اعلان بريطانيا الحرب عليهم في 1914.

- التاريخ بيقول إن تركيا كانت تاني دولة ذات اغلبية مسلمة تعلن اعترافها باسرائيل سنة 1949 بعد ايران ومن يومها واسرائيل وتركيا وايران مهما اتغيرت الانظمة والمسميات سمنة على عسل وبينهم اقتصاد وسلاح واستراتيجيا، واوعى تقولي لأ دي دول مسلمة... اقرا و ابحث قبل ما تقول كلام غلط.
- التاريخ بيقول إن اسرائيل عشان تواجه مصر وزعامتها للعالم في افريقيا والشرق الاوسط و صمودها في وش تحالفات صهيونية فشلت زي حلف بغداد، عقدت اتفاقية "الحزام المحيط" بدعم ورعاية امريكية سنة 1958. الاتفاقية ضمت اسرائيل وتركيا وايران و اثيوبيا. وكانت مجالات التعاون في مجال المخابرات وعمليات التجسس والصناعات العسكرية وبيع السلاح والامن المائي لإسرائيل.

- التاريخ بيقول إن اسرائيل ربطت أمنها من الخمسينيات في القرن الماضي بقوة علاقتها مع اثيوبيا اللي كانت مركز لدعم اسرائيل من سنين. وبسبب التعاون ده استفاد الطرفين بقوة. اسرائيل اخدت مميزات التواجد في افريقيا عند منابع النيل، ومركز لخدمة الطيران الاسرائيلي في افريقيا، وسهولة المرور في البحر الاحمر قبل انفصال اثيوبيا عن اريتريا، والتمدد في سياسة بتر الأطراف للقوة المصرية في قلب افريقيا. واثيوبيا استفادت صفقات سلاح بشروط ميسرة الى حد القنابل العنقودية وصواريخ مضادة للطيران، دعم اسرائيل لها في حربها مع اريتريا، تأسيس شبكة الامن المعلوماتي الاثيوبي على يد خبراء الموساد، وعشان كده كانت اثيوبيا هي الدولة الافريقية الوحيدة اللي ما صوتتش على قرار الامم المتحدة الرافض لبناء الجدار العازل في فلسطين المحتلة سنة 2003 ، ده غير اتمام هجرة يهود الفلاشا لاسرائيل في 2013.

- التاريخ بيقول إن عمقك الاستراتيجي المصري يمتد لسوريا والعراق والخليج العربي شمالا و شرقا، والى اخر دول منابع النيل في تنزانيا، والقرن الافريقي وباب المندب جنوباً، والى عمق ليبيا في سرت والجفرة غرباً... و إنك لو بصيت تاني على الخريطة حتلاقي ان تركيا بالفعل احتلت اجزاء من شمال سوريا و العراق، وتتواجد في اليمن بالتعاون مع ايران، كما تمتلك قاعدة عسكرية في الصومال وتدير ميناء جيبوتي و تستثمر في اثيوبيا واليوم في ليبيا.
يعني ايه؟
برده اقولك...
يعني ملف مياه النيل إنت مضيت فيه مع اثيوبيا اتفاق حسن النوايا سنة 2015 ورغم الانتقادات اللي واجهت هذا الاتفاق إلا إنه اصبح اليوم وثيقة ادانة لاثيوبيا دوليا لإنها وقعت على انها لا يمكن ملأ السد بشكل منفرد وبدون الاتفاق مع السودان ومصر. لإنك قعدت واتكلمت واتفاوضت في كل المفاوضات على مدار 5 سنين ووقعت منفردا على اخر وساطة في امريكا والنهاردة قدمت ورقك لمجلس الامن اللي قال لازم يقعد الجميع يتفق وفقا لاتفاق حسن النوايا...يعني اثيوبيا يا تتفق وتحترم نفسها يا إلا ما تلومش غير نفسها والميه خط احمر وحياة بالنسبة لنا واللي يمسه يموت. ويموت ازاي دي في رجالة عارفين يعملوها ازاي وافتكر عملية الحفار وهات روايتها وافهم واتعلم.

يعني ليبيا النهاردة هي الخطر الأقرب في امنك الغربي بأكتر من 20 ألف مقاتل مرتزق وردتهم تركيا ليها عشان يهددوا امنك. واياك تقول وهو امني متهدد من ليبيا في ايه؟ اقولك وهو عمليات ضرب كمين الفرافرة اول وتاني مرة جت منين؟ وهو قتل 21 مصري في 2015 كانت فين؟ وهو الجيش المصري الحر اللي كان بيعمله هشام عشماوي على غرار النموذج السوري كان فين؟ وهو ضرب ظباط الشرطة في طريق الواحات جه منين ؟ وهو ضرب اتوبيسات التعبد في المنيا جه منين...... يعني امنك في ليبيا زي امنك في اثيوبيا زي امنك في سينا زي امنك في حلايب وشلاتين وكل حدودك...لكن ايه اولويات الحماية في لحظة ما ....ده اللي بيحدده اللي شايف الصورة كاملة.
الخريطة بتقول عدوك بيحاصرك بوكلاء عنه...لابسين عباية الدين وعباية البراءة...ولازم تبقى صاحي...
ربي يحمي مصر
Nashwa Hofy

» احدث صور لسد النهضة-خريطة سد النهضة باثيوبيا
» سد النهضة والعنت الاثيوبى
» تأثير سد النهضة على كل من مصر والسودان
» سد النهضة الاثيوبى
» ( تحرير المراة ) حركة مشبوهة ونهج تغريبى - قلم الكاتب / طارق فايز العجاوى